ၸႃႇၶရီႉ 7
7
လွင်ႈၵမ်တၢင်းၵိၼ်ဢၼ်ဢမ်ႇမၢၼ်ႇမႅၼ်ႈ
1ၼႂ်းၶူပ်ႇပီႊဢၼ်ၶုၼ်လူင်တႃႇရီႉ ၼင်ႈႁၢင်ႈ၊ၼင်ႈႁေႃ သီႇပီႊ၊ လိူၼ်ၼဝမႃႉ ဢၼ်လႆႈၸိုဝ်ႈၶီႉသလူႉ၊ သီႇဝၼ်း ၼၼ်ႉ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈၸႃႇၶရီႉဢေႃႈ။- 2မိူဝ်ႈၼၼ်ႉ ၶဝ်ၸိူဝ်းဢၼ်ယူႇ ၵႃႈတီႈဝဵင်းပေႇသလႃႉၼၼ်ႉ ပွႆႇၸႂ်ႉသရေႇၸႃႇ ဢိၵ်ႇတင်းရေႇၵိမ်ႇမေႇလိၵ်ႉ၊ တင်းၵူၼ်းၶဝ်တင်းလၢႆ ၵႂႃႇႁႂ်ႈလႆႈ ႁဵတ်းတၢင်းဢၼ်သူးတွင်း ၵႃႈတီႈၽၢႆႇၼႃႈထႃႇဝရႃႉၽြႃး၊- 3ဢိၵ်ႇတင်း ႁႂ်ႈလႆႈလဝ်ႊထၢမ်တီႈယိတ်ႈပရေႃးႁဵၵ်ႈ ႁိူၼ်းၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးတင်းလၢႆ ဢိၵ်ႇတင်း ပရေႃးၽႅတ်ႈၸိူဝ်းၼၼ်ႉ လႄႈဝႃႈ၊ ၼႂ်းလိူၼ်ပိၼ်ႇၸမႃႉ ၵဝ်ၶႃႈတၵ်းလႆႈႁႆႈႁွင်ႉသေလႄႈ ၵမ်ၵျၢင်ႉ ၵႅၼ်ႇၵႅၼ်ႇၶႅင်ၶႅင် မိူၼ်ၸိူဝ်ႉၼင်ႇ ဢၼ်ႁဵတ်းမႃး ပီႊမိူင်းၼမ်ၼႃႇ ၼၼ်ႉ ၶႃႈႁိုဝ်။ ဝႃႈၼင်ႇၼႆ ၼၼ်ႉဢေႃႈ။- 4မိူဝ်ႈၼၼ်ႉ ၼုၵ်ႈၵပၢတ်ႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ႁွတ်ႈမႃးတီႈၵဝ် လႄႈဝႃႈၸမ်ႉ၊ မႂ်းလၢတ်ႈတီႈ ယိတ်ႈပရေႃးႁဵၵ်ႈတင်းလၢႆ ဢိၵ်ႇတင်း ၵူၼ်းဝၢၼ်ႈၵူၼ်းမိူင်း တင်းသဵင်ႈတင်းလူင်လႄႈဝႃႈ၊- 5ယၢမ်းမိူဝ်ႈဢၼ် သူၵမ်တၢင်းၵိၼ်လႄႈ ႁွင်ႉႁႆႈပွင်ႉၶၢင်းယူႇ ၼႂ်းလိူၼ်ပိၼ်ႇၸမႃႉ တင်းလိူၼ်သတ်ႉတမႃႉ ၸဵတ်းသိပ်းပီႊ တဵမ်တဵမ်ၼၼ်ႉၸိုင်၊ သူဢွၼ်ၵၼ် ၵမ်တၢင်းၵိၼ်တီႈၵဝ် ဢၼ်ဝႃႈတီႈၵဝ်ၼႆႉ ဢမၢၼ်ႇၶၼ်ပဵၼ်ႁိုဝ်။- 6ယၢမ်းမိူဝ်ႈဢၼ်သူ ၵိၼ်ၶူပ်းလႄႈ သူတ်ႉဢိုၵ်ႉၼၼ်ႉ၊ သူဢွၼ်ၵၼ်ၵိၼ်ၶူပ်း ၸွမ်းၼင်ႇဢလူဝ်ႇသူ ဢမ်ႇၸႂ်ႈႁိုဝ်။- 7ဢမိင်ႉဢၼ် ထႃႇဝရႃႉၽြႃး ဢဝ်ပရေႃးၽႅတ်ႈ မိူဝ်ႈၵွၼ်ႇဢွၼ်ၼႆႉ ၸိူဝ်းၼၼ်ႉ မွၵ်ႇလၢတ်ႈဝႆႉ ၼႂ်းမိူဝ်ႈဢၼ် ဝဵင်းယေႇရူႉသလႅမ်ႇ ယင်းမီးၽူႈမီးၵူၼ်းၼမ်ၼႃႇၵိုၼ်းၼႃႇ လႆႈလီလႆႈပဵၼ်လႄႈ ဝဵင်းဢၼ်မီးၵႃႈတီႈ လဵပ်ႈႁွပ်ႈမၼ်းတင်းလၢႆ ဢိၵ်ႇတင်း မိူင်းပွတ်းတၢင်းၸၢၼ်း တင်းၵႃႈတီႈတႂ်ႈတီႈပၢင်ႇတီႈပဵင်း မီးၽူႈမီးၵူၼ်းၼမ်ၵိုၼ်းၼႃႇၼၼ်ႉ ၸိူဝ်းၼၼ်ႉ ပျေႉၸုမ်ႇယဝ်ႉ ဢမ်ႇၸႂ်ႈႁိုဝ်။ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
ၵွပ်ႈပိူဝ်ႈဢမ်ႇထွမ်ႇလႄႈလႆႈၶၢမ်ႇတီႉသိမ်းၵႂႃႇ
8မိူဝ်ႈၼၼ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၸႃႇၶရီႉလႄႈ ဝႃႈၸမ်ႉ၊- 9ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉလႄႈဝႃႈ၊ ဢွၼ်ၵၼ်ၸီႇယၢင်ႇတြႃး မႅၼ်ႈၸွမ်းၼင်ႇတြႃးတႃႉ။ ဢွၼ်ၵၼ်မီးၸႂ်ၵရူႉၼႃႇ တၢင်းဢၼ် ဢဵတ်းလူႁၵ်ႉပႅင်းလႄႈ ၵေႃႉၼိုင်ႈလႄႈၵေႃႉၼိုင်ႈ ႁဵတ်းၵျေးၸူးတီႈၵၼ်တႃႉ။- 10ယႃႇပေၼိၵ်ႈၸၢၵ်ႈငႅၼ်းသႄး မႄႈမူၵ်းမႄႈမၢႆႈ၊ ၵေႃႉဢၼ်ၽၢၼ်ပေႃႈၽၢၼ်မႄႈ၊ ၵူၼ်းတၢင်ႇဝၢၼ်ႈတၢင်ႇမိူင်း၊ ၵေႃႉဢၼ်ယၢၵ်ႈဢၼ်ၽၢၼ်ၼၼ်ႉ ၸိူဝ်းၼၼ်ႉ။ ၵေႃႉၼိုင်ႈလႄႈၵေႃႉၼိုင်ႈ ယႃႇပေၵျၢမ်ႇပွင် တၢင်းၵျၢမ်ႇတၢင်းပွင် ဢၼ်ဢမ်ႇလီတီႈၵၼ်၊ ဝႃႈၼင်ႇၼႆသေၵေႃႈ၊- 11ၶဝ်ဢမ်ႇမီးဢလူဝ်ႇ ၶႂ်ႈထွမ်ႇဢဝ်လႄႈ ဢွၼ်ၵၼ်ဝၢႆႇလင်၊ၵွင်လင်ပၼ်လႄႈ ႁဵတ်းၶတ်းႁဵတ်းတႃႉ ယူႇဢေႃႈ။ ဢွၼ်ၵၼ် ဢိုတ်းႁူၶဝ်ဝႆႉ ႁႂ်ႈၶဝ်ဢမ်ႇငိၼ်းဢေႃႈ။- 12ဢွၼ်ၵၼ်ႁႂ်ႈႁူဝ်ၸႂ်ၶဝ် ၵႅၼ်ႇၶႅင်မိူၼ်ၸိူဝ်ႉၼင်ႇ သႅင်ၸိင်ႇၼၼ်ႉ ႁႂ်ႈဢမ်ႇလႆႈငိၼ်း ၵႂၢမ်းတြႃး ဢိၵ်ႇတင်း ၵႂၢမ်းဢၼ်ဝီႉၺိၺ်ႇ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ဢဝ်ပရေႃးၽႅတ်ႈ မိူဝ်ႈၵွၼ်ႇဢွၼ်ၼႆႉ ၸိူဝ်းၼၼ်ႉ လၢတ်ႈဝႆႉၼၼ်ႉဢေႃႈ။ ပိူဝ်ႈၼႆလႄႈ တၢင်းၸႂ်မႆႈၶႆႈၸႃႉ ဢၼ်ႁႅင်းယႂ်ႇၼႃႇလူင်လၢင် ဢွၵ်ႇသေၵႃႈတီႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမႃးဢေႃႈ။- 13မိူၼ်ၸိူဝ်ႉၼင်ႇဢၼ် မၼ်းႁွင်ႉသႅၼ်ႇလႄႈ ၶဝ်ဢမ်ႇထွမ်ႇငိၼ်းၼၼ်ႉ၊ လႆႈသမ်ႉ ၶဝ်တၵ်းႁွင်ႉသႅၼ်ႇလႄႈ ၵဝ်ၵေႃႈယင်းဢမ်ႇထွမ်ႇ၊ဢမ်ႇငိၼ်းလႄႈ တၵ်းယူႇဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။- 14ၵဝ်တၵ်း ဢဝ်လူမ်းၽိဝ်ႇႁုင် ပတ်ႉထူဝ်းဢဝ်ၶဝ် ၸၢတ်ႇပိုၼ်ပႅတ်ႈ ၵႃႈၼႂ်းၵူၼ်း ၵူႈၸိူဝ်ႉၵူႈမဵဝ်း ဢၼ်ၶဝ်ဢမ်ႇႁူႉ ၸိူဝ်းၼၼ်ႉဢေႃႈ။ ပိူဝ်ႈၼႆလႄႈ မိူင်းၶဝ်ၼၼ်ႉ မီးတၢင်းဢၼ် သဵတ်ႇၵူၼ်း၊ယဵၼ်ၵူၼ်းယူႇ သေလႄႈ ၽူႈလႂ်ဢမ်ႇၵႂႃႇ၊ဢမ်ႇမႃး ၵႃႈၼႂ်းမၼ်း သေၵေႃႉသေၵူၼ်း။ ၶဝ်ႁႂ်ႈမိူင်းဢၼ်သႃႇယႃႇလီငၢမ်းၼၼ်ႉ ပဵၼ်တီႈဢၼ် ပႄႇၽဵဝ်ႈပႅတ်ႈယဝ်ႉ လူင်ပႄႇ၊ ဝႃႈၼင်ႇၼႆဢေႃႈ။
Valið núna:
ၸႃႇၶရီႉ 7: CBMS
Áherslumerki
Deildu
Afrita
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship