Parei 23
23
1Laha, a Pul ip'ar m'ertu udlani arna Kaunsel ihua, kavr ti a, “Tv'alk udlani, arna silv'ienak udlani, nlk iam'alet ml kavrkar kana arna sei nani arna nahn Atua, ier dika.”
2V'eti, mlinar pris udlani, nahan iv'i Ananaias, hin itu v'nen anr m'ertu avp'tir asnn kavr ti apavusa pnn a Pul. 3#Mat 23:27,28.Sarei, a Pul ivr ani, kavr ti a, “Atua iparph. Nakm knep'a sera p'ak nmah atu naul aranan itva. Klak a ti pav'ana hua m'a kana sena v'nen hua, v'eti kluvn a v'nen hua naran kvr ti apavusa kana.”
4M'ertu avp'tir mima asn a Pul avvr ti a, “?Nakm kv'ana stu m'a mlinar pris udlani? ?Knap'i?”
5 #
Avruh 22:28. A Pul ivr ti a, “Tv'alk, kana narndu ti hin iv'i mlinar pris udlani, sena ti Paivul ivr ti a, ‘Mav'ana stu kavrur mlin ip'aur m'ertu arna v'anuam.’ ”
6 #
Parei 26:5; Vilipai 3:5. Naran a Pul ila ti pna m'ertu atlera avv'i Satiusi, pnen avv'i Varisi, iv'ara eia arna Kaunsel kavr ti a, “Tv'alk udlani, kana nv'i Varisi, a tetiak iv'i Varisi. V'eti hir avrn ti apavandina kana sena ti nv'ahi katrah naran m'ertu ipathal ml arna m'ienen.”
7Naran itv'ana sarei inap'i lera, iv'amk m'a ti Varisi m'er Satiusi avv'lv'al kavtupr hir. 8#Mat 22:23; Mak 12:18; Luk 20:27.Sena ti Satiusi avvr ti m'ertu ikathal ml arna m'ien, kavvr ti ensel ihei, m'im'il m'ertu ihei. V'eti Varisi avv'ah si udlani lera. 9Sena si lera, avuaual istudau, laha, ardu na v'nen hua la avsapar Varisi ha avp'tir kavv'ana ihua, kavvr ti a, “Kam'em' navpasla si kinkin aulera iani istu. Ipavr ti m'im'iln p'as ki iamk v'aha ensel ki iamk itv'ana sarei m'ei, iap'as a ti p'vmlen Atua.”
10V'eti v'lv'elien lera ima kalil ihuadau, laha, mlin lil na m'rnur idedrn a ti apavuadei a Pul kaviapapr p'akn, katu v'nen anr m'rnur kavr ti apavrav'a auei kavuadei a Pul kavlev'lei asnr nelnal kavuirv'a eim al nmahar m'rnur.
11M'ih nen lihat, a Mlin Lilad ip'tir asn a Pul kavr ti a, “Pul, parn ip'as. Nakm ktvrp'ep'a sera kana a Serusalem, mkvrp'ep'a kana pr iknap'i lera ml arna nut a Rum.”
Dui kinkin avp'lt kavvr ti apavrpep'n a Pul
12M'ih nen m'etav'aran, ardu a Isrel kinkin avp'lt kavan turanien hua iamk kavvr ti akavhatat kavm'nm'n ml ipaier naran apavrpep'n a Pul. Ipavr ti ikahei, Atua iputakm anr sanan. 13M'ertu avp'lt a ti apavan si stu lera avsiv' inelv'a (40) 14Kavrav'a asnr pris lilil, m'er elta, kavvr ti a, “Kam'em' ntvtu sera turanien hua kavvr ti ipavr ti p'vhan si kinkin ipatauamu a ti p'vrpep'n a Pul, a Mlin Eia iputakm a kam'em'. 15V'eti hilaha, kam'i m'er m'ertu udlani avlak arna Kaunsel, pavtep'a v'nen ipav'a asn mlin lilar m'rnur kavvr ti m'ih ipauirma aulera asnm'i, inep'a ti pavmiman mamh si uraur ml ani. Kam'em' p'vtrah ti p'vrpi, naran idamima uam.”
16V'eti naran a mrin a Pul irn v'nen a ti hir avtrah ti apavrpi, iv'el kadav'a al nmahar m'rnur kavrp'ep'ei an a Pul. 17Laha, a Pul iv'ara an a mlinar m'rnur iamk kavr ti ipama asnn, kavr ti a, “Palev' malakal laha kauirv'a asn mlin lil, sena ti irn ti ipavr sei ani.” 18Laha, ilav'i kauirv'a asn mlin lil kavr ti a, “A Pul la ip'resin ra, iv'ara a kana nv'a asnn, kamiman kana kavr ti p'euirma malakal laha asnm, sena ti irn ti ipavr sei anh.”
19Laha, mlin lil iuada lm'an karv'a m'ei a nut iamk, m'ertu uraur iasapar, kamiman ani, kavr ti a, “?Krn ti pavr v'ata a kana?”
20Laha, ivr ti a, “Ardu a Isrel atvtu sera navanel a ti apavmiman anh a ti palev' a Pul kauirv'a auei arna Kaunsel m'ih, inep'a ti apavmiman mamh si uraur ml ani. 21V'eti nakm mav'rn anr, sena ti dui isiv' inelv'a (40) apavtutuah kavtrahi, hir udlani atvan sera turanien hua kavvr ti akavhatat kavm'nm'n iktauamu a ti apavrpep'ni. Hilaha avtrah ti apavan si lera kavtrah v'nenam uaki.”
22Laha, mlin lil ivr ti ipahau, kavr ani ihua kavr ti a, “Mavrp'ep'ei anr m'ertu kinkin a ti kvr v'nen lera a kana.”
Mlinar m'rnur itap'ei a Pul iv'a asn a Viliks, iv'i kavman
23Sarei, iv'ara anr mlin kinkin arru kavr ti a, “Parv'a karandedp' m'rnur apavnelnal ipav'aru (200) Arm'rnur avlak arna hus apavnelsaru ml (70), dui na namas apavnelnal ipav'aru (200), hir udlani apavrav'a a Sisaria arna m'etaneiel ipasav'et (9) lihat. 24Parvr ti apavlev' hus kinkin a Pul ipalak aranan, kavv'av'ei ipav'a asn kavman lil, nahan iv'i a Viliks. Iap'as a ti si kinkin iputakm ani arna navanel.” 25Laha, iulul a ruplet iamk kavri inap'i laha kavr ti a, 26“Kana nv'i a Klutias Lisias. Nulul a v'nen laha ipav'a asnm, Viliks, kv'i kavman lil iamk. Kana nvr ip'as anh. 27Ardu a Isrel avuadei aulaha, nut pa ti avrpep'ni, v'eti ntrndu sera ti iv'i dui a Rum, kavrav'a m'er arm'rnurak kavlev'lei asnr. 28Nrn ti p'erndu sei hir avmlani sanan, laha, nuirv'a auei arna Kaunselar. 29Kana nla ti avv'ana m'ei uaki sena v'nen hapr kinkin arna v'nen huar, v'eti ahavvr sei iviviln a ti ipam'a v'aha a ti ipap'resin sanan. 30Naran m'ertu iamk ima kavrp'ep'ei a kana kavr ti ardu a Isrel avtu navanel iamk a ti apavrpep'ni, iv'amk m'a ti ntap'ei iv'a asnm, katu v'nen anr m'ertu avmlani, kavr ti apavvrp'ep'a si stu iani arna nahm. Ip'as.”
31Sarei, arm'rnur avan sei ivr anr, kavlev' a Pul kavuirv'a Antipatris arna lihat lera. 32M'ih nen, m'rnur avlak arna hus avv'el m'ei, v'eti duanar m'rnur avrahum'alet ml asn nmahar m'rnur. 33Naran avier a Sisaria kavtu ruplet nen a kavman lil, avuirv'a a Pul asnn. 34Naran kavman iv'ana arna ruplet lahara, imiman an a Pul, kavr ti a, “?Nakm kv'i dui arna v'anu ip'i?” Naran irndu ti a Pul iaan a Silisia, ivr ti a, 35“Kana p'ern v'nenam naran m'ertu avmlanh apavrama kavvrp'ep'a si stu kani.” Laha, itu v'nen anr m'rnur a ti apavtau a Pul al nmah kutan a mlin lil a Erut.
© 2023 Presbyterian Reformed Church of Australia