Parei 24
24
Ardu a Isrel avsip'len a Pul arna nahn a Viliks
1Napn ilm' iv'siau, mlinar pris udlani, iv'i Ananaias, iv'a auei a Sisaria m'er eltar ardu a Isrel m'a dui iamk, iv'i v'nenar, nahan iv'i a Tetalas. Hir avvrp'ep'a si stu avvr ti a Pul iani asn kavman.
2Av'ara an a Pul, sarei, a Tetalas ivrp'ep'adina si stu avvr ti a Pul iani, kavr ti a, “Nvrn ip'as istudau kavlak arna tamat sena pari lilil istudau nakm kani arna v'anu laha sena p'kl p'asam. 3Iel, Viliks, kv'i dui lil iamk, nvrn ip'as a si lera arna nut udlani, kavvr ip'as anh sanan. 4Narn ti pav'ah ti nv'ana par, v'eti nmiman anh a ti parn ipap'as kav'rn a v'nen pam'em'. 5Kam'em' nvla ti aulera iv'i dui stu iamk, kav'i pla v'lv'elien asnr ardu a Isrel arna nadep' udlani. Hin iv'i dui lil arna pati iamk avsapa dui iamk a Nasaret. 6Hin irn ti iputakm a nmah tamatam'em', laha nvuadei sanan. Nvrn ti p'vv'ana hua m'ei ipaviviln m'a v'nenam'em'. 7V'eti mlin lil, nahan iv'i a Lisias, iuirma m'rnur istudau avrama kavrv'lei aulera arna lm'am'em'. 8Katu v'nen a ti m'ertu avmlani apavrama asnm kavvrp'ep'a si stuan aulera anh. Ipavr ti pamiman si lera ani, nakm parndu mamh si udlani nvmlani sanan.” 9Ardu a Isrel avm'ahu ani, kavvr ti si udlani lera inep'a nut a Tetalas ivri inap'ei.
A Pul ip'tir arna nahn a Viliks kavr v'ahienan
10Sarei, kavman iah lm'an an a Pul a ti ipav'ana. Laha, a Pul ivr ti a, “Kana nrndu mamh ti nakm kv'i dui na ti pav'ana hua m'a m'ertu arna v'anu laha pai itnelnal itv'siau. Sena si lera nrn ip'as a ti p'evrp'ep'a sei nani anh. 11Napn itnal lman iru (12) itv'siau uaki, nv'a eia a Serusalem a ti p'epatei Atua. Si lera iahua a ti parndaui. 12Hir ahavla ti kana nv'lv'al m'a m'ertu kinkin al nmah tamat, ahavla ti nani ti m'ertu kinkin avp'tir kavv'lv'al al nmah tamat v'aha arna v'anu lil. 13Ahavrndu ti apavv'iv'en ti kana nen si stu kinkin. 14V'eti nrn ti p'evrp'ep'a si laha anh. Hir avvr ti navanel la nsapei ha iaviviln, v'eti kana npatei Atuan a tetiam'em'. Kana nv'ah si udlani avulul ani arna v'nen huan a Musis m'a sei pruvet avulul ani. 15Kana nv'ah Atua inep'a nut hir avv'ah Atua inap'ei, katrah ti m'ertu avram'a apavthal ml arna m'ienar, m'ertu p'as m'a m'ertu stu. 16Sena si lera, iel, nm'akar ihua a ti nlk imam'alet ml kav'ana m'a kana arna sei nani arna nahn Atua m'er m'ertu udlani.
17 #
Parei 21:17-28. Itauatah a pai inelnal itv'siau sarei, nm'alet kadama ml a ti p'etu sei anr tv'alk arna v'anuam'em' katuvn a sei iv'a asn Atua. 18Nen si lera, laha, ardu a Isrel kinkin avandan a Esia avla kana al nmah tamat, naran nten sera si udlani a ti p'ep'as arna nahn a Mlin Eia. Kana nalev' m'ertu ipanelnal apavsapa kana, v'lv'elien ihei. 19Iviviln a ti hir apavrama atlaha kavp'tir arna nahm kavvrp'ep'a sei avmlen kana sanan. 20V'aha, ipavr ti ikahei, ip'as a ti ardu laha apavvrp'ep'a si kinkin avla ti nani istu, naran np'tir arna Kaunsel lera. 21#Parei 23:6.Nsarei iv'i si iamk uaki. Naran np'tir asnr, kana nv'ara eia kavr ti a, ‘Kam'i kvv'ana hua m'a kana dika sena ti nv'ah ti m'ertu avram'a apavthal ml arna m'ienar.’ ”
22V'eti hin a Viliks irndu mamh navanelan a Iesu. Laha, naran irn v'nen lera, ivr ti kut ipahiris dei, kavr ti a, “Naran mlin lil na m'rnur, a Lisias, ipama, kana p'erndu mamh sei p'etaui arna siam'i lera.” 23Laha, hin itu v'nen an a mlin na m'rnur kavr ti ipap'aur mamh a Pul, v'eti ipam'ahu a ti ipunanut ipasusupa. Imavrkar tv'aln kinkin kavr ti amavuirma sei ipasr lm'an, v'aha ti akavrama asnn.
A Pul iv'ana m'ei a Viliks m'ei a Trusila
24Napn kinkin iv'siau, sarei, a Viliks m'ei a naun, nahan iv'i a Trusila, iv'i tav'et a Isrel, arma atlera. A Viliks itep'a v'nen a ti a Pul ipama asnn, kav'rn ani, naran ivr ti m'ertu ikv'ah a Iesu pr. 25Naran a Pul ivrur p'kl viviln m'a p'kl na ti m'ertu ipauada v'ahienan, m'a nut Atua ipav'ana hua m'a m'ertu ipanap'ei ipatauatah, hin a Viliks ima kadedrn kavr ti a, “Pahu dei hilaha, p'ev'ara anh uam arna naran uraur ipaviviln ani.” 26V'eti arna naran nen lera, hin itrah ti a Pul ipatu nav'et kinkin ani a ti ipulni. Sena si lera, iv'ara ani nakl kav'ana m'ei.
27V'eti pai iru iv'siau ml, a Pusias Vestas iua m'lnen a Viliks. Laha, a Viliks irn ti ardu a Isrel apavlap'as ani, kaln a Pul al p'resin sanan.
© 2023 Presbyterian Reformed Church of Australia