Marko 13
13
Etilimua ꞉Yeso arata kenya e nkaji e Nkai
(Matayo 24:1–2; Luka 21:5–6)
1Kore eipung'uto Yeso taatua nkaji e Nkai, nejoki ꞉lobo loo looiteng'eni lenyena, <<Laiteng'enani, ng'ura kulo soito kutuaa le nking'asia o kuna ajijik kutuaa e nking'asia!>>
2Nejoki ꞉Yeso ninye, <<Idolita kuna ajijik pooki kutuaa e nking'asia, meatae hoo soit obo oitelekino likae oing'uari eitu edotori katukul.>>
Mbaa naaitodolu aajo ketaa kechukunyie Yeso
(Matayo 24:3–14; Luka 21:7–19)
3Kore ewuon Yeso to Lowua loo Lng'erriyio aitalang'akinere nkaji e Nkai, neiparichiere ꞉Petero o Yakobo o Yoana o Andirea ninye, aa ninche aapeny aajoki, 4<<Tiliki iyioo nkata naasai kuna baa! Naa nyo nkitodolunoto naitodolu ajo keitabari kuna pooki?>>
5Neng'asu ꞉Yeso airorie ninche ajoki, <<Errita ate pee meata ltung'ani oitopong'oo ntae. 6Amu kepuonu lkumo ta nkarna ai ejo, <Nanu ilo lianyutata> neitopong'oo lkumo. 7Naa kore tinining'ning larrabali o lomon laa larrabali, emiguretu. Amu meatae ajo mepuku kuna kake ewuon ake eng'or nkiting'oto. 8Keinyuototo locho arare likae ocho, nera nkitoria o nkae nkitoria, nepuku nkikirikiroto e nkop too ng'ojitin kumo, nepuku sii lameii. Kore kuna, naa ng'asunoto e mion e saisai.
9 #
Mat 10:17–20; Luka 12:11,12 <<Errita ate! Amu keichoori ntae meiguanareki, neidong'i ntae taatua Sinagogini. Nintachoo tekue laitoriak o lkinkii tankaraki nanu, pee itumtum aaitai limunoto ee nenia naaipirita nanu tekue ninche. 10Kake kore ang'as, meata ajo melikini loreren pooki Lomon Supati. 11Naa teneibung'i ntae, neichoori meiguanareki ntae, emiurie ewuon eng'or aajo nyo ijoijo. Kake kore ilo rerei oichori ntae inia kata, entejo amu mara ntae oiro kake Ltau Sinyati. 12Keichooyo ꞉lalache likae alache metari metua, neichooyo ꞉menye nkerai, neiwuatuwuatakino ꞉nkera ntoiwuo to ngoro, neichooyo ninche metari metuata. 13#Mat 10:22Naa keibai ntae ltung'ana pooki tankaraki nkarna ai. Kake kore long'iri metabaki nkiting'oto, neitejeuni.
14 #
Dan 9:27, 11:31, 12:11 <<Enchoo laisomani ening'u ana: kore tinidoldol inia taboi nayau mutai eitache to ng'oji nemeichiaakino, enchoo lolo ootii Yudea eisigaki lowuan. 15#Luka 17:31Kore ilo otii nkeper e nkaji emincho edou alotu aya ntoki natii atua nkaji enye. 16Naa kore ilo otii atua lchampa, emincho errinyunyie aya nkila enye. 17Oi siake nenia naatunutete o naaitanakicho tee nenia perot! 18Entoomon pee mebau kuna baa ta ng'amata e nkijepe. 19#Dan 12:1; Mbo 7:14Amu kore kenya nenia perot, naa kelotu sina kitok, ilo leitu aikata edoli ang'asu inia kata naitibira Nkai nkop o taata, nemeitoki apuku aitoki. 20Naa kore teneitu eitodorrop ꞉Laitoriani nenia perot, meatae ltung'ani hoo obo oitejeuni. Kake kore tankaraki loogeluno lenyena, ootegelua ꞉ninye, neitodorrop ꞉ninye nenia perot. 21Naa kore kenya inia kata tinikijoki ꞉ltung'ani, <Ng'ura, lele Kristo, ilo Aitejeunoni lianyutata!> anaa <Ng'ura, ketii ende!> emiiruk inia. 22Amu kepuonu kenya looitaakino Kristo o looitaakino loibonok le Nkai, neitodolu nkitodolunot o mbaa e nking'asia, payie teneidimai, neitopong'oo lgelunot. 23Kake kore naa ntae, errita ate! Amu katilika ntae mbaa pooki ewuon eng'or nkata.
24 #
Isa 13:10; Yoel 2:10,31, 3:15; Mbo 6:12,
Isa 13:10; Ese 32:7 <<Kake kore tee nenia perot, eicha ilo sina,
<nemismisu ndama,
nemeitai lapa wong'an enye,
25 #
Isa 34:4; Mbo 6:13,
Yoel 2:10
nesulunye lakir to loing'ang'e,
neikirikirieki ngolon ee ntokitin naatii loing'ang'e.>
26 #
Dan 7:13; Mbo 1:7 <<Naa kore inia kata, nedoluni Nkerai e Ltung'ani elotu taatua nkidisin to ngolon kitok o nkitoo. 27Neirruaaya lmalaikani lenyena, naa keiturrurru lgelunot too lubot ong'uan e nkop, ang'asu te nkiting'oto e nkop metebaki nkiting'oto e chumata.
Nkata nalotu Nkerai e Ltung'ani
(Matayo 24:32–36; Luka 21:29–36)
28<<Enteyielo te nkitanyanyukoto e lng'aboli nchere kore payie eyuk ntilita ee sura nebulu mbene, naa etinyikua ng'amata e lari. 29Naaku naa, kore tinidoldol sii ntae kuna baa easai, enteyielo aajo etinyikua ninye nkutuk e ltim. 30Kedede kajoki ntae, meichunye naa ltung'ana le ana pukunoto eitu ang'as easai kuna baa. 31Kore keper o nkop naa keichunye, kake meichunye rereii lainien. 32#Mat 24:36Kore kenya inia parri#13:32 Kore inia parri naa nkata nalotu Laitoriani. anaa inia kata naa meata hooyia loyielo. Meyielo abaki ꞉lmalaikani le chumata anaa sii Nkerai, mara ake Papa apeny. 33Errita ate nirripichocho, amu miyielolo aajo anu ebau inia kata. 34#Luka 12:36–38Kore kenya inia kata naa nchi etuwuana ltung'ani olo nkae kop, neing'uaa nkang enye, neing'uaki laisiaayiak lenyena nkitoria, eoriki pooki ng'ae ramat enye, neitanap larriponi lo ltim metirripicho. 35Entirripicho naa, amu miyielolo nkata nalotu lopeny nkang, tanaa teipa, tanaa kiji kuarie, tanaa teneiru lkoko, tanaa tasiran, 36pee mejo ake pang, neirrachu ntae ilurara. 37Kore ana najokita ntae naa kajoki ltung'ana pooki, <Entirripicho!> >>
Valið núna:
Marko 13: saq
Áherslumerki
Deildu
Afrita
Want to have your highlights saved across all your devices? Sign up or sign in
© 2021, Bible Translation and Literacy