Nut Kaka 4
4
A natn a Kuhat aparan parei laha
1Laha, a Mlin Eia iv'ana m'ei a Musis m'ei a Erun, kavr anr, kavr ti a, 2“Parlav'r a natn a Kuhat asnr arm'ertu a Livai, karspanr, karulul a nahar vamliar, karsapar nl nam'elar a tetiar nakl. 3Parspanr ardu paiar itneltl (30) sarei, m'er ardu udlani paiar itsiv' ineltl, dav'a ti ipaier inellm' (50)--hir udlani la atvrama sarei sena parei na nmah kanuis na tamatan Atua ha. 4Parei laha nakl iv'i parei a natn a Kuhat apavani arna nmah kanuis na tamatan Atua: 5Naran arm'ertu udlani apavandedp' hir a ti apavv'el, a Erun m'er a natn apavrama, sarei, apavlev'la kalik p'arei itukar pukiset na turanienan Atua, katavkari m'ei. 6Sarei, apavtavkari ml m'a nila p'ak sikau. Sarei ml, apavtu kalik plu aranan (kala uraur ikahei). Sarei, apavtu nai p'arei nen, a ti aparmani. 7Sarei, apavtu kalik plu arna tiv' na nahn Atua. Sarei, apavtaur dis, m'er ssv'en, m'er dis papa, m'er putel, m'a p'ret na nahn Atua aranan. 8Sarei, apavtu kalik m'iel aranan, ipatavkar si udlani lera. Sarei, apavtu nila p'ak sikau aranan, ipatavkar si udlani ml. Sarei, apavtu nai p'arei nen, a ti aparmani.
9Sarei ml, apavlev' kalik plu ipamk ml, katavkar lait aani a kul m'ei, m'er dis papa nen, m'er sei apatr kalik iv'a al ueil m'ei, m'er dis apavrater a nv' ueil, avv'i sei avm'akar m'ei nakl. 10Sarei, apavlav'i, m'er si udlani auadei kam'akar m'ei, kavtavkari m'a nila p'ak sikau. Sarei, apavtaui arna nai lil ipamk, a ti aparmani. 11Sarei, apavtavkar tiv' na sida p'as aali (la aani a kul ha) m'a kalik plu ipamk. Sarei, apavtu nila p'ak sikau aranan, kavtu nai p'arei nen, a ti aparmani. 12Sarei, apavlev' si udlani auadei kam'akar m'ei naran avan parei na nmah kanuis na tamatan Atua, kavtaur al kalik plu ipamk. Sarei, apavtavkarr m'a nila p'ak sikau, kataur arna nai lil ipamk, a ti aparmani. 13Sarei, apavlev'la tih nap' arna tiv' na sakrivais, kavtavkari m'a kalik im'ielm't. 14Sarei ml, apavtu sei auadei kam'akar m'ei aranan--sei aani a kul a ti apal sida p'as a nlr, m'er nai la uk nar iak ha, m'er savel, m'er dis lilil, m'er si uraur nakl am'akar m'ei--kavtavkarr m'a nila p'ak sikau. Sarei, apavtu nai p'arei nen, a ti aparmani.
15Sarei, naran a Erun m'er a natn atvhiris a ti apavtavkar nutet m'er si udlani avrater al nutet, naran atvtu mamh si udlani a ti apavv'el kavln nut avhl nmah kanuis, sarei, a natn a Kuhat apavrama a ti apavrman si udlani. V'eti akavier si kinkin la iv'i si p'as arna nahn Atua ha. Ipavr ti apaviari, apavram'a pr. Si lera udlani avv'i sei avrater al nmah kanuis na tamatan Atua, kavv'i sei iviviln a ti a natn a Kuhat apavrmani nakl. 16Sarei, parian a Eliesa, iv'i a natn a Erun, iv'i pris, iv'i ti ipap'aur ueil sena lait, m'a sida p'as, m'a uvrin iv'i uit (la ataui arna napn udlani ha), m'a ueil a ti apavisani arna sei. Sarei, ipap'aur nmah kanuis na tamatan Atua, m'a si udlani iter a nln, m'a nutet, m'a si udlani iter a nln.”
17Sarei ml, a Mlin Eia iv'ana m'ei a Musis, m'ei a Erun, kavr anr, kavr ti a, 18“Martrla nl nam'elar arm'ertu a Kuhat asnr arm'ertu a Livai. 19Paran si laha nakl sanar, a ti apavsilv', a ti akavram'a naran avrama kavmima asnr si p'sp'as nakl: A Erun m'er a natn apavrav'a eim kavtutu pariar anr, a ti apavrndu sei apavani, kavrndu mamh pariar. 20V'eti, naran a Erun m'er a natn avtavkarr si p'sp'as nakl, hir akavp'ei, imahei ti apavram'a.”
A natn a Kersun aparan parei laha
21Sarei ml, a Mlin Eia iv'ana m'ei a Musis, kavr ani, kavr ti a, 22“Palav'r a natn a Kersun asnr arm'ertu a Livai, kaspanr, kulul a nahar vamliar, kasapar nl nam'elar a tetiar nakl. 23Paspanr ardu paiar itneltl (30) sarei, m'er ardu udlani paiar itsiv' ineltl, dav'a ti ipaier inellm' (50)--hir udlani la atvrama sarei sena parei na nmah kanuis na tamatan Atua ha. 24Parei laha ipav'i pariar arm'ertu a Kersun, apavv'i m'ertu na m'akarien, kavrman sei nakl. 25Apavrman kalik p'arei na nmah kanuis na tamatan Atua, m'er kalik p'arei na nut av'aran na nmah kanuis. Apavrman nila p'ak sikau, la avrater arna nut eia na nmah kanuis ha, m'a kalik p'arei iv'i liu na nmah kanuis na tamatan Atua. 26Apavrman kalik p'arei iv'i liu na nut av'aran na nmah kanuis na tamatan Atua, m'er kanuis avtukar nut av'aran na nmah kanuis na tamatan Atua, m'a tiv' na sakrivais. Sarei, apavrman nahau, m'er si udlani uraur am'akar m'ei, m'er sei avani sena parei lera. Ipanap'i lera, apavv'i m'ertu na m'akarien.
27A Erun m'er a natn apavtu parei lera anr m'ertu a Kersun, si udlani apavani, m'a pariar udlani. Pavtu pariar udlani, a ti ipav'i sei apavani ipel. 28Parei lera iv'i pariar arm'ertu a Kersun, la apavani al nmah kanuis na tamatan Atua ha. Sarei, a Iv'amar, a natn a Erun, la iv'i pris ha, iv'i m'ertu ipap'aurr arna pariar nakl.
A natn a Merari aparan parei laha
29Palav'r a natn a Merari, kaspanr, kulul a nahar vamliar, kasapar nl nam'elar a tetiar nakl. 30Paspanr ardu paiar itneltl (30) sarei, m'er ardu udlani paiar itsiv' ineltl, dav'a ti ipaier inellm' (50)--hir udlani la atvrama sarei sena parei na nmah kanuis na tamatan Atua ha. 31Hir apavrman sei, ipav'i pariar apavani sena nmah kanuis na tamatan Atua. Apavrmanr nakal nen, m'er nakal p'arei nen, m'er nai p'arei nen, m'er sei adren nai a nlr nakl. 32Apavrmanr nakal na nut av'aran na nmah kanuis na tamatan Atua, m'er sei adren nai a nlr, m'er nil nar, m'er nahau nar, m'er si udlani uraur am'akar m'ei, m'er sei avani sena parei lera. Sarei, pulul a nahar m'ertu udlani p'sev', a ti apavrndu mamh sei hir prki apavrmani nakl. 33Parei lera iv'i pariar arm'ertu a Merari, la apavani al nmah kanuis na tamatan Atua ha. Sarei, a Iv'amar, a natn a Erun, la iv'i pris ha, ipav'i m'ertu ipap'aurr arna pariar nakl.”
Apaspanr arm'ertu a Livai
34Laha, a Musis, m'ei a Erun, m'er mlinar m'ertu avspanr arm'ertu a Kuhat. Avulul a nahar vamliar, kavsapar nl nam'elar a tetiar nakl. 35Avspanr ardu paiar itneltl (30) sarei, m'er ardu udlani paiar itsiv' ineltl, dav'a ti ipaier inellm' (50)--hir udlani la atvrama sarei sena parei na nmah kanuis na tamatan Atua ha. 36Laha, avspanr arna vamliar, kavla ti avv'i 2,750. 37Hir lera avv'i arm'ertu avspanr arna vamliar a Kuhat. Hir lera avviviln a ti apavm'akar arna nmah kanuis na tamatan Atua. Inap'i lera, a Musis m'ei a Erun arspanr, inep'a nut a Mlin Eia itvr sarei anr a ti aparani ipanap'ei. 38Sarei, avspanr arm'ertu a Kersun. Avulul a nahar vamliar, kavsapar nl nam'elar a tetiar nakl. 39Avspanr ardu paiar itneltl (30) sarei, m'er ardu udlani paiar itsiv' ineltl, dav'a ti ipaier inellm' (50)--hir udlani la atvrama sarei sena parei na nmah kanuis na tamatan Atua ha. 40Laha, avspanr arna vamliar, kavla ti avv'i 2,630. 41Hir lera avv'i arm'ertu avspanr arna vamliar a Kersun. Hir lera avviviln a ti apavm'akar arna nmah kanuis na tamatan Atua. Inap'i lera, a Musis m'ei a Erun arspanr, inep'a nut a Mlin Eia itvr sarei anr a ti aparani ipanap'ei.
42Sarei, avspanr arm'ertu a Merari. Avulul a nahar vamliar, kavsapar nl nam'elar a tetiar nakl. 43Avspanr ardu paiar itneltl (30) sarei, m'er ardu udlani paiar itsiv' ineltl, dav'a ti ipaier inellm' (50)--hir udlani la atvrama sarei sena parei na nmah kanuis na tamatan Atua ha. 44Laha, avspanr arna vamliar, kavla ti avv'i 3,200. 45Hir lera avv'i arm'ertu avspanr arna vamliar a Merari. Inap'i lera, a Musis m'ei a Erun arspanr, inep'a nut a Mlin Eia itvr sarei an a Musis, a ti ipani ipanap'ei.
46Laha, a Musis, m'ei a Erun, m'er armlin a Isrel avspanr arm'ertu a Livai, kavulul a nahar vamliar, kavsapar nl nam'elar a tetiar nakl. 47Avspanr ardu paiar itneltl (30) sarei, m'er ardu udlani paiar itsiv' ineltl, dav'a ti ipaier inellm' (50)--hir udlani la atvrama sarei sena parei na nmah kanuis na tamatan Atua ha. 48Laha, avspanr, kavla ti avv'i 8,580. 49Laha, a Musis isapa v'nen huan a Mlin Eia, kaspanr m'a lm'an nakl, katu sei arm'ertu apavani nakl, katu pariar nakl. Inap'i lera, ispanr inep'a nut a Mlin Eia itvr sarei ani a ti ipani ipanap'ei.
© 2023 Presbyterian Reformed Church of Australia