انجیلِ یوحنا 3

نیقودیموس ایا وَ دییَنِ عیسی

1مِردی بی وَ نومِ نیقودیموس، وَ عالِمَلِ فرقه فَریسی وُ وَ گَپویَلِ یهود. 2وِّ یِه شُو اومَه طی عیسی وِ وَش گُت: «استاد، دونیم تِ معلمی یِی که وَ طرفِ خدا اومَیِه، سی‌یِکِه هیشکَه نیتَرِه معجزه‌یَل وِ نشونه‌یَلی که تِ ایکِنی، وَ عمل بیارِه، غیرَ یِکِه خدا باش بو.» 3عیسی مِنِه جواب گُت: «وَراسی، وَ تِ ایگُم، تا کسی اَزنو زادَه نَوابو، نیتَرِه پادشاییِ خدا نَه بِوینِه.» 4نیقودیموس وَش گُت: «کسی که سالخَردَه یَه، چطو ایتَرِه زادَه وابو؟ مَه ایتَرِه یِه دَف‌دَه وَرگَردِه وَ کِمِ دِیش وُ وَ دنیا بیا؟» 5عیسی جواب دا: «وَراسی، وَ تِ ایگُم تا کسی وَ اُو وِ روح زادَه نَوابو، نیتَرِه وَ پادشاییِ خدا رَه بِجورِه. 6اوچیئی که وَ بَشَرِ خَکی زادَه وابو، بَشَری یَه؛ امّا اوچیئی که وَ روح زاده وابو، روحانی یَه. 7تعجب نکن که گُتُم باید اَزنو زادَه وابِیت! 8بای هر جا که بِخوا ایا؛ صیاشَه ایشنِفی، امّا نُونی وَ کوچِه ایا وِ ایرَه کوچو. هر کس هَم که وَ روح زادَه وابو هَمیطورِه.» 9نیقودیموس وَش پُرسی: «ایطو چیئی چطو ایابو؟» 10عیسی جواب دا: «تِ معلم اسرائیلی وِ ای چییَلَه نیفَمی؟ 11وَراسی، وَ تِ ایگُم که ایما وَ اوچیئی که دونیم گَپ ایزَنیم وُ وَ اوچیئی که دیمونِه شهادَت ایئیم، امّا ایشا شهادَتِمونَه قبول نیکِنیت. 12اَر موقی که درمورد کارَلِ زمینی باتون گَپ زَم باوَر نَکِردیت، چطو باوَر ایکِنیت اَر وَ کارَلِ آسمونی سیتون بِگُم؟ 13هیشکَه وَ آسمون بالا نَرَتِه، غیرَ وِّ که وَ آسمون اومَه دومِن، یعنی کِرِ انسان [که مِنِه آسمونِه]. 14هَموطو که موسی او مارِ برنجی نَه مِنِه بیابون زَه سَرِ چُو وِ عَلَم کِه بالا، کِرِ انسان هَم باید عَلَم وابو بالا، 15تا هرکه وَش ایمون بیارِه، حیات ابدی داشتَه بو.

16«سی‌یِکِه خدا جهانَه ایقَه محبت کِه، که تِنا کِرِ خِشَه دا تا هرکه وَش ایمون بیارِه هلاک نَوابو، بلکم حیات ابدی بِجورِه. 17سی‌یِکِه خدا کِرَ وَ جهان بِسی نَکِه تا جهانی‌یَلَه محکوم کِنِه، بلکم بِسی کِه تا وَ واسطۀ وِّ نجات بِجورِن. 18هرکه وَش ایمون دارِه محکوم نیابو، امّا هرکه وَش ایمون نَیارِه، هَمیسِه محکوم وابی‌یِه، سی‌یِکِه وَ نومِ تِنا کِرِ خدا ایمون ناوُرده. 19وِ محکومیَت مِنِه یِنِه که نور اومَه وَ جهان، امّا انسانَل تاریکی نَه بیشترَ نور دوس داشتِن، سی‌یِکِه اعمالِشون بَدِه. 20سی‌یِکِه هرکه بَدی نَه وَجا ایارِه وَ نور نفرت دارِه وِ نیا طِی نور، نَکِنِه کارَلِش آشکار وابو وِ رسوا وابو. 21امّا وِه که اوچیئی نَه که دِرِسِه اَنجوم اییِه ایا طِی نور تا آشکار وابو که کارَلِش وَ کِمَکِ خدا اَنجوم وابی‌یِه.»

شهادَتِ یحیِی تعمیددَهندَه در مورد عیسی

22بعدَ وُ، عیسی وِ شاگردَلِش رَتِن وَ دهاتَلِ ولاتِ یهودیَه. عیسی مدتی نَه وُچِه بِی اونگَل سَر کِه وِ مردمَه تعمید ایدا. 23یحیی هَم مِنِه عِینون، نِزِنگِ شهرِ سالیم، تعمید ایدا، سی‌یِکِه وُچِه اُو زیاد بی وِ مردم اییومَن، تعمید ایگِرُتِن. 24یِه نِهِی وِه بی که یحیی بییُفتِه وَ زندان. 25اوسو، یِکی وَ شاگردَلِ یحیی بِی یِه یَهودی وَ سَرِ رسمِ رسوم غسلِ پاکی بَحثشون وابی. 26پَ اومَن طِی یحیی، وَش گُتِن: «استاد، وِّ که بِی تِ اولَتِ رو اردن بی، وِ تِ وَش شَهادَت دِی، ایسِه خُوش تعمید اییِه وِ هَمَه ایرَن طِیش.» 27یحیی مِنِه جواب گُت: «هیشکَه نیتَرِه چیئی وَ دَس بیارِه، غیرَ اوچیئی که وَ آسمون وَش عطا وابو. 28ایشا خِتون شاهِدیت که مِ گُتُم نَه مسیحِ موعودُم، بلکم نِهِی وِّ بِسی وابی‌یِمِه. 29عروس این دومایَه، امّا دوسِ دوما که اولَت وِیسایِه وَش گوش اییِه، وَ اِشنُفتَنِ صییِی دوما یِکِلی شایی ایکِنِه. پَ شاییِ مِ هَم ایسِه کامل وابی‌یِه. 30وِّ بایِس گَپوتَر وابو وِ مِ بایِس کِچِلو وابوم.

31«وِّ که وَ بالا ایایِه، وَ هَمَه بالاتَرِه، امّا وِّ که وَ زمینِه، زمینی یَه وُ وَ چییَلِ زمینی گَپ ایزَنِه. وِّ که وَ آسمون ایایِه، وَ هَمَه بالاتَرِه. 32وُّ وَ اوچیئی که دییِه وِ اِشنُفتِه شهادَت اییِه، امّا هیشکَه شهادَتِشَه قبول نیکِنِه. 33وِه که شهادت وِّ نَه قبول ایکِنِه، وَ راستیِ خدا مُهر تأیید ایزَنِه. 34سی‌یِکِه او کسی که خدا بِسی کِردِه، کلام خدا نَه اعلام ایکِنِه، سی‌یِکِه خدا روحِ خِشَه وَ قَدِ معین "وَش" عطا نیکنه. 35بُو، کِرَ دوس دارِه وِ همَه چی نَه دایِه وَ دَسِش. 36کسی که وَ کُر ایمون دارِه، حیات ابدی داره؛ امّا کسی که وَ کُر اطاعت نیکِنِه، حیاتَه نیبینِه، بلکم غضبِ خدا سَرِش ایوِیسِه.

Valið núna:

انجیلِ یوحنا 3: SLB

Áherslumerki

Deildu

Afrita