Mapookyony 29
29
Yakobo Afika Kyeny kwa Laban
1Naasa Yakobo kawara shia yakwe, kandefika kulya urukeny lwa vandu va taari ya ngaminy. 2Ekifika-u kalollya kirori kya mura kyikee ando a imungony, na maronda araru a moonri alele kufii nakyo, mashika yoo ng'u ando maronda a findo aniyyaa, na yoo kaniny kya kirori kilya kukakaa-u iwe iniini. 3Maronda moose ng'u ando ashaa, na vakashebirimita-u iwe llya vakaniinga maronda awo mura, numa vakaviira iwe llya ando a vayo-se. 4Yakobo kavesa vandu valya, “Nyira vana va ma, a mmbo mukee vandu va kwi?” Vakammbia, “Yese llukee vandu va Haran.” 5Kavavesa, “A ndesa mwiishi Laban, mwana wa Nahori?” Vakammbia, “Lumwiishi.” 6Kavavesa-se, “A eefo inda?” Vakammbia, “Eefo nisha, na Raheli mfu wakwe eefo ashaa na moonri.” 7Kaamba, “Lola ulaalu ni nsanyiny, nta nshi kyeeri kya yuummbya findo-fo, tiniingeny mura, mundetiisa,” 8Vandu valya vakaamba, llushidimaa indo-fo, nkuti mbele luummbye maronda moose, numa vandu vabirimite iwe llya yoo kiroriny, llyo luniingeny moonri mura.
9Eereraa indo Raheli nawe kasha na moonri a ndeye, mashika mmbwe aesaa. 10Naasa llya Yakobo alelollya Reheli mwana wa Laban, mwana-maye wa maye, na moonri a Laban, mwana-maye wa maye, Yakobo kasembeya kufii, kabirimita iwe llya lyuuke alya kaniny kya kirori, kaniinga moonri a Laban mura.
11Yakobo kamiminda Reheli, kaonisa unyanga kaiya. 12Yakobo kavia Reheli sheelyi we ni mfyari wa ndeye, sheelyi we ni mwana wa Rebeka. Naasa kaangusya kandevia ndeye mbony eto. 13Naasa elyi Laban amiita mbony ta Yakobo, mwana wa mfwa-maye kaangusya yeenda imwaammbya. Kankulyingillya kammiminda, kamweende kyeny. Nawe koongoya Laban mbony toose. 14Laban kammbia, “Dede yewe mmbo kukee ifua lyakwa na nyama yakwa.” Nawe kakaa kwakwe ando a mwiiri umwi sele.
Yakobo Arunndya Laban kya Vaka Vakwe
15Laban kavia Yakobo, “Mashika elyi da kukee mfyari wakwa kushirundye ruu?” Shivia weesi lwafo mmbo lushevaa kyi? 16Laban mmbo eetiri vana va kyika vavii, irina lyeeto nniini ni Lea na irina lyeeto n-du ni Raheli. 17Lea we miso akwe ekee mafwafwa, kyeendi Raheli we etiri yuumba isha, kasennya miso deny. 18Yakobo kakunda Raheli, kaamba, “Mmbo shikurundyaa ando a myaaka mfungare shiwonise Reheli, mwana yeto wafo n-du.” 19Laban kammbia, nkisha shikuniinge yewe ngeta nndu ungyi; 20Yakobo kandunndya myaaka mfungare naambo nawonise Raheli. Nayo kailollya nsha mikonu myaangu-da, ni elyi enkunndye nnu.
21Yakobo kavia Laban, “Shiniinga nka wakwa mashika mikonu yakwa yamiinana shiike nawe.” 22Laban kaumbya vandu va kulya woose kavika ifura iniini. 23Naasa kyeeri kya nkwaany kaipoo Lea, mfu wakwe, kamweengye Yakobo, nawe kakaa nawe. 24Laban kaniingya Lea kishinga kyakwe Silpa nandunndye. 25Naasa llya kulekya, ate ni Lea. Kavia Laban, “nkyoki ekyi kuleshitannya?” 26Shilekurundya-se shionise Raheli? Nkyiki elyi kwashilemba? Laban kammbia, “Nshi-ndo kivee kunu kweru-fo, yoorisa yeto n-du nasongoye yeto nniini-fo; 27Irisha isye mikonu mfungare, neese lukuningye yeu nawe kushirundye lyingyi myaaka ingyi mfungare.”
28Yakobo katana indo, kamaa mikonu mfungare. Kanningya-se Raheli nave nka wakwe. 29Laban kaniingya Raheli kishinga kilya kyakwe Bilha nandunndye. 30Kakaa na Raheli nawe kakunda Raheli ngota Lea, karunda ando a myaaka ingyi mfungare kimaruma kyakwe.
31Nndumi Iruva akilollya Lea nnyalekundwa, nawe kansimba vana, lyo Raheli nyekee kyuumba.
Vana va Yakobo
32Lea kakufinga kaira mwana kammbaanga Ruben, ni llya aleamba, mashika Nndumi Iruva allollya ngatara yakwa; ulaalu mmi wakwa asheshikundaa. 33Kakufinga-se, kaira mwana kaamba, “Mashika llya Nndumi Iruva aleita nshikee nkunde-fo.” Llyo kashisimba-se yeu, irina lyakwe kammbaanga Simion. 34Kakufinga-se kaira mwana, kaamba, “Ulaalu mmi wakwa ashesanga neeny, mashika elyi shamwiirya vana vararu.” Irina lyakwe kammbaanga Levi. 35Kakufinga-se kaira mwana kaamba, “Tura yei nshearafumaa Nndumi Iruva” Irina lyakwe kammbaanga Yuda; kamanda iira vana.
Valið núna:
Mapookyony 29: MAS2
Áherslumerki
Deildu
Afrita
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
Mapookyony 29
29
Yakobo Afika Kyeny kwa Laban
1Naasa Yakobo kawara shia yakwe, kandefika kulya urukeny lwa vandu va taari ya ngaminy. 2Ekifika-u kalollya kirori kya mura kyikee ando a imungony, na maronda araru a moonri alele kufii nakyo, mashika yoo ng'u ando maronda a findo aniyyaa, na yoo kaniny kya kirori kilya kukakaa-u iwe iniini. 3Maronda moose ng'u ando ashaa, na vakashebirimita-u iwe llya vakaniinga maronda awo mura, numa vakaviira iwe llya ando a vayo-se. 4Yakobo kavesa vandu valya, “Nyira vana va ma, a mmbo mukee vandu va kwi?” Vakammbia, “Yese llukee vandu va Haran.” 5Kavavesa, “A ndesa mwiishi Laban, mwana wa Nahori?” Vakammbia, “Lumwiishi.” 6Kavavesa-se, “A eefo inda?” Vakammbia, “Eefo nisha, na Raheli mfu wakwe eefo ashaa na moonri.” 7Kaamba, “Lola ulaalu ni nsanyiny, nta nshi kyeeri kya yuummbya findo-fo, tiniingeny mura, mundetiisa,” 8Vandu valya vakaamba, llushidimaa indo-fo, nkuti mbele luummbye maronda moose, numa vandu vabirimite iwe llya yoo kiroriny, llyo luniingeny moonri mura.
9Eereraa indo Raheli nawe kasha na moonri a ndeye, mashika mmbwe aesaa. 10Naasa llya Yakobo alelollya Reheli mwana wa Laban, mwana-maye wa maye, na moonri a Laban, mwana-maye wa maye, Yakobo kasembeya kufii, kabirimita iwe llya lyuuke alya kaniny kya kirori, kaniinga moonri a Laban mura.
11Yakobo kamiminda Reheli, kaonisa unyanga kaiya. 12Yakobo kavia Reheli sheelyi we ni mfyari wa ndeye, sheelyi we ni mwana wa Rebeka. Naasa kaangusya kandevia ndeye mbony eto. 13Naasa elyi Laban amiita mbony ta Yakobo, mwana wa mfwa-maye kaangusya yeenda imwaammbya. Kankulyingillya kammiminda, kamweende kyeny. Nawe koongoya Laban mbony toose. 14Laban kammbia, “Dede yewe mmbo kukee ifua lyakwa na nyama yakwa.” Nawe kakaa kwakwe ando a mwiiri umwi sele.
Yakobo Arunndya Laban kya Vaka Vakwe
15Laban kavia Yakobo, “Mashika elyi da kukee mfyari wakwa kushirundye ruu?” Shivia weesi lwafo mmbo lushevaa kyi? 16Laban mmbo eetiri vana va kyika vavii, irina lyeeto nniini ni Lea na irina lyeeto n-du ni Raheli. 17Lea we miso akwe ekee mafwafwa, kyeendi Raheli we etiri yuumba isha, kasennya miso deny. 18Yakobo kakunda Raheli, kaamba, “Mmbo shikurundyaa ando a myaaka mfungare shiwonise Reheli, mwana yeto wafo n-du.” 19Laban kammbia, nkisha shikuniinge yewe ngeta nndu ungyi; 20Yakobo kandunndya myaaka mfungare naambo nawonise Raheli. Nayo kailollya nsha mikonu myaangu-da, ni elyi enkunndye nnu.
21Yakobo kavia Laban, “Shiniinga nka wakwa mashika mikonu yakwa yamiinana shiike nawe.” 22Laban kaumbya vandu va kulya woose kavika ifura iniini. 23Naasa kyeeri kya nkwaany kaipoo Lea, mfu wakwe, kamweengye Yakobo, nawe kakaa nawe. 24Laban kaniingya Lea kishinga kyakwe Silpa nandunndye. 25Naasa llya kulekya, ate ni Lea. Kavia Laban, “nkyoki ekyi kuleshitannya?” 26Shilekurundya-se shionise Raheli? Nkyiki elyi kwashilemba? Laban kammbia, “Nshi-ndo kivee kunu kweru-fo, yoorisa yeto n-du nasongoye yeto nniini-fo; 27Irisha isye mikonu mfungare, neese lukuningye yeu nawe kushirundye lyingyi myaaka ingyi mfungare.”
28Yakobo katana indo, kamaa mikonu mfungare. Kanningya-se Raheli nave nka wakwe. 29Laban kaniingya Raheli kishinga kilya kyakwe Bilha nandunndye. 30Kakaa na Raheli nawe kakunda Raheli ngota Lea, karunda ando a myaaka ingyi mfungare kimaruma kyakwe.
31Nndumi Iruva akilollya Lea nnyalekundwa, nawe kansimba vana, lyo Raheli nyekee kyuumba.
Vana va Yakobo
32Lea kakufinga kaira mwana kammbaanga Ruben, ni llya aleamba, mashika Nndumi Iruva allollya ngatara yakwa; ulaalu mmi wakwa asheshikundaa. 33Kakufinga-se, kaira mwana kaamba, “Mashika llya Nndumi Iruva aleita nshikee nkunde-fo.” Llyo kashisimba-se yeu, irina lyakwe kammbaanga Simion. 34Kakufinga-se kaira mwana, kaamba, “Ulaalu mmi wakwa ashesanga neeny, mashika elyi shamwiirya vana vararu.” Irina lyakwe kammbaanga Levi. 35Kakufinga-se kaira mwana kaamba, “Tura yei nshearafumaa Nndumi Iruva” Irina lyakwe kammbaanga Yuda; kamanda iira vana.
Valið núna:
:
Áherslumerki
Deildu
Afrita
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.