انجیلِ یوحنا 1
1
انسان وابی‌یَنِ کلام
1وَ اَوَل کَلَمَه بی وِ کَلَمَه بِی خدا بی وِ کَلَمَه، خدا بی؛ 2هَم وُّ وَ اَوَل بِی خدا بی. 3هَمَه چی وَ واسطۀ وِّ آفرییَه وابی، وُ وَ هر چیئی که آفرییَه وابی، هیچ چیئی بدونِ وِّ آفرییَه نَوابی.
4مِنِه وِّ حیات بی وِ او حیات، نور آیَمَل بی. 5ای نور مِنِه تاریکی بِرچ ایزَنِه وِ تاریکی وِه نَه کور نیکِنِه.
6مِردی اومَه که وَ طرفِ خدا بِسی وابی‌یَه بی؛ نومِش یحیی بی. 7وِّ سی شِهادَت دایَن اومَه، سی شَهادَت وَ او نور، تا هَمَه وَ واسطۀ وِّ ایمون بیارِن. 8وِّ خُوش او نور نَبی، بلکم اومَه تا وَ او نور شَهادَت بییِه. 9او نورِ حقیقی که وَ هر انسانی روشنایی ایبَخشِه، اییومَه وَ ای دنیا.
10وِّ مِنِه دنیا بی، وِ دنیا وَ واسطۀ وِّ آفرییَه وابی؛ وا ای حال دنیا وِّ نَه نَشناخت. 11وِّ اومَه وَ مُلکِ خُوش، امّا قومِ خُوش وِّ نَه قبول نَکِردِن. 12امّا وَ تَمومِ کَسَلی که وِّ نَه قبول کِردِن؛ ای حَقَه دا که اولادَلِ خدا وابون، یعنی وَ هر کس که وَ نومِ وِّ ایمون بیارِه؛ 13کَسَلی که، نَه بِی خین وِ نَه وَ ارادۀ جسم وِ نَه وَ خواستۀ انسان، بلکم وَ خدا وَ دنیا اومَن.
14وِ کَلَمَه، انسان وابی وِ مابینِ ایما منزل کِه وِ ایما جلالِ وِّ نَه دییمونِه، جلالی لایقِ او کِرِ یگانَه که وَ طرفِ بو اومَه، پُر وَ فیض وُ راستی. 15یحیی وَش شَهادَت ایدا وِ جار ایزَه که «یِنِه کَسی که درمورِدِش گُتُم: "وِه که بعدَ مِ ایایِه وَ مِ بالاتَرِه، سی‌یِکِه نِهِی مِ وجود داشته".» 16سی‌یِکِه وَ پُر بییَنِ وُّ، ایما هَمَمون نصیب بُردیم، فیض وَ ری فیض. 17سی‌یِکِه شریعت وَ واسطۀ موسی دایَه وابی، وِ فیض وُ راستی وَ واسطۀ عیسی مسیح اومَه. 18هیشکَه وَتَه خدا نَه نَدییِه. امّا او خِدِی یگانَه که مِنِه بغلِ بویَه، هَموُّ وِّ نَه شناسُند.
شهادَتِ یحیی
19یِنِه شَهادَت یحیی اوسِه که گَپویَلِ یَهودی‌یَل؛ کاهنَل وِ لاوی‌یَلَه وَ اورشلیم بِسی کِردِن طِیش تا وَش بِپُرسِن که «تِ کییِی؟» 20وِّ اقرار کِه، وِ حاشا نَکِه، بلکم اقرار کِه، که «مِ نَه مسیحِ موعودُم.» 21اوسِه وَش پُرسییِن: «پَ چه؟ مَه الیاسِ پیغمبری؟» وُ وِّ جواب دا: «نَه.» اونگَل وَش پُرسییِن: «مَه تِ او پیغمبری یِی که موسی پیشگویی کِه؟» وِّ جواب دا: «نه!» 22اوسِه وَش گُتِن: «پَ تِ کییِی؟ بِگُ چه جوابی بویَریم سی کَسَلی که ایما نَه بِسی کِردِنِه؟ درمورد خُوت چه ایگِی؟» 23یحیی طبقِ اوچیئی که اِشعیایِ پیغمبر گُتَه بی، گُت:
«مِ صییِی او جارچی مِنِه بیابونُم که ایگُ،
"رَه خداوندَ صاف کِنیت."
24اوسِه یِه‌پاره‌ای وَ اونگلی که عالِمَلِ فرقه فَریسی بِسی کِردَه بییِن، 25وَش پُرسییِن: «اَر تِ نَه مسیحِ موعودی، نه الیاسِ پیغمبر، وِ نَه او پیغمبر، پَ سیچه تعمید ایئی؟» 26یحیی مِنِه جواب گُت: «مِ بِی اُو تعمید اییُم، امّا مِلاتون کَسی وِیسایِه که ایشا وِّ نَه نیشناسیت، 27هَموِه که بعدَ مِ ایایِه وِ مِ لیاقت نَیارُم بند اُرسی‌یَلِشَه واز کِنُم.»
28تَمومِ اینگَل مِنِه دهاتِ بیت‌عَنیا وَ اولَتِ رو اردن اتّفاق اُفتا، وُچِه که یحیی تعمید ایدا.
بَرِۀ خدا
29صَبِی او روز، یحیی وختی عیسی نَه دی که ایا وَ طَرَفِش، گُت: «یِنِه بَرِۀ خدا که گِنا نَه وَ دنیا اییَگِرِه! 30یِنِه کسی کِه درموردش گُتُم "بعدَ مِ مِردی ایایِه که وَ مِ بالاتَرِه، سی‌یِکِه نِهِی مِ وجود داشتِه." 31مِ خُوم هَم وِّ نَه نیشناختُم، امّا سی هَمیِه اومَمِه وِ بِی اُو تعمید دامِه که وُّ وَ قومِ اسرائیل آشکار وابو.» 32اوسِه یحیی شَهادَت دا، گُت: «روحِ خدا نَه دییُم که مِی کَموتری وَ آسمون اومَه دومِن وِ ری وِّ قرار گِرُت. 33مِ خُوم هَم وِّ نَه نیشناختُم، امّا هَموِه کِه مِنَه بِسی کِه تا بِی اُو تعمید بییُم، وَم گُت: "هَر وخت دیئی روح اومَه دومن وِ ری کسی قرار گِرُت وِ ریش وِیسا، یِنَه بِیون هَمو کسی یَه که بِی روح‌القدس تعمید اییِه." 34وِ مِ دییِمِه وِ شهادَت اییُم که یِنِه کِرِ خدا.»
اَوَلین شاگردَلِ عیسی
35صَبِی او روز، یِه دَف‌دَه یحیی بِی دِ نفر وَ شاگردَلِش وِیسایَه بی. 36وِّ زُل زَه وَ عیسی که رَه ایرَت، وِ گُت: «یِنِه بَرِۀ خدا!» 37وختی او دِتا شاگرد ای گَپَه اِشنُفتِن، وَ دینِ عیسی اُفتان وَ رَه. 38عیسی ریشَه وَرگَردَنا وِ دی که ایان وَ دینِش. وَشون گُت: «چه ایخِیت؟» گُتِن: «ای استاد، حونَت کوچِنِه؟» 39وَشون جواب دا: «بی‌یِیت وِ بِوینیت.» پَ رَتِن وِ دییِن حونَش کوچِنِه وِ او روزَ باش وَ سَر بُردِن. او موقَع، ساعت چارِ بعدظُهر بی.
40یکی وَ او دِتا که بِی اِشنُفتَنِ گَپِ یحیی رَت وَ دینِ عیسی، آندریاس، کَکِی شَمعون پطرس بی. 41وِّ اَوَل، کَکِی خُوش شمعونَ جُس وِ وَش گُت: «ایما ماشیحَ که هَمو مسیحِ موعود بو جُسیمِه.» 42وُ وِّ نَه بُرد طِی عیسی. عیسی سِیلَش کِه وِ گُت: «تِ شمعون کِرِ یونا یِی، امّا "کیفا" صیات ایکِنِن یعنی تَختَهبَرد.»
دعوت عیسی وَ فیلیپُس وِ نَتَنائیل
43صَباش، عیسی تصمیم گِرُت که بِرَه وَ جلیل. وِّ فیلیپُسَ جُس وِ وَش گُت: «وَ دینِ مِ بیو!» 44فیلیپُس اهلِ بیت‌صِیدا، شهر آندریاس وِ پطرس بی. 45فیلیپُس، نَتَنائیلَ جُس وِ وَش گُت: «ایما کَسی نَه که موسی مِنِه تورات وَش اِشارَه کِردِه، وِ پیغَمبَرَل هَم درموردش نِوِشتِنِه، جُسیمِه! وِّ عیسِی ناصری، کِرِ یوسُفِه!» 46نَتَنائیل وَش گُت: «مَه ایابو وَ ناصرَه هَم چییِ خوبی بیا وَدَر؟» فیلیپُس جواب دا: «بیو وِ سیل کُ.»
47وختی عیسی دی نَتَنائیل ایا وَ طَرَفِش، درمورِدِش گُت: «وَراسی که، یِه مِردی اسرائیلی یَه که مِنِش هیچ کَلَکی نی!» 48نَتَنائیل وَش گُت: «مِنَه وَ کوچِه ایشناسی؟» عیسی جواب دا: «نِهِی یِکِه فیلیپُس تِنَه صیا کِنِه، موقِی که هَنی زِرِ او دار انجیر بیئی، تِنَه دییُم.» 49نَتَنائیل جواب دا: «استاد، تِ کِرِ خدایِی! تِ پادشاهِ اسرائیلی!» 50عیسی مِنِه جواب گُت: «مَه وَ خاطرِ هَمیِکِه گُتُم زِرِ او دار انجیر تِنَه دییُم، ایمون ایاری؟ وَ یِه واپَس، چییَلِ گَپوتَرَ یِه ایبینی.» 51اوسِه گُت: «وَراسی، وَ ایشا ایگُم که آسمونَه ایبینیت که واز وابی‌یِه وِ فرشته‌یَلِ خدا نَه ایبینیت که وَ ری کِرِ انسان ایرَن بالا وَ آسمون وِ ایان دومِن.»
Valið núna:
انجیلِ یوحنا 1: SLB
Áherslumerki
Deildu
Afrita
Want to have your highlights saved across all your devices? Sign up or sign in
@ 2024 Korpu Company