ၸႃႇၶရီႉ 2
2
ရူႇပႃႇရူင်ႇလူၺ်ႈလွင်ႈၸိူၵ်ႈဢၼ်တႅၵ်ႈ
1လႆႈသမ်ႉ ၵဝ်ဢဝ်တႃၵဝ်ႁႅၼ်တူၺ်းလႄႈ ႁၼ်ၵူၼ်းဢၼ်ယိပ်းၵမ်ၸိူၵ်ႈ ပုၼ်ႈဢၼ်တၵ်းတႅၵ်ႈ၊တၵ်းၶိုပ်ႈၼၼ်ႉ ၵေႃႉၼိုင်ႈလႄႈ၊- 2တွင်ႈထၢမ်တီႈၵေႃႉၼၼ်ႉလႄႈဝႃႈ၊ တၵ်းၵႂႃႇၵႃႈတီႈလႂ်၊ ဝႃႈၼင်ႇၼႆသေယဝ်ႉ၊ မၼ်းလၢတ်ႈတီႈၵဝ်လႄႈဝႃႈ၊ တၵ်းၵႂႃႇႁႂ်ႈလႆႈတႅၵ်ႈတူၺ်း၊ၶိုပ်ႈတူၺ်း ဝဵင်းယေႇရူႉသလႅမ်ႇ ႁႂ်ႈလႆႈႁူႉ ၼႃႈယၢဝ်းမၼ်း ၼႃႈပွတ်းမၼ်းဢေႃႈ၊ ဝႃႈၼင်ႇၼႆဢေႃႈ။- 3တမၢၼ်ႇၵၢင်ႁၢဝ် ဢၼ်လၢတ်ႈတေႃႇၵၼ်တင်းၵဝ်ၼၼ်ႉ ဢွၵ်ႇၵႂႃႇလႄႈ တမၢၼ်ႇၵၢင်ႁၢဝ်တၢင်ႇပႃး ႁႄႉႁပ်ႉႁူဝ်တၢင်းမၼ်းယူႇသေလႄႈ လၢတ်ႈလႄႈဝႃႈ၊- 4ၶုၼ်ႇလႅၼ်ႈၵႂႃႇသေလႄႈ လၢတ်ႈတီႈၵူၼ်းဢွၼ်ႇၼၼ်ႉလႄႈဝႃႈ၊ ဝဵင်းယေႇရူႉသလႅမ်ႇ တၵ်းမီးၽူႈမီးၵူၼ်း မိူၼ်ၸိူဝ်ႉၼင်ႇ ဝၢၼ်ႈဢၼ်ဢမ်ႇမီးလမ်းတပ်ႉ၊လမ်းႁူဝ်ႉၸိူဝ်းၼၼ်ႉ ၵွပ်ႈပိူဝ်ႈ ဢၼ်ၵူၼ်းသတ်ႉတဝႃႇ ဢိၵ်ႇတင်းတရိၵ်ႈသၢၼ်ႇ ပဵၼ်ဢၼ်ၼမ်ၼႃႇလူင်လၢင် ၵႃႈၼႂ်းမၼ်းၼၼ်ႉဢေႃႈ။- 5ထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်းပဵၼ်လမ်းဝဵင်းၽႆး လွမ်ႉလဵပ်ႈႁွပ်ႈမၼ်းယူႇလႄႈ ပဵၼ်မုၼ်သရေႇယူႇ ၵႃႈၼႂ်းၶိုင်ႈၵၢင်မၼ်းဢေႃႈ။
ထႃႇဝရႃႉၽြႃးႁွင်ႉႁႂ်ႈၶဝ်ၸိူဝ်းဢၼ်လႆႈၶၢမ်ႇတီႉၺွပ်းၵႂႃႇၼၼ်ႉပွၵ်ႈၶိုၼ်းမႃး
6ဢိူၺ်း၊ ဢိူၺ်း၊ ဢွၼ်ၵၼ်ဢွၵ်ႇပၢႆႈ သေၵႃႈတီႈ မိူင်းၼႃႈတၢင်းႁွင်ႇမႃးတႃႉ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။ ၵဝ်ႁႂ်ႈသူ ၽၢတ်ႇၽႄၵၼ်ၵႂႃႇ မိူၼ်ၸိူဝ်ႉၼင်ႇလူမ်း ဢၼ်မီးၵႃႈတီႈ သီႇၼႃႈတႂ်ႈၽႃႉၵၢင်ႁၢဝ်ၼၼ်ႉယဝ်ႉ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။- 7ၸီႉဢုၼ်ႇ ဢၼ်ယူႇလူၺ်ႈၵၼ်တင်း လုၵ်ႈယိင်းဝဵင်းပႃႇပူႉလုၼ်ႇဢိူၺ်း၊ ဢွၵ်ႇပၢႆႈႁႂ်ႈလွတ်ႈတႃႉ။- 8ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ မုၼ်ၽုင်းၼၼ်ႉ ပေႃႇမႃးသေယဝ်ႉ၊ မၼ်းၸဝ်ႈပွႆႇၸႂ်ႉၵဝ်ၸူးၵႃႈတီႈ မဵဝ်းၵူၼ်းဢၼ်ယႃႉသူပႅတ်ႈ ၸိူဝ်းၼၼ်ႉဢေႃႈ။ ၵေႃႉဢၼ်တိူဝ်ႉထုၵ်ႇသူၼၼ်ႉ ပဵၼ်ၵေႃႉဢၼ်တိူဝ်ႉထုၵ်ႇ လုၵ်ႈဝၢၵ်ႇမၢၵ်ႇတႃမၼ်းၸဝ်ႈဢေႃႈ။- 9တူၺ်းလူး။ ၵဝ်တၵ်းဢဝ်တႃမိုဝ်းၵဝ် ငႃသႂ်ႇၶဝ်လႄႈ ၶဝ်ၼၼ်ႉတၵ်းပဵၼ် တီႈဢၼ်ၶႃႈၶဝ် ႁိမ်ဢဝ်ယႃႉပႅတ်ႈဢေႃႈ။ သူတၵ်းလႆႈႁူႉလွင်ႈဢၼ် ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးပွႆႇၸႂ်ႉၵဝ် ၼၼ်ႉဢေႃႈ။- 10လုၵ်ႈယိင်းၸီႉဢုၼ်ႇဢိူၺ်း၊ ႁဵတ်းၵႂၢမ်းလႄႈ သႂၢင်ႇသိူဝ်းတႃႉ။ ၵဝ်တၵ်းမႃးလႄႈ ယူႇၵႃႈၼႂ်းၵၢင်မႂ်းဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။- 11ၼႂ်းမိုဝ်ႉဝၼ်းၼၼ်ႉ မဵဝ်းၵူၼ်းၼမ်ၼႃႇ တၵ်းဢွၼ်ၵၼ်ၶဝ်ႈယူႇၽၢႆႇ ထႃႇဝရႃႉၽြႃးလႄႈ ပဵၼ်ၵူၼ်းၵဝ်ဢေႃႈ။ ၵဝ်တၵ်းၶဝ်ႈယူႇၵႃႈၼႂ်း ၵၢင်မႂ်းလႄႈ မႂ်းတၵ်းလႆႈႁူႉလွင်ႈဢၼ် ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ပွႆႇၸႂ်ႉၵဝ်ၸူးတီႈမႂ်း ၼၼ်ႉဢေႃႈ။- 12ထႃႇဝရႃႉၽြႃးတၵ်းလႆႈၶၢမ်ႇဢဝ်ဢမူၺ်ႇမိူင်းယူႉတႃႉဝႆႉပုၼ်ႈဝႆႉတႃႇမၼ်းၸဝ်ႈ ၵႃႈၼႂ်းမိူင်းဢၼ်မူတ်းၸၢင်ႇၼၼ်ႉလႄႈ တၵ်းသမ်ႉၶိုၼ်းလိူၵ်ႈၵဵပ်းဢဝ် ဝဵင်းယေႇရူႉသလႅမ်ႇဢေႃႈ။- 13ၵူၼ်းသတ်ႉတဝႃႇ တင်းသဵင်ႈတင်းလူင်ၶဝ်ဢိူၺ်း၊ ဢွၼ်ၵၼ်ယူႇတဵတ်ႇတဵတ်ႇၼိမ်ၼိမ် ၵႃႈတီႈၽၢႆႇၼႃႈ ထႃႇဝရႃႉၽြႃးတႃႉ။ မၼ်းၸဝ်ႈ လုၵ်ႉ ၵႃႈတီႈထႃႇၼႃႉၸဝ်ႈ တီႈဢၼ်မၼ်းၸဝ်ႈၵိင်းဝၢပ်ႈယူႇ ဢၼ်မူတ်းၸၢင်ႇၼၼ်ႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
Valið núna:
ၸႃႇၶရီႉ 2: CBMS
Áherslumerki
Deildu
Afrita
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship