ႁပၵ်ႉၵုၵ်ႉ 3
3
ၵႂၢမ်းသူးတွင်းႁပၵ်ႉၵုၵ်ႉ
1ၵႂၢမ်းပထၼႃႇ ပရေႃးၽႅတ်ႈ ႁပၵ်ႉၵုၵ်ႉ ဢၼ်ဢိင်ၸွမ်း သဵင်ၶိုၼ်ႈသဵင်လူင်း သီႉၵျေႃးၼူတ်ႈၼၼ်ႉၸမ်ႉ၊- 2ထႃႇဝရႃႉၽြႃးတီႈၶႃႈ၊ ၶႃႈၸဝ်ႈ လႆႈငိၼ်းသဵင်ပျႃႇတိၵ်ႈၸဝ်ႈႁဝ်းလႄႈ ၵူဝ်ႁႄတီႈၶႃႈယဝ်ႉ။ ထႃႇဝရႃႉၽြႃး တီႈၶႃႈ၊ ၶႅၼ်းတေႃႈ မႄးၵုမ်းမႄးႁဵတ်းဢမူႉၸဝ်ႈႁဝ်း ၵႃႈၼႂ်းၶူပ်ႇပီႊၸိူဝ်းၼႆႉ သေၵမ်းတီႈၶႃႈ၊ ႁႂ်ႈလႆႈႁူႉလႆႈႁၼ် ၵႃႈၼႂ်းၶူပ်ႇပီႊၸိူဝ်းၼႆႉ သေၵမ်းတီႈၶႃႈ၊ ပိၵ်ႉသမ်ႉ တၢင်းၸႂ်မႆႈၶႆႈၸႃႉၸဝ်ႈႁဝ်း ဢွၵ်ႇသေၵေႃႈ၊ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်း ၵရူႉၼႃႇတြႃး သေၵမ်းတီႈၶႃႈ၊- 3ၽြႃးပဵၼ်ၸဝ်ႈ လုၵ်ႉသေၵႃႈတီႈဝဵင်းတေႇမၢၼ်ႇ၊ ၽြႃးဢၼ်မူတ်းၸၢင်ႇၼၼ်ႉ လုၵ်ႉသေၵႃႈတီႈလွႆပႃႇရၼ်ႇ မႃးဢေႃႈ။ ၸေးလႃႇ။ မုၼ်ၽုင်းမၼ်းၸဝ်ႈ ႁူမ်ႇသုမ်ႇၽႃႉၵၢင်ႁၢဝ်လႄႈ လိၼ်မိူင်းပျေႉၸုမ်ႇတဵမ်ဝႆႉတင်း ၵုင်ႇသရေႇမၼ်းၸဝ်ႈဢေႃႈ။- 4ႁၢင်ႈၽၢင်ငဝ်းဢရွင်ႇမၼ်းၸဝ်ႈ မိူၼ်ၸိူဝ်ႉၼင်ႇ ငဝ်းဢရွင်ႇၵၢင်ဝၼ်းလႄႈ သၢႆဢရွင်ႇဢွၵ်ႇသေၵႃႈတီႈမိုဝ်းမၼ်းၸဝ်ႈလႄႈ ၵႃႈတီႈၼၼ်ႈ ပဵၼ်တီႈဢၼ် မုၼ်ၽုင်းဢႃႇၼူႉၽေႃႇမၼ်းၸဝ်ႈ တဵတ်ႇလပ်ႉယူႇဢေႃႈ။- 5ၽေးၵႃႇလႃႉႁႃႈလႅင်မိူင်း ၵႂႃႇဢွၼ်တၢင်းမၼ်းၸဝ်ႈလႄႈ ၽေးဢၼ်မႆႈဢၼ်ႁွၼ်ႉ လွမ်ႉလဵပ်ႈႁွပ်ႈတိၼ်မၼ်းၸဝ်ႈယူႇဢေႃႈ။- 6မၼ်းၸဝ်ႈၸုၵ်းယူႇလႄႈ ႁႂ်ႈလိၼ်မိူင်းတူင်ႉၼိုင်ယူႇဢေႃႈ။ မၼ်းၸဝ်ႈလူတူၺ်းလႄႈ ႁႂ်ႈၵူၼ်းၵူႈၸိူဝ်ႉၵူႈမဵဝ်း သၼ်ႇသၼ်ႇသၢႆသၢႆယူႇဢေႃႈ။ လွႆဢၼ်တႄႇယူႇတႃႇသေႇ မၼ်ႈၶိူင်ႇၸိူဝ်းၼၼ်ႉ ႁၵ်းႁဵၵ်းတႅၵ်ႇလႅဝ်ၵႂႃႇလႄႈ သၼ်ၵုင်းထႃႇဝရႃႉၸိူဝ်းၼၼ်ႉ ဢွၼ်ၵၼ်ၼူပ်ႈတူၵ်းၵွမ်းတူၵ်းဢေႃႈ။ သဵၼ်ႈတၢင်းဢၼ်မၼ်းၸဝ်ႈၵႂႃႇၼၼ်ႉ မီးဝႆႉၸဵမ်မိူဝ်ႈမိုၼ်ႉၸိုၼ်ႉသိုၼ်းၼၼ်ႉဢေႃႈ။- 7ၵဝ်လႆႈႁၼ် တၢင်းဢၼ်မူဝ်းၵႃႇ ၵႃႈၼႂ်းမိူင်းၵူႉသၢၼ်ႇၸိူဝ်းၼၼ်ႉ ၶၢမ်ႇတုၵ်ႉၶႃႉတၢင်းၽၢၼ် ဢိၵ်ႇတင်းတၢင်းဢၼ် ၽႃႈၵင်ႈၵႃႈၼႂ်းမိူင်းမီႉတျၼ်ႇၸိူဝ်းၼၼ်ႉ သၼ်ႇသၼ်ႇသၢႆသၢႆ ယူႇၼၼ်ႉဢေႃႈ။- 8ထႃႇဝရႃႉၽြႃးတီႈၶႃႈ၊ ၽႆးတၢင်းၸႂ်မႆႈၶႆႈၸႃႉၸဝ်ႈႁဝ်း ႁုပ်ႇမႆႈၵႃႈတီႈၼမ်ႉႁွင်ႈၼမ်ႉၵႄးတင်းလၢႆယူႇ၊ ၸဝ်ႈႁဝ်းႁဵတ်းရၢၼ်ႇ တၢင်းၽိတ်းသႂ်ႇပၢင်ႇလၢႆႇယူႇ၊ ႁႂ်ႈၸဝ်ႈႁဝ်း လႆႈၶီႇမႃႉၸဝ်ႈႁဝ်း လေႃႉရထႃးၸဝ်ႈႁဝ်း၊ တၢင်းဢၼ်ၵႄႇသႄႇၶျွတ်ႈဢဝ်ၼၼ်ႉ တီႈၶႃႈႁိုဝ်။- 9လၢၵ်ႈၼၢၵ်ႈၵၢင်ႇၸဝ်ႈႁဝ်းၼၼ်ႉ လႆႈၶၢမ်ႇတၢင်းဢၼ်ဢဝ်ဢွၵ်ႇၼႄပျႃးလႄႈ ၵတီႉသဵတ်ႈၸႃႇဢၼ်ၸဝ်ႈႁဝ်းဝႆႉတီႈ မဵဝ်းၵူႈမဵဝ်းၸိူဝ်းၼၼ်ႉ ပဵၼ်ဢၼ်မၼ်ႈၶိူင်ႇတီႈၶႃႈဢေႃႈ။ ၸဝ်ႈႁဝ်းၽၼ်းၽႃႇလိၼ်မိူင်း ႁႂ်ႈၼမ်ႉႁွင်ႈၼမ်ႉၵႄးလႂ် ပဵၼ်မႃးတီႈၶႃႈဢေႃႈ။- 10လွႆတင်းလၢႆႁၼ်ၸဝ်ႈႁဝ်းလႄႈ ဢွၼ်ၵၼ်သၼ်ႇဝႆၶွၼ်းၶဝ်ႇယူႇတီႈၶႃႈဢေႃႈ။ ၼမ်ႉဢၼ်ထူမ်ႈၼၼ်ႉ သုမ်ႇႁူမ်ႇတီႈၶႃႈဢေႃႈ။ တီႈဢၼ်လမ်ႇၼမ်ႉပၢင်ႇလၢႆႇ သႅၼ်ႇႁွင်ႉလႄႈ ယုၵ်ႉမိုဝ်းမၼ်းၶိုၼ်ႈၵႃႈၼိူဝ်တီႈၶႃႈဢေႃႈ။- 11ၵၢင်ဝၼ်းဢိၵ်ႇတင်းလိူၼ် ၸုၵ်းၵိုတ်းယူႇ ၵႃႈၼႂ်းတီႈဢၼ်ၶဝ်ယူႇၼၼ်ႉ ၵွပ်ႈပိူဝ်ႈဢၼ်လႅင်း ပိုၼ်ၵၢင်ႇၸဝ်ႈႁဝ်း ဢၼ်ၸၢင်ႈၵႂႃႇၸိူဝ်းၼၼ်ႉ ဢိၵ်ႇတင်း ၵွပ်ႈပိူဝ်ႈ သၢႆဢရွင်ႇႁွၵ်ႇၸဝ်ႈႁဝ်းဢၼ်မၢပ်ႈမႅပ်ႈၼၼ်ႉ တီႈၶႃႈဢေႃႈ။- 12ၸဝ်ႈႁဝ်းပႃးတင်းၸႂ်မႆႈၶႆႈၸႃႉသေလႄႈ ၶီႇၵႂႃႇၵႃႈၼိူဝ်ၼႃႈလိၼ်မိူင်းတင်းၼႃႈလႄႈ ပႃးတင်းၸႂ်တေႃးသႃႉသေလႄႈ ယဵပ်ႇၼူတ်ႈၵူၼ်း ၵူႈၸိူဝ်ႉၵူႈမဵဝ်း တီႈၶႃႈဢေႃႈ။- 13ၸဝ်ႈႁဝ်းဢွၵ်ႇၵႂႃႇ ႁႂ်ႈလႆႈၵႄႇသႄႇၶျွတ်ႈဢဝ် ၵူၼ်းၸဝ်ႈႁဝ်းတင်းလၢႆ ဢိၵ်ႇတင်းႁႂ်ႈလႆႈ ၵႄႇသႄႇၶျွတ်ႈဢဝ် ၶဝ်ၸိူဝ်းဢၼ် လႆႈၶၢမ်ႇၽိၵ်ႈသိၵ်ႈ တီႈၸဝ်ႈႁဝ်းၼၼ်ႉ တီႈၶႃႈဢေႃႈ။ ၸဝ်ႈႁဝ်းဢဝ်ၵွၵ်းႁူဝ် ၵႃႈၼႂ်းႁိူၼ်းၵူၼ်းႁၢႆႉၵူၼ်းယုတ်ႈသၢၵ်ႇသွင်ႉလႄႈ ပႄႇၽဵဝ်ႈမူႇလႃႉ ငဝ်ႈႁၢၵ်ႈမၼ်းပႅတ်ႈ တေႃႇထိုင်ႁွတ်ႈၶေႃး တီႈၶႃႈဢေႃႈ။ ၸေးလႃႇ။- 14ၸဝ်ႈႁဝ်း ဢဝ်ႁွၵ်ႇမၼ်းၸိူဝ်းၼၼ်ႉ တႅင်းသႂ်ႇၵွၵ်းႁူဝ်ၶုၼ်ပူဝ်ႇမၼ်းတင်းလၢႆ ပွင်ႇပဵဝ်ၵႂႃႇတီႈၶႃႈဢေႃႈ။ ၶဝ်ၼၼ်ႉ ဢွၼ်ၵၼ်ပတ်ႉထူဝ်းမႃး မိူၼ်ၸိူဝ်ႉၼင်ႇ ၽူၼ်လူင်လူမ်းလူင်ၼၼ်ႉ ႁႂ်ႈၶႃႈၸဝ်ႈႁဝ်းၶဝ် ၽူင်ႉၵႂႃႇပိဝ်ၵႂႃႇ တီႈၶႃႈဢေႃႈ။ တၢင်းဢၼ်ၶဝ်ၸူမ်းသိူဝ်း ပဵၼ်မိူၼ်ၼင်ႇႁၢင်ႈၶဝ် မီးတၢင်းၵျၢမ်ႇတၢင်းပွင် ဢၼ်တၵ်းတဵတ်ႇတဵတ်ႇၶူပ်းၵိၼ်ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉ တီႈၶႃႈဢေႃႈ။- 15ၸဝ်ႈႁဝ်းၶီႇမႃႉၸဝ်ႈႁဝ်းၸိူဝ်းၼၼ်ႉသေလႄႈ ၵႂႃႇၵႃႈၼႂ်းၵၢင်ၼမ်ႉပၢင်ႇလၢႆႇ တီႈဢၼ်မေႃးလင်ယူႇႁိုင်းႁိုင်းၼၼ်ႉ တီႈၶႃႈဢေႃႈ။- 16ၶႃႈၸဝ်ႈငိၼ်းပျႃႇတိၵ်ႈၸဝ်ႈၼၼ်ႉလႄႈ ၵႃႈၼႂ်းႁူဝ်ဢူၵ်းမီးတၢင်းဢၼ်သၢၵ်ႇယူႇ၊ သီႇသူပ်းၶႃႈၸဝ်ႈတူင်ႉယွပ်ႇယူႇ၊ တၢင်းဢၼ်ၽင်ႉဢၼ်ဢူႉၶဝ် ၵႃႈၼႂ်းလုပ်ႇၶႃႈၸဝ်ႈယူႇ၊ ၶႃႈၸဝ်ႈမီးတၢင်းဢၼ် သၼ်ႇသၼ်ႇသၢႆသၢႆတင်းတူဝ်တင်းၶိင်းယူႇတီႈၶႃႈဢေႃႈ။ လွင်ႈမၼ်းၸမ်ႉ ၵဝ်တၵ်းလႆႈယူႇၼိမ်ၼိမ်လီလီ ၼႂ်းမိုဝ်ႉဝၼ်းဢၼ် ၽေးႁွတ်ႈထိုင်၊ ဝၼ်းဢၼ်ၵေႃႉဢၼ် ယႃႉပႅတ်ႈၼၼ်ႉ တၵ်းႁဵတ်းမုၵ်ႉႁဵတ်းၸိူဝ်း သေလႄႈ ၶီႇမႃးတိုၵ်းတေႃးၵူၼ်းတင်းလၢႆ ၼၼ်ႉဢေႃႈ။- 17ပိၵ်ႉသမ်ႉတူၼ်ႈမၢၵ်ႇလိူဝ်ႇသၢင်းၽေႃး ဢမ်ႇလႆႈမွၵ်ႇလႆႈၵီႈ၊ ဢမ်ႇလႆႈမီးတိၼ်ႇ မီးမၢၵ်ႇတီႈတူၼ်ႈ ၶိူဝ်းမၢၵ်ႇၸပိတ်ႈ၊ တၢင်းဢၼ်တူၼ်ႈ သၢၼ်ႇလုၼ်ႇ သၢင်ႈႁဵတ်းၼၼ်ႉ ထၢတ်ႇၵႂႃႇႁၢႆၵႂႃႇ၊ တူင်ႈၼႃးတင်းလၢႆ ဢမ်ႇလႆႈပၼ် မၢၵ်ႇမၼ်းႁူင်းမၼ်း၊ ၽုင်သူဝ်းသဵင်ႈသေ ၵႃႈတီႈၶွၵ်ႈသူဝ်းလႄႈ ၽုင်ဝူဝ်းဢမ်ႇလႆႈမီး ၵႃႈၼႂ်းသိုင်ႇဝူဝ်းသေၵေႃႈ၊- 18ၵဝ်တၵ်းၸူမ်းပျေႃႇယူႇ ၵႃႈၼႂ်းထႃႇဝရႃႉၽြႃး လႄႈ သႂၢင်ႇသိူဝ်းယူႇ ၵႃႈၼႂ်းၽြႃးပဵၼ်ၸဝ်ႈ ဢၼ်ၵႄႇသႄႇၶျွတ်ႈဢဝ်ၵဝ်ၼၼ်ႉဢေႃႈ။- 19ၸဝ်ႈထႃႇဝရႃႉၽြႃး ပဵၼ်တၢင်းၵတ်ႉတၢင်းၶၼ်ၵဝ်လႄႈ မၼ်းၸဝ်ႈတၵ်းႁႂ်ႈ တိၼ်ၵဝ်ပဵၼ်ၸိူဝ်ႉၼင်ႇၵႂၢင် ၼင်ႇယီးၼၼ်ႉသေလႄႈ တၵ်းႁႂ်ႈၵဝ်ၵႂႃႇမႃးယူႇ ၵႃႈၼိူဝ်ထႃႇၼႃႉ တီႈသုင်ၵဝ်တင်းလၢႆ ဢေႃႈ။ ဢၼ်ၼႆႉပဵၼ်ပုၼ်ႈ ၵေႃႉဢၼ်ပဵၼ်ၵႄႇပဵၼ်ႁူဝ် ၶိူင်ႈပိူင်တူႇရီႉယႃႇၵဝ်ၼၼ်ႉဢေႃႈ။
ၵျၢမ်ႇဢၼႃႇၵၢတ်ႈတီႉႁပၵ်ႉၵုၵ်ႉယဝ်ႉယဝ်ႉဢေႃႈ။
Valið núna:
ႁပၵ်ႉၵုၵ်ႉ 3: CBMS
Áherslumerki
Deildu
Afrita
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship