Nut Kaka 3
3
Arpris m'er arm'ertu a Livai
(Livai 10:1-7)
1V'nen laha iv'i v'nen a Musis m'ei a Erun arulul ani, naran a Mlin Eia iv'ana m'ei a Musis arna ptha a Sainai. 2#Nut Kaka 26:60.Arm'ertu laha, arulul a nahar, avv'i a natn a Erun: a Netap, iv'i titiamu, sarei, Apihu, a Eliesa, m'ei a Iv'amar. 3Arulul a nahar, avv'i a natn a Erun, avv'i pris, la atvisen ueil aranar ha. Avv'i m'ertu a Musis itau an a Mlin Eia, a ti apavan parei na pris. 4#Livai 10:1,2; Nut Kaka 26:61.A Netap m'ei Apihu avv'i m'ertu atrm'a sarei, naran artvan nap' uraur arna nahn a Mlin Eia arna nut kaka a Sainai, a natr ihei. Inap'i lera, a Eliesa m'ei a Iv'amar aran parei na pris asn a Erun, iv'i a tetiar.
5Laha, a Mlin Eia iv'ana m'ei a Musis, kavr ani, kavr ti a, 6“Pani ti nl nam'elan a Livai apavmima. Sarei, pani ti apavp'tir arna nahn a Erun, iv'i pris, a ti apavv'i m'ertu na m'akarienan. 7Sarei, apavmhmah ani, kavmhmah anr m'ertu udlani, la avlak a nah nmah kanuis na tamatan Atua. Apavan parei na nmah kanuis na tamatan Atua. 8Sarei, apavp'aur si udlani iter a nl nmah kanuis na tamatan Atua, kasr lm'ar arm'ertu a Isrel, a ti apavan parei na nmah kanuis na tamatan Atua. 9Pataur arm'ertu a Livai an a Erun m'er a natn. Asnr arm'ertu a Isrel, arm'ertu na nl nam'elan a Livai apavv'i nkan a Erun, akavan parei uraur. 10Ipanap'i lera, pataui ti a Erun m'er a natn apavan pariar, apavv'i pris. V'eti, ipavr ti m'rau kinkin ipamima, aparpep'ni pr.”
11Sarei, a Mlin Eia iv'ana m'ei a Musis, kavr ani, kavr ti a, 12#Avruh 13:2.“Palei hilaha, Kana prki ntlev'la sarar arm'ertu a Livai asnr arm'ertu a Isrel, inep'a ti avua m'lnar titiamu nakl la iela natenar tav'et a Isrel. Sena si lera, arm'ertu a Livai apavv'i nkak, 13sena ti titiamu nakl avv'i nkak. Arna napn nrpep'nr titiamu nakl arna v'anu a Itsip, ntaui ti titiamu a Isrel nakl, ipavr ti avv'i m'ertu v'aha si slm, apavv'i si p'sp'as nakl, kavv'i nkak. Kana nv'i a Mlin Eia.”
14Sarei, a Mlin Eia iv'ana m'ei a Musis arna nut kaka a Sainai, kavr ani, kavr ti a, 15“Paspanr arm'ertu a Livai, kasapa nl nam'elar a tetiar nakl, arna vamliar. Paspanr ardu udlani apavier nal ipamk, m'er arki udlani apavsiv' nal ipamk.” 16Sarei, a Musis ispanr, inep'a nut a Mlin Eia itvr sarei ani inap'ei, sena ti itv'ana hua sarei m'ei. 17Arm'ertu laha avv'i arm'ertu a Livai, avulul a nahar: a Kersun, a Kuhat, m'ei a Merari. 18Sarei, nahar a natn a Kersun arv'i a Lipni m'ei a Simei. 19Nahar a natn a Kuhat avv'i Amram, a Isehar, a Eprun, m'ei a Usiel. 20Nahar a natn a Merari arv'i a Mali m'ei a Musi. Arm'ertu lera avv'i vamliar arm'ertu a Livai, isapar nl nam'elar a tetiar nakl.
21Arm'ertu a Lipna m'er arm'ertu a Simei avandan asn a Kersun. Arm'ertu lera avv'i nl nam'elan a Kersun. 22Naran atvspan sarar, avla ti ardu la atvier sera nal iamk, m'er arki atvsiv' sera nal iamk ha, avv'i 7,500. 23Laha, avtaui ti arm'ertu a Kersun apavhl nmah kanuisar arna tv'eliel na nmah kanuis na tamatan Atua, arna Is. 24Laha, a Eliasav, iv'i a natn a Lael, iv'i mlin na nl nam'elan a Kersun. 25Lahu, avtu parei anr m'ertu a Kersun, iv'i ti apavp'aur nmah kanuis na tamatan Atua, m'a sei avtukar nmah kanuis nakl, m'a kalik p'arei iv'i liu na nmah kanuis na tamatan Atua, 26m'a kalik p'arei iv'i liu na nut av'aran, m'er kalik p'arei uraur sena nut av'aran, la avmlden nmah kanuis na tamatan Atua m'a tiv' na sakrivais ha, m'er nahau nakl. Avp'aur si lera nakl, kavv'ahur parei lera nakl.
27Arm'ertu Amram, m'er arm'ertu a Isar, m'er arm'ertu a Eprun, m'er arm'ertu a Usiel avandan asn a Kuhat. Arm'ertu lera avv'i nl nam'elan a Kuhat. 28Naran atvspan sarar, avla ti ardu la atvier sera nal iamk, m'er arki atvsiv' sera nal iamk ha, avv'i 8,600. Pariar iv'i ti apavp'aur nutet. 29Laha, avtaui ti arm'ertu a Kersun apavhl nmah kanuisar arna tv'eliel na nmah kanuis na tamatan Atua, arna Saut. 30Laha, a Elisapan, iv'i a natn a Usiel, iv'i mlin na nl nam'elan a Kuhat. 31Laha, pariar iv'i ti apavp'aur pukiset na turanienan Atua, m'a tiv' na nahn Atua, m'a lait aani a kul, m'er tiv' na sakrivais, m'er sei auadei a ti apam'akar m'ei, m'a kalik p'arei. Avp'aur si lera nakl, kavv'ahur parei lera nakl. 32Sarei, a Eliesa, iv'i a natn a Erun (la iv'i pris ha), iv'i mlin lilar mlinar m'ertu a Livai. Iv'i mlinar m'ertu avp'aur nutet nakl.
33Arm'ertu a Mali m'er arm'ertu a Musi avandan asn a Merari. Arm'ertu lera avv'i nl nam'elan a Merari. 34Naran atvspan sarar, avla ti ardu la atvier sera nal iamk, m'er arki atvsiv' sera nal iamk ha, avv'i 6,200. 35Laha, a Suriel, iv'i a natn Apihail, iv'i mlin na nl nam'elan a Merari. Laha, avtaui ti apavhl nmah kanuisar arna tv'eliel na nmah kanuis na tamatan Atua, arna Nut. 36Laha, pariar arm'ertu a Merari iv'i ti apavp'aurr nakal na nmah kanuis na tamatan Atua, m'er nai nen, m'er nakal p'arei nen, m'er sei adren nai a nlr, m'a sei am'akar m'ei. Avp'aur si lera nakl, kavv'ahur parei lera nakl. 37Sarei, avp'aurr nakal p'arei la avmlden nut av'aran na nmah kanuis na tamatan Atua, m'er sei adren nai a nlr, m'er nil, la avuada mamh nahau na nmah kanuis ha, m'er nahau nakl.
38Sarei ml, avtaui ti arm'ertu apavhl nmah kanuisar arna tv'eliel na nmah kanuis na tamatan Atua, arna Is, apavv'i a Musis, a Erun, m'er a natn a Erun. Apavv'i mlin na nutet, kavmhmah anr arm'ertu a Isrel. V'eti ipavr ti m'rau kinkin ipamima, aparpep'ni pr. 39Laha, naran atvspan sarar arm'ertu a Livai, kavulul a nahar vamliar, avla ti ardu la atvier sera nal iamk, m'er arki atvsiv' sera nal iamk ha, avv'i 22,000. Inap'i lera, a Musis m'ei a Erun arspanr inep'a nut a Mlin Eia itvr sarei a ti aparani ipanap'ei.
40Sarei, a Mlin Eia iv'ana m'ei a Musis, kavr ani, kavr ti a, “Paspanr titiamu nar arm'ertu a Isrel udlani. Paspanr ardu atvier sera nal iamk, m'er arki atvsiv' sera nal iamk. Sarei, pulul a nahar. 41Palav'r arm'ertu a Livai apavv'i nkak--Kana nv'i a Mlin Eia--apavua m'lnar titiamu nakl asnr arm'ertu a Isrel. Sarei, palav'r tlv'ar arm'ertu a Livai, apavua m'lnar titiamu nar tlv'a, la avv'i nkar arm'ertu a Isrel ha.” 42Inap'i lera, a Musis ispanr titiamu nar arm'ertu a Isrel, inep'a nut a Mlin Eia itvr sarei ani ti ipani ipanap'ei. 43Laha, naran atvspan sera titiamu nar arm'ertu a Isrel, avla ti ardu la atvier sera nal iamk, m'er arki atvsiv' sera nal iamk ha, avv'i 22,273.
44Sarei, a Mlin Eia iv'ana m'ei a Musis, kavr ani, kavr ti a, 45“Palav'r arm'ertu a Livai apavv'i nkak, apavua m'lnar titiamu nakl asnr arm'ertu a Isrel, kalav'r tlv'ar arm'ertu a Livai, apavua m'lnar titiamu nar tlv'a, la avv'i nkar arm'ertu a Isrel ha. Arm'ertu a Livai apavv'i nkak. Kana nv'i a Mlin Eia. 46Sarei, sena ti titiamu nar arm'ertu a Isrel avsiv'r arm'ertu a Livai, kavnelnal iv'aru, pln inelsaru, pln itl (273) eia nar, pullar ipanap'i laha: 47Palev' sekel ipalm' (10,000 vatu) sanar udlani p'sev', ipav'i sekel na nutet (sekel lera iv'i kera inelru (20)). 48Sarei, patu nav'et lera an a Erun m'er a natn, iv'i sanar titiamu lera, la avsiv'r arm'ertu a Livai naran kspanr ha.” 49Sarei, a Musis ilev' nav'et a ti ipullar arm'ertu a Livai la avua m'lnar arm'ertu a Isrel asn Atua ha. 50Ilev' nav'et lera asnr titiamu nar arm'ertu a Isrel. Nav'et lera iv'i sekel iv'i 1,365 (2,730,000 vatu). Sekel nen iv'i sekel na nutet. 51Sarei, a Musis itu nav'et lera an a Erun m'er a natn, isapa v'nenan a Mlin Eia, iv'i sei a Mlin Eia itvr sarei an a Musis a ti ipani ipanap'ei.
© 2023 Presbyterian Reformed Church of Australia