ၸႃႇၶရီႉ 9
9
တၢင်းဢၼ်ၸီႇယၢင်ႇဝၢၼ်ႈမိူင်းဢၼ်ၸမ်ၵၼ်တင်းမိူင်းဢီႉသရေႇလႃႉ
1ၼုၵ်ႈၵပၢတ်ႈ ပျႃႇတိၵ်ႈ ထႃႇဝရႃႉၽြႃး တူၵ်းႁွတ်ႈၵႃႈၼိူဝ် မိူင်းႁႃႇတရၵ်ႉလႄႈ ဝဵင်းထမ်ႇမသႅတ်ႉ တၵ်းလႆႈပဵၼ် တီႈဢၼ်မၼ်းလိုဝ်ႈမၼ်းသဝ်းဢေႃႈ။ မၢၵ်ႇတႃၵူၼ်းတင်းလၢႆ ဢိၵ်ႇတင်း မဵဝ်းဢီႉသရေႇလႃႉ ၵူႈမဵဝ်း လူတူၺ်း ထႃႇဝရႃႉၽြႃးယူႇဢေႃႈ။- 2တၵ်းတူၵ်းႁွတ်ႈတီႈမိူင်းႁႃႇမတ်ႉ ဢၼ်ၸပ်းၵၼ်၊ၸမ်ၵၼ်တင်းမိူင်းၼၼ်ႉ ဢိၵ်ႇတင်း တီႈဝဵင်းတူႉရူႉ တင်းဝဵင်းၸီႉတုမ်ႇ ၵွပ်ႈပိူဝ်ႈဢၼ် မၼ်းလၵ်းလႅမ်ၼၼ်ႉ ၼၼ်ႉဢေႃႈ။- 3ပိၵ်ႉသမ်ႉ ဝဵင်းတူႉရူႉၼၼ်ႉ တႄႇႁဵတ်းတိူၵ်ႈ တီႈတိုၵ်းသိုၵ်းဝႆႉပုၼ်ႈမၼ်းလႄႈ ဢဝ်ငိုၼ်းၵွင်ဝႆႉ မိူၼ်ၸိူဝ်ႉၼင်ႇမုၼ်ႈလိၼ်လႄႈ ဢဝ်ၶမ်းလွတ်ႈငၢၼ်ႇၵွင်ဝႆႉ မိူၼ်ၸိူဝ်ႉၼင်ႇၵူမ်ႇ ဢၼ်မီးၵႃႈၼႂ်းသဵၼ်ႈတၢင်းၼၼ်ႉသေၵေႃႈ၊- 4ထႃႇဝရႃႉၽြႃး တၵ်းဢဝ်မၼ်းဢၢပ်ႈပၼ် ၵႃႈၼႂ်းမိုဝ်းပိူၼ်ႈလႄႈ ဢဝ်ႁႅင်းမၼ်းၶျႃးတူၵ်းပႅတ်ႈၵႃႈၼႂ်းပၢင်ႇလၢႆႇသေလႄႈ ဝဵင်းတၵ်းမႆႈသုတ်းပႅတ်ႈ လူၺ်ႈၽႆးဢေႃႈ။- 5ဝဵင်းဢႃႇသၵေႇလုၼ်ႇ တၵ်းႁၼ် လွင်ႈတၢင်းၼၼ်ႉလႄႈ ၵူဝ်ႁႄဢေႃႈ။ ဝဵင်းၵႃႇၸႃႉတၵ်းႁၼ်လႄႈ သၼ်ႇသၢႆၼႃႇလူင်လၢင်ဢေႃႈ။ ဝဵင်းဢေႇၵြုၼ်ႇၵေႃႈ တၵ်းပဵၼ် မိူၼ်ၸိူဝ်ႉၼင်ႇၼၼ် ၵွပ်ႈပိူဝ်ႈဢၼ်တၢင်းဢၼ် မၼ်းမုင်ႈမွင်းၼၼ်ႉ ပဵၼ်တၢင်းဢၼ် ဢူၵ်းဢၢႆၵႂႃႇၼၼ်ႉဢေႃႈ။ ၶုၼ်လူင်တၵ်းႁၢႆသေ ၵႃႈတီႈ ၵႃႇၸႃႉလႄႈ ဝဵင်းဢႃႇသၵေႇလုၼ်ႇၵေႃႈ တၵ်းပဵၼ်ဢၼ်သဵတ်ႇၵူၼ်းယဵၼ်ၵူၼ်းဢေႃႈ။- 6ၵူၼ်းတၢင်ႇဝၢၼ်ႈတၢင်ႇမိူင်း တၵ်းဢွၼ်ၵၼ် ယူႇၵႃႈၼႂ်းဝဵင်းဢႃႇၸုတ်ႉလႄႈ ၵဝ်တၵ်းပႄႇၽဵဝ်ႈမႃႇၼႃႉၸႂ်သုင် မဵဝ်းၽီႉလိတ်ႉတီႉပႅတ်ႈဢေႃႈ။- 7ၵဝ်တၵ်းၼုၵ်ႈလိူတ်ႈဢွၵ်ႇသေ ၵႃႈၼႂ်းသူပ်းမၼ်း ဢိၵ်ႇတင်း လွင်ႈတၢင်းဢၼ်လီႁင်ႈ ဢဵတ်ႇသဵတ်ႇ ဢွၵ်ႇသေၵႃႈၼႂ်းၵႄႈၶဵဝ်ႈမၼ်းပႅတ်ႈဢေႃႈ။ ၵေႃႉဢၼ်ၵိုတ်းဢၼ်ၵျၢၼ်ႇၵေႃႈ တၵ်းၵိုတ်းၵျၢၼ်ႇ ပုၼ်ႈၽြႃးပဵၼ်ၸဝ်ႈႁဝ်းလႄႈ ယူႇမိူၼ်ၸိူဝ်ႉၼင်ႇ ၶုၼ်ၵႃႈၼႂ်းမိူင်းယူႉတႃႉၼၼ်ႉဢေႃႈ။ ၵူၼ်းဝဵင်းဢေႇၵြုၼ်ႇၵေႃႈ တၵ်းပဵၼ် ၸိူဝ်ႉၼင်ႇၵူၼ်းယေႇပူႉသီႉဢေႃႈ။- 8ၵဝ်တၵ်းၶျႃးတပ်ႉ ယူႇၵႃႈတီႈလဵပ်ႈႁွပ်ႈႁိူၼ်းၵဝ် ယူႇၽၢႆႇၼိုင်ႈတင်းတပ်ႉရၢၼ်ႇသူႇ ႁႂ်ႈၽူႈလႂ်ထၼ်ႈပေႃး ဢမ်ႇလႆႈၶဝ်ႈလႆႈဢွၵ်ႇဢေႃႈ။ ၵေႃႉဢၼ်ၼိၵ်ႈၸၢၵ်ႈငႅၼ်းသႄးၼၼ်ႉ ၵမ်းလိုၼ်းဢမ်ႇလႆႈလႄႇၵႂႃႇလႄႇမႃး ၵႃႈၼႂ်းၶဝ်ၼၼ်ႉ။ လွင်ႈမၼ်းၸမ်ႉ မိူဝ်ႈလဵဝ်ၼႆႉ ၵဝ်ဢဝ်တႃၵဝ် တူၺ်းႁၼ်ယဝ်ႉ။
ၶုၼ်ႁေႃၶမ်းၸီႉဢုၼ်ႇဢၼ်တၵ်းမႃး
9လုၵ်ႈယိင်း ၸီႉဢုၼ်ႇဢိူၺ်း၊ ၸူမ်းသိူဝ်းၼႃႇလူင်လၢင်တႃႉ။ လုၵ်ႈယိင်း ဝဵင်းယေႇရူႉသလႅမ်ႇဢိူၺ်း၊ ႁွင်ႉပၢဝ်ႇႁွင်ႉလၢတ်ႈတႃႉ။ တူၺ်းလူး။ ၶုၼ်လူင်မႂ်း ဢၼ်ဝႃႈ ၸဝ်ႈဢၼ်ၸီႇယၢင်ႇၸွမ်းၼင်ႇတြႃးလႄႈ မီးတၢင်းဢၼ် ၵႄႇသႄႇၶျွတ်ႈဢဝ်ၼၼ်ႉ မီးတင်းၸႂ်ဢၼ်ဢူၼ်ႈဢၼ်ဢွၼ်ႇ ၶီႇလီႈ တင်းလီႈဢွၼ်ႇသေလႄႈ မႃးၸူးၵႃႈတီႈမႂ်းဢေႃႈ။- 10ၵဝ်တၵ်းပႄႇၽဵဝ်ႈ လေႃႉရထႃးပႅတ်ႈလႄႈ ၵႃႈၼႂ်းမိူင်း ဢေႇၽရိမ်ႇ ဢိၵ်ႇတင်းမႃႉ ပႅတ်ႈသေၵႃႈၼႂ်းဝဵင်းယေႇရူႉသလႅမ်ႇဢေႃႈ။ ၵၢင်ႇတိုၵ်းသိုၵ်းၵေႃႈ တၵ်းလႆႈၶၢမ်ႇတၢင်းဢၼ် ပႄႇတႅပ်းပႅတ်ႈဢေႃႈ။ ၸဝ်ႈၼၼ်ႉတၵ်းမီးဢမိင်ႉ ႁႂ်ႈၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ လႆႈထၢတ်ႇသိုၵ်း၊ယဵၼ်သိုၵ်းလႄႈ၊ ဢႃႇၼႃႇၸဝ်ႈ တၵ်းတႄႇယူႇ ဢဝ်ၵႃႈတီႈပၢင်ႇလၢႆႇမႄႈၼိုင်ႈ တေႃႇထိုင်ႁွတ်ႈပၢင်ႇလၢႆႇမႄႈၼိုင်ႈ ဢိၵ်ႇတင်း ဢဝ်ၵႃႈတီႈၼမ်ႉႁွင်ႈလူင် တေႃႇထိုင်ႁွတ်ႈႁိမ်းလႅၼ်သုတ်း လိၼ်မိူင်း ဢေႃႈ။
တႄႇတင်ႈၶိုၼ်းၵူၼ်းမဵဝ်းၽြႃးပဵၼ်ၸဝ်ႈ
11မႂ်းၸမ်ႉ၊ ၵဝ်တၵ်းဢဝ်ၵူၼ်းမႂ်း ဢၼ်လႆႈၶၢမ်ႇ တၢင်းဢၼ်ၶျုၵ်ႈဝႆႉယူႇၸိူဝ်းၼၼ်ႉ ပွႆႇဢွၵ်ႇသေ ၵႃႈၼႂ်းႁူးလိၼ် တီႈဢၼ်ဢမ်ႇမီးၼမ်ႉ ၼၼ်ႉၵႂႃႇ ၵွပ်ႈပိူဝ်ႈလိူတ်ႈပတီႉၺိၺ်ႇမႂ်းဢေႃႈ။- 12သူၸိူဝ်းဢၼ်လႆႈၶၢမ်ႇ တၢင်းဢၼ်ၶျုၵ်ႈဝႆႉလႄႈ မုင်ႈမွင်းၶဝ်ဢိူၺ်း၊ ဢွၼ်ၵၼ်ၶိုၼ်းမႃးၸူးၵႃႈတီႈ တိူၵ်ႈတီႈတိုၵ်းသိုၵ်းတႃႉ။ ၵဝ်လၢတ်ႈၸႃႉၸဵမ်ဝၼ်းမိူဝ်ႈၼႆႉဝႆႉ လႄႈဝႃႈ၊ ၵဝ်တၵ်းႁဵတ်းၵျေးၸူးသွင်ပုၼ်ႈ တီႈမႂ်းလူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။- 13ၵဝ်ဝူတ်ႈၵၢင်ႇယူႉတႃႉလႄႈ တိုတ်ႉၸၼ် ၵၢင်ႇဢေႇၽရိမ်ႇယူႇသေလႄႈ တိုၵ်းယူင်းၵူၼ်းၸီႉဢုၼ်ႇတင်းလၢႆ ယူႇၽၢႆႇၼိုင်ႈ တင်းၵူၼ်း ႁေႇလသႃႉတင်းလၢႆလႄႈ ႁႂ်ႈမႂ်းပဵၼ်ၸိူဝ်ႉၼင်ႇလၢပ်ႇလႅဝ်း ၵူၼ်းသိုၵ်း ဢၼ်ႁႅင်းယႂ်ႇၼႃႇၼၼ်ႉဢေႃႈ။- 14ထႃႇဝရႃႉၽြႃး တၵ်းထၢင်ႇသႃးပေႃႇမႃး ၵႃႈၼိူဝ်ၶဝ်လႄႈ ပိုၼ်မၼ်းၸဝ်ႈ ၸိူဝ်းၼၼ်ႉ တၵ်းပုင်ႈလႅၼ်ႈမိူၼ်ၸိူဝ်ႉၼင်ႇၽႃႉမႅပ်ႈၼၼ်ႉ ဢေႃႈ။ ၸဝ်ႈထႃႇဝရႃႉၽြႃးၼၼ်ႉ တၵ်းပဝ်ႇၼႄးၶရႃႇလႄႈ ၵႂႃႇလူၺ်ႈၵၼ်တင်း လူမ်းၽိဝ်ႇႁုင် ၽၢႆႇတၢင်းၸၢၼ်းဢေႃႈ။- 15ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး တၵ်းႁႄႉၵင်ႈႁႄႉလပ်ႉၶဝ်ဝႆႉလႄႈ ၶဝ်ၼၼ်ႉတၵ်းဢွၼ်ၵၼ် ၶူပ်းၵိၼ်လႄႈ ယဵပ်ႇယမ်ႈမၢၵ်ႇႁိၼ် ဢၼ်ထိမ်ႈဢၼ်သိုင်း ၸိူဝ်းၼၼ်ႉဢေႃႈ။ ၶဝ်ၼၼ်ႉ တၵ်းဢွၼ်ၵၼ်သူတ်ႉၵိၼ်လႄႈ ႁွင်ႉသႅၼ်ႇမိူၼ်ၸိူဝ်ႉၼင်ႇ ၶဝ်ၸိူဝ်းဢၼ် ဢိမ်ႇတဵမ်ၼမ်ႉၸပိတ်ႈၼၼ်ႉဢေႃႈ။ ၶဝ်ၼၼ်ႉ တၵ်းမီးတၢင်းဢၼ်ဢိမ်ႇတဵမ်ဝႆႉ မိူၼ်ၸိူဝ်ႉၼင်ႇ မေႃႈလူင် ဢိၵ်ႇတင်းၸိူဝ်ႉၼင်ႇ ၸဵင်ႇယိတ်ႈပလၢင်ႇ ၼၼ်ႉဢေႃႈ။- 16ၼႂ်းမိုဝ်ႉဝၼ်းၼၼ်ႉ ထႃႇဝရႃႉၽြႃး ၽြႃးပဵၼ်ၸဝ်ႈၶဝ် တၵ်းၵႄႇသႄႇၶျွတ်ႈဢဝ်ၶဝ်ၼၼ်ႉ မိူၼ်ၸိူဝ်ႉၼင်ႇ ၽုင်သူဝ်းဢၼ်ဝႃႈ ၵူၼ်းမၼ်းၸဝ်ႈတင်းလၢႆၼၼ်ႉလႄႈ ၶဝ်ၼၼ်ႉတၵ်းပဵၼ် ၸိူဝ်ႉၼင်ႇသႅင်လီသႅင်မျၢတ်ႈ ၵႃႈတီႈမွၵ်ႇႁူဝ်သရၽူႇ ဢၼ်ထၢင်ႇသႃးႁူင်ႁၢင်း ၵႃႈၼႂ်းၼမ်ႉၸဝ်ႈ၊လိၼ်ၸဝ်ႈဢေႃႈ။- 17ၵျေးၸူးမၼ်းၸဝ်ႈၼၼ်ႉ ယႂ်ႇၼႃႇလူင်လၢင်လူင်ပႄႇ။ မုၼ်သရေႇမၼ်းၸဝ်ႈၵေႃႈ ယႂ်ႇၼႃႇလူင်လၢင်လူင်ပႄႇ။ ၶဝ်ႈပိူၵ်ႇၶဝ်ႈသၢၼ် တၵ်းႁႂ်ႈၵူၼ်းၼုမ်ႇၵူၼ်းၵမ်တင်းလၢႆ ယႂ်ႇလီၽူၵ်ႈလီလႄႈ၊ ၼမ်ႉၸပိတ်ႈဢၼ်မႂ်ႇ တၵ်းႁႂ်ႈမႄႈယိင်းသၢဝ်တင်းလၢႆ ယႂ်ႇလီၽူၵ်ႈလီဢေႃႈ။
Valið núna:
ၸႃႇၶရီႉ 9: CBMS
Áherslumerki
Deildu
Afrita
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship