ၸႃႇၶရီႉ 1
1
တၢင်းႁွင်ႉႁႂ်ႈပွၵ်ႈၶိုၼ်းမႃးတီႈထႃႇဝရႃႉၽြႃး
1ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈပရေႃးၽႅတ်ႈၸႃႇၶရီႉ၊ လုၵ်ႈၸၢႆးပႃႇရၶီႉ၊ လုၵ်ႈၸၢႆးဢီႉတေႃႇၼႂ်းၶူပ်ႇပီႊဢၼ်ၶုၼ်လူင်တႃႇရီႉၸၢမ်ႇႁၢင်ႈၸၢမ်ႇႁေႃ သွင်ပီႊ၊ လိူၼ်ဢႃႉထမႃႉၼၼ်ႉ လႄႈဝႃႈၸမ်ႉ၊- 2ထႃႇဝရႃႉၽြႃးၸႂ်မႆႈၶႆႈၸႃႉတေႃႇ ပူႇမႂ်းမွၼ်ႇမႂ်း ၼႃႇလူင်လၢင်ယဝ်ႉ။- 3ၼႂ်းဝႃႈၼၼ်သေၵေႃႈ မႂ်းလၢတ်ႈတီႈၶဝ်လႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉၸမ်ႉ၊ ဢွၼ်ၵၼ်ၶိုၼ်းမႃးၸူး ၵႃႈတီႈၵဝ်တႃႉ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။ ၵဝ်ၵေႃႈ တၵ်းၶိုၼ်းမႃးၸူး ၵႃႈတီႈသူဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။- 4ယႃႇပေဢွၼ်ၵၼ်ႁဵတ်းၸိူဝ်ႉၼင် ပူႇသူမွၼ်ႇသူ ဢၼ်ပရေႃးၽႅတ်ႈ မိူဝ်ႈၵွၼ်ႇဢွၼ်ၼႆႉၸိူဝ်းၼၼ်ႉ ဢွၼ်ၵၼ်ႁွင်ႉမွၵ်ႇ၊ႁွင်ႉလၢတ်ႈ တီႈၶဝ်လႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ မိူဝ်ႈလဵဝ်ၼႆႉ ဢွၼ်ၵၼ်ပႄႇပႅတ်ႈ သဵၼ်ႈတၢင်းဢၼ်ဢမ်ႇလီ ဢိၵ်ႇတင်း တၢင်းၵမ်တၢင်းၵျၢင်ႉ ဢၼ်ဢမ်ႇလီသူ ၸိူဝ်းၼၼ်ႉတႃႉ၊ ဝႃႈၼင်ႇၼႆသေၵေႃႈ ၶဝ်ဢမ်ႇငိၼ်း၊ ၶဝ်ဢမ်ႇထွမ်ႇဢဝ် ၵႂၢမ်းၵဝ် ၸိူဝ်းၼၼ်ႉ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။- 5ပူႇသူမွၼ်ႇသူၼၼ်ႉ မီးၵႃႈလႂ်။ ပရေႃးၽႅတ်ႈၸိူဝ်းၼၼ်ႉ ၸၢင်ႈဢသၢၵ်ႈလိပ်းယူႇ တႃႇသေႇႁိုဝ်။- 6ၵႂၢမ်းၵဝ်တင်းလၢႆ ဢိၵ်ႇတင်း ပိင်းၺၢပ်ႈၵဝ် ဢၼ်ၵဝ်သင်ႇလၢတ်ႈဝႆႉ တီႈၶႃႈၵဝ် ပရေႃးၽႅတ်ႈၸိူဝ်းၼၼ်ႉ ၶိုတ်းထိုင်ပူႇသူမွၼ်ႇသူ ၸိူဝ်းၼၼ်ႉယဝ်ႉ ဢမ်ႇၸႂ်ႈႁိုဝ်။ ၶဝ်ၼၼ်ႉ ၶုၵ်းၸႂ်လႆႈၶႆႈၸႂ်ထူပ်းလႄႈ လၢတ်ႈလႄႈဝႃႈ၊ မိူၼ်ၸိူဝ်ႉၼင်ႇဢၼ် ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးတၢင်းၵျၢမ်ႇတၢင်းပွင် တၵ်းႁဵတ်းတီႈႁဝ်း ၸွမ်းၵႃႈၼင်ႇသဵၼ်ႈတၢင်းဢၼ်ႁဝ်းၵႂႃႇတင်းလၢႆ ဢိၵ်ႇတင်း ၸွမ်းၵႃႈၼင်ႇတၢင်းၵမ်တၢင်းၵျၢင်ႉႁဝ်းၸိူဝ်းၼၼ်ႉ ၼၼ်ႉသေလႄႈ မၼ်းၸဝ်ႈႁဵတ်းတီႈႁဝ်းယဝ်ႉ၊ ဝႃႈၼင်ႇၼႆ ဢမ်ႇၸႂ်ႈႁိုဝ်ဝႃႈၼႆ၊ မၼ်းၸဝ်ႈမီးဢမိင်ႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
ရူႇပႃႇရူင်ႇလူၺ်ႈလွင်ႈၵူၼ်းဢၼ်ယူႇၵႃႈၼႂ်းၵၢင်တူၼ်ႈမူႉရတူႉ
7ၼႂ်းၶူပ်ႇပီႊဢၼ် ၶုၼ်လူင်တႃႇရီႉ ၸၢမ်ႇႁၢင်ႈ၊ၸၢမ်ႇႁေႃ သွင်ပီႊ၊ လိူၼ် ဢေႇၵႃႉတႃႉသမႃႉ ဢၼ်ဝႃႈ လိူၼ်သေးပတ်ႉ၊ သၢဝ်းပၢႆ သီႇဝၼ်းၼၼ်ႉ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈပရေႃးၽႅတ်ႈ ၸႃႇၶရီႉ၊ လုၵ်ႈၸၢႆးပႃႇရၶီႉ၊ လုၵ်ႈၸၢႆးဢီႉတေႃႇၼၼ်ႉလႄႈ၊- 8ရူႇပႃႇရူင်ႇ ဢၼ်ၵဝ်လႆႈႁၼ် ၶိင်ႇၵၢင်ၶိုၼ်းၼၼ်ႉၸမ်ႉ၊ ၵူၼ်းၵေႃႉၼိုင်ႈ ဢၼ်ၶီႇမႃႉလႅင်ၼၼ်ႉ ပေႃႇမႃးလႄႈ ၸုၵ်းယူႇၵႃႈၼႂ်းၵၢင်တူၼ်ႈမူႉရတူႉ ဢၼ်မီးၵႃႈၼႂ်းၶူင်ႈႁူၺ်ႈၼၼ်ႉၸိူဝ်းၼၼ်ႉဢေႃႈ။ ၵႃႈတီႈၽၢႆႇလင်မၼ်းၼၼ်ႉ မီးမႃႉဢၼ်လႅင်၊ မႃႉဢၼ်ၵမ်ႇ၊ မႃႉဢၼ်ၽိူၵ်ႇဢေႃႈ။- 9မိူဝ်ႈၼၼ်ႉ ၵဝ်ထၢမ်လႄႈဝႃႈ၊ ၸဝ်ႈၵဝ်ၶႃႈဢိူၺ်း၊ ၶဝ်ၼၼ်ႉၸမ်ႉ၊ ပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ တမၢၼ်ႇၵၢင်ႁၢဝ် ဢၼ်လၢတ်ႈၵႂၢမ်းတေႃႇၵၼ်တင်းၵဝ်ၼၼ်ႉ ၶိုၼ်းလၢတ်ႈလႄႈဝႃႈ၊ ၵဝ်တၵ်းၼႄပျႃး လွင်ႈဢၼ်ၶဝ်ၼၼ်ႉ ပဵၼ်ၽူႈလႂ်ၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊- 10ၵေႃႉဢၼ်ၸုၵ်းယူႇ ၵႃႈၼႂ်းၵၢင်တူၼ်ႈ မူႉရတူႉၸိူဝ်းၼၼ်ႉၼၼ်ႉ ၶိုၼ်းလၢတ်ႈလႄႈဝႃႈ၊ ၶဝ်ၼႆႉပဵၼ်ၵေႃႉဢၼ် ထႃႇဝရႃႉၽြႃးပွႆႇၸႂ်ႉ ႁႂ်ႈလႆႈလႄႇၵႂႃႇ ၵႃႈၼိူဝ်လိၼ်မိူင်း ၵူႈတီႈၵူႈလႅၼ်ဢေႃႈ၊ ဝႃႈၼင်ႇၼႆဢေႃႈ။- 11ၶဝ်ၼၼ်ႉၵေႃႈ ၶိုၼ်းလဝ်ႊလၢတ်ႈတီႈတမၢၼ်ႇၵၢင်ႁၢဝ်ထႃႇဝရႃႉၽြႃး ဢၼ်ၸုၵ်းယူႇ ၵႃႈၼႂ်းၵၢင်တူၼ်ႈ မူႉရတူႉၸိူဝ်းၼၼ်ႉ ၼၼ်ႉလႄႈဝႃႈ၊ ႁဝ်းၶႃႈလႄႇၵႂႃႇ ၵႃႈၼိူဝ်လိၼ်မိူင်း ၵူႈတီႈၵူႈလႅၼ်ယဝ်ႉၶႃႈယဝ်ႉ။ တူၺ်းၶႃႈလူး၊ လိၼ်မိူင်းတင်းသဵင်ႈတင်းမူတ်း တႄႇၼိမ်ယူႇ၊ မီးတၢင်းဢၼ်တဵတ်ႇလီ၊ၼိမ်လီယူႇၶႃႈဢေႃႈ၊ ဝႃႈၼင်ႇၼႆဢေႃႈ။- 12လႆႈသမ်ႉ တမၢၼ်ႇၵၢင်ႁၢဝ် ထႃႇဝရႃႉၽြႃးလဝ်ႊထၢမ်လႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းယင်းဢမ်ႇ ဢဵတ်းလူဝဵင်းယေႇရူႉသလႅမ်ႇ ဢိၵ်ႇတင်းဝဵင်းယူႉတႃႉတင်းလၢႆ ဢၼ်ၸဝ်ႈႁဝ်း ၸႂ်မႆႈၶႆႈၸႃႉ တေႃႇၸဵတ်းသိပ်းပီႊတဵမ်တဵမ်ၼၼ်ႉလႄႈ တၵ်းယူႇၶိင်ႇၵႃႇလႃႉ ႁိုင်ၵႃႈႁိုဝ်တီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 13ထႃႇဝရႃႉၽြႃးဢဝ်တင်းၵႂၢမ်းဢၼ်လီ၊ ၵႂၢမ်းဢၼ်ႁႂ်ႈထုၵ်ႇၸႂ်ၵျိူၵ်ႈၸႂ်ၼၼ်ႉ ၶိုၼ်းလၢတ်ႈတမၢၼ်ႇၵၢင်ႁၢဝ် ဢၼ်လၢတ်ႈတေႃႇၵၼ်တင်းၵဝ် ၼၼ်ႉဢေႃႈ။- 14တမၢၼ်ႇၵၢင်ႁၢဝ် ဢၼ်လၢတ်ႈတေႃႇၵၼ်တင်းၵဝ်ၼၼ်ႉၵေႃႈ လၢတ်ႈတီႈၵဝ်လႄႈဝႃႈ၊ မႂ်းႁွင်ႉမွၵ်ႇႁွင်ႉလၢတ်ႈလႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉၸမ်ႉ၊ ၵဝ်မီးၸႂ်ဢၼ်ႁၵ်ႉပႅင်းၶႅၼ်ဝႆႉ ႁႅင်းယႂ်ႇၼႃႇလူင်လၢင်သေလႄႈ ႁၵ်ႉပႅင်းၶႅၼ်ဝႆႉ ပုၼ်ႈဝဵင်းယေႇရူႉသလႅမ်ႇ ဢိၵ်ႇတင်းလွႆၸီႉဢုၼ်ႇဢေႃႈ။- 15ၵဝ်ၸႂ်မႆႈၶႆႈၸႃႉတေႃႇ ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ယူႇၼိမ်ၼိမ်လီလီၸိူဝ်းၼၼ်ႉ ၼႃႇလူင်လၢင်ဢေႃႈ။ လွင်ႈမၼ်းၸမ်ႉ မိူဝ်ႈဢၼ်ၵဝ်ၸႂ်မႆႈၶႆႈၸႃႉတေႃႇ ဢိတ်းၼိုင်ႈၼၼ်ႉၸိုင်၊ ၶဝ်ၽွမ်ႉၵၼ် ၼိၵ်ႈၸၢၵ်ႈငႅၼ်းသႄးမၼ်းယဝ်ႉ။- 16ပိူဝ်ႈၼႆလႄႈ ထႃႇဝရႃႉၽြႃး မီးဢမိင်ႉၸမ်ႉ၊ ၵဝ်မီးတင်းၸႂ်ဢၼ်ၶႂ်ႈႁဵတ်းၵျေးၸူးသေလႄႈ ၶိုၼ်းမႃးၸူးၵႃႈတီႈဝဵင်းယေႇရူႉသလႅမ်ႇယဝ်ႉ။ တၵ်းလႆႈတႄႇႁဵတ်းႁိူၼ်းၵဝ် ၵႃႈၼႂ်းဝဵင်းၼႆႉလႄႈ တၵ်းလႆႈဢဝ်ၸိူၵ်ႈ တႅၵ်ႈၶိုပ်ႈၵႃႈၼိူဝ်ဝဵင်းယေႇရူႉသလႅမ်ႇဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ၊ ဝႃႈၼင်ႇၼႆတႃႉ။- 17လႆႈသမ်ႉ မႂ်းႁွင်ႉမွၵ်ႇ၊ႁွင်ႉလၢတ်ႈလႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ဝၢၼ်ႈဝဵင်းၵဝ်ၸိူဝ်းၼၼ်ႉ တၵ်းသတ်ႉ၊တၵ်းတဵမ်ဝႆႉတင်း တၢင်းဢၼ်လႆႈလီလႆႈပဵၼ်ဢေႃႈ။ ထႃႇဝရႃႉၽြႃးတၵ်းႁႂ်ႈလွႆၸီႉဢုၼ်ႇၼၼ်ႉ မီးတၢင်းဢၼ်ပေႇၸႂ် ၼိမ်ၸႂ်လႄႈ မၼ်းၸဝ်ႈတၵ်းလိူၵ်ႈၵဵပ်းဢဝ်လုမ်းလႃးဝဵင်းယေႇရူႉသလႅမ်ႇလူးၵွၼ်ႇ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
ရူႇပႃႇရူင်ႇလူၺ်ႈလွင်ႈၶဝ်လႅမ်
18လႆႈသမ်ႉ ၵဝ်ဢဝ်တႃၵဝ်ႁႅၼ်တူၺ်းလႄႈ ႁၼ်ၶဝ်လႅမ် သီႇလႅမ်ႈဢေႃႈ။- 19ၵဝ်တွင်ႈထၢမ်တီႈတမၢၼ်ႇၵၢင်ႁၢဝ် ဢၼ်လၢတ်ႈတေႃႇၵၼ်တင်းၵဝ်ၼၼ်ႉလႄႈဝႃႈ၊ ဢၼ်ၸိူဝ်းၼႆႉ ၼႆႉၸမ်ႉ၊ ပဵၼ်ၵႃႈသင်၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၶိုၼ်းလၢတ်ႈလႄႈဝႃႈ၊ ဢၼ်ၸိူဝ်းၼႆႉ ပဵၼ်ၶဝ်လႅမ် ဢၼ်ႁႂ်ႈမိူင်းယူႉတႃႉ၊ မိူင်းဢီႉသရေႇလႃႉ၊ ဝဵင်းယေႇရူႉသလႅမ်ႇၸိူဝ်းၼၼ်ႉ ၽၢတ်ႇၽႄၵၼ်ၵႂႃႇ ၵူႈတီႈၵူႈလႅၼ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။- 20ထႃႇဝရႃႉၽြႃးၵေႃႈ ၼႄပျႃးၵူၼ်း ဢၼ်ၸၢင်ႈႁဵတ်း၊မေႃႁဵတ်း သီႇၵေႃႉ တီႈၵဝ်ဢေႃႈ။- 21ၵဝ်ၵေႃႈ လဝ်ႊထၢမ်လႄႈဝႃႈ၊ ၶဝ်ၼႆႉမႃးႁႂ်ႈလႆႈ ႁဵတ်းၵႃႈသင်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းလၢတ်ႈလႄႈဝႃႈ၊ ၶဝ်လႅမ်ၸိူဝ်းၼၼ်ႉ ပဵၼ်ၶဝ်လႅမ် ဢၼ်ႁႂ်ႈၵူၼ်းမိူင်းယူႉတႃႉတင်းလၢႆ ၽၢတ်ႇၽႄၵၼ်ၵႂႃႇ ထၼ်ႈပေႃး ၽူႈလႂ်ဢမ်ႇႁတ်းငွၵ်ႈႁူဝ်၊ႁႅၼ်ႁူဝ်တူၺ်းဢေႃႈ။ ၵူၼ်းၸိူဝ်းၼႆႉၸမ်ႉ၊ ပဵၼ်ၵေႃႉဢၼ်မႃးႁႂ်ႈလႆႈ လွၵ်ႇငိုတ်ႈၶဝ်ၼၼ်ႉလႄႈ ၶျႃးၶဝ်လႅမ်ၵူၼ်း တၢင်ႇၸိူဝ်ႉတၢင်ႇၶိူဝ်း ဢၼ်ပတ်ႉသၢႆႇ တိုၵ်းတေႃးမိူင်းယူႉတႃႉ ႁႂ်ႈၽၢတ်ႇၽႄၵၼ်ၵႂႃႇ ၸိူဝ်းၼၼ်ႉ တူၵ်းတီႈတႅမ်ႇပႅတ်ႈဢေႃႈ၊ ဝႃႈၼင်ႇၼႆဢေႃႈ။
Valið núna:
ၸႃႇၶရီႉ 1: CBMS
Áherslumerki
Deildu
Afrita
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship