انجیلِ یوحنا 13
13
شُسَنِ پایَلِ شاگردَل
1نِهِی عیدِ پِسَح، عیسی بِی آگایی وَ یِکِه ساعتِش رَسییِه که وَ ای دنیا بِرَه طِی بُو، کَسَلِ خِشَه که مِنِه ای دنیا دوس داشت، تا وَ آخِر محبت کِه.
2موقِی شوم بی. اِبلیس زیتَر مِنِه دلِ یهودایِ اَسخَریوطی، کِرِ شمعون، نَهایَه بی که عیسی نَه تسلیمِ دشمن کِنِه. 3عیسی که دونِس بُو آسمونی همه چی نَه دایِه وَ دَسِش وُ وَ طِی خدا اومَیِه وِ ایرَه طِیش، 4وَ سَرِ شوم وَریسا وِ قَباشَه وَ وَرِش درآوُرد وِ حوله‌ای وَگِرُت، بَس وَ قَدِش. 5اوسِه اُو رِت مِنِه لَگنی وِ شروع کِه وَ شُسَنِ پایَلِ شاگِردَل وِ خشک کِردَنِشون بِی حوله‌ای که وَ قَدِش بَسَه بی. 6وختی رَسی وَ شمعونِ پطرس، وِّ وَش گُت: «آقا، مَه تِ ایخِی پِی مِنَه بِشوری؟» 7عیسی جواب دا: « اوچیئی که دارُم ایکِنُم ایسِه تِ نیفَمی، امّا دِندا ایفَمی.» 8پطرس وَش گُت: «پایَلِ مِنَه وَتَه نیشوری!» عیسی جواب دا: «تا تِنَه نَشورُم بَهری بِی مِ نَیاری.» 9شمعونِ پطرس گُت: «آقا، نَه تِنا پایَلُم، بلکم دَسَلُم وِ سَرِمَه هَم بشور!» 10عیسی جواب دا: «وِه که حموم کِردِه، سَراپا تمیزِه وُ وَ شُسَن اِتیاج نَیارِه، غیرَ پایَلِش. ایسِه ایشا پاکیت، امّا نَه هَمَه.» 11سی‌یِکِه دونِس کی وِّ نَه تسلیمِ دشمن ایکِنِه، وِ سی هَمیِه گُت: «همۀ ایشا نَه پاکیت.»
12بعدَ یِکِه عیسی پایَلِشونَه شُس، قَباشَه کِه وَرِش وِ اُمبِلا نِشَس سَرِ سفرۀ شوم. اوسِه وَشون پُرسی: «مَه فَمِسیت چه سیتون کِردُم؟ 13ایشا مِنَه استاد وِ آقا ایخونیت وِ دِرُس هَم ایگِیت، سی‌یِکِه هَمیطورِه. 14پَ اَر مِ که آقا وِ استادِ ایشایَم پایَلِتونَه شُسُم، ایشا هم بایِس پایَلِ یَکَه بِشوریت. 15مِ بِی ای کار، سرمشقی وَ ایشا دام تا ایشا هم هَموطو رفتار کِنیت که مِ بِی ایشا کِردُم. 16وراسی، وَ ایشا ایگُم، نَه غلام وَ اربابِ خُوش گَوتَرِه، نَه بِسی وابی‌یَه وَ کسی که بِسیش کِردِه. 17ایسِه که اینگَلَه دونیت، خَش وَ حالتون اَر وَشون عمل کِنیت.
18«اوچیئی که ایگُم نَه درموردِ هَمَتونِه. مِ اونگَلی نَه که انتخاب کِردِمِه، ایشناسُم. امّا ای نِوشتۀ مقدّس وَ حقیقت ایرَسِه که ایگُ "وِه که نونِ مِنَه ایخَرِه، بِی مِ وَریسایِه وَ دشمنی." 19پَ ایسِه نِهِی یِکِه اتّفاق بییُفتِه، وَ ایشا ایگُم تا موقِی که اتّفاق اُفتا، ایمون بیاریت که مِنُم. 20وراسی، وَ ایشا ایگُم، هرکه بِسی وابی‌یِۀ مِنَه قبول کِنِه، مِنَه قبول کِردِه، وِ هرکه مِنَه قبول کِنِه، او کسی نَه که مِنَه بِسی کِردِه قبول کِردِه.»
21عیسی بعدَ یِکِه یِنَه گُت، مِنِه روحِ خُوش پریشون وابی وِ آشکارا اعلام کِه: «وراسی، وَ ایشا ایگُم، یکی وَ ایشا مِنَه تسلیمِ دشمن ایکِنِه.» 22شاگردل سیلَ یَک کِردِن، مِنِه حیرت بییِن که یِنَه درموردِ کی ایگُ. 23یکی وَ شاگردل، که عیسی دوسِش داشت، نِزِنگِ عیسی تِکی زَیَه بی. 24شمعونِ پطرس بِی اِشارَه وَش خواس تا وَ عیسی پُرس کِنِه وِّ کیَه. 25پَ وِّ یِچِی خِشَه کشی واپَس وُ وَ سینۀ عیسی تِکی زَه وِ پُرسی: «آقا، وِّ کیَه؟» 26عیسی جواب دا: «هَموِه که ای تِکِه نونَه بعدَ یِکِه زَم مِنِه کاسَه وَش اییُم.» اوسِه تِکِه‌ای نونَه زَه مِنِه کاسَه وُ وِه نَه دا وَ یهودا کِرِ شمعون اَسخَریوطی. 27وختی یهودا لُقمَه نَه گِرُت، هَمو دَقَه شیطون رَت مِنِه جِلدِش. اوسِه عیسی وَش گُت: «اوچیئی که وَ دینِ اَنجومِشی، زیتَر اَنجومِش بییِه.» 28امّا هیچ کویَکی وَ کَسَلی که سَرِ سفرَه نِشَسَه بییِن، منظورِ عیسی نَه نَفَمِسِن. 29یِه‌پاره‌ای گَمون کِردِن که سی‌یِکِه کیسۀ پیلِ دخلِ‌خرج طِی یهودا یَه، عیسی وَش ایگُ که هر چیئی که سی عید لازِمِه بِسونِه، یا یِکِه چیئی بییِه وَ فَقیرَل. 30بعدَ خَردَنِ لقمَه، یهودا زی زَه وَدَر. وِ شُو بی.
حکمی تازَه
31بعدَ یِکِه یهودا رَت وَدَر، عیسی گُت: «ایسِه کِرِ انسان جلال جُس وِ خدا مِنِه وِّ جلال جُس. 32اَر خدا مِنِه وِّ جلال جُس، پَ خدا هم وِّ نَه مِنِه خُوش جلال اییِه وُ وِّ نَه زی جلال اییِه. 33اولادَلِ عزیزُم، یِچِی دَ بِی ایشانُم. وَ دینِ مِ ایگَردیت وِ هَموطو که وَ یَهودی‌یَل گُتُم، ایسِه وَ ایشا هم ایگُم که وُچه که مِ ایرَم، ایشا نیتَریت بی‌یِیت. 34حکمی تازَه وَ ایشا اییُم، وُ وِه یِنِه که یَکَه محبت کِنیت. هَموطو که مِ ایشا نَه محبت کِردُم، ایشا هم بایِس یَکَه محبت کِنیت. 35وَ هَمی محبتِتون وَ یَک، همَه ایفَمِن که شاگرد مِنیت.»
36شمعونِ پطرس گُت: «آقا، کوچِه ایرِی؟» عیسی جواب دا: «تِ ایسِه نیتَری وَ دینِ مِ بییِی وَ جِیئی که ایرَم؛ امّا بعداً اییِی وَ دینُم.» 37پطرس گُت: «آقا، سیچِه ایسِه نیتَرُم بیام وَ دینِت؟ مِ جونِمَه اینُم وَ رَت.» 38عیسی گُت: «جونِتَه اینی وَ رَم؟ وراسی، وَ تِ ایگُم، نِهِی یِکِه قِروس بُنگ بییِه، سه دَفَه مِنَه حاشا ایکِنی.»
Valið núna:
انجیلِ یوحنا 13: SLB
Áherslumerki
Deildu
Afrita
Want to have your highlights saved across all your devices? Sign up or sign in
@ 2024 Korpu Company