Parei 25
25
A Pul irn ti ipavrp'ep'a v'ahienan asn mlin lil a Rum
1Hin a Vestas iv'a arna nut lil lera. Sarei, napn itl iv'siau, iaan a Sisaria kadav'a eia a Serusalem. 2Laha, mlinar pris m'er ardu lilil a Isrel avrav'a asnn kavvrp'ep'a sei avmlen a Pul sanan, kavmimani ihua. 3Kavvr ti hin ipan sei avrni katu v'nen a ti apatap'ei a Pul ipama a Serusalem, sena ti atvtu sarei a ti apavrpi arna navanel. 4V'eti a Vestas ivrpranr kavr ti a, “Hin a Pul ip'resin arna nut a Sisaria. Ikap'arei p'av'a ml atlera. 5Sena si lera, kam'i pavtap'er ardu lililam'i kinkin apavrav'a auei kavsapa kana, kavvrp'ep'a sei avmlani sanan, ipavr ti iten sera si stu kinkin.”
6A Vestas ilak asnr isiv' napn inal, sarei iv'el kadav'a auei arna nut a Sisaria. M'ih nen iv'a kalak al nut av'ana hua m'a m'ertu, kavr ti apalev' a Pul ipama asnn. 7Naran hin ima eim, ardu a Isrel la avaan a Serusalem hara, avp'tirtalu ani kavvrp'ep'a ti ien si stu lilil inelnal kavmlani sanan, v'eti ahavv'iv'en mamh si stu nen kinkin. 8V'eti a Pul ivrpren v'nenar kavr ti a, “Kana naan si stu kinkin. Namlen v'nen huar m'ertu a Isrel, v'aha nmah tamat, v'aha mlin lil a Rum.”
9V'eti a Vestas irn ti ipan sei ardu a Isrel apavlap'as ani sanan, kavr an a Pul kavr ti a, “?Nakm krn ti pav'a a Serusalem a ti apavv'ana hua m'ah sena si lera arna nahk atlera?”
10Laha, A Pul ivr ti a, “Kana np'tir arna kut, iv'i nkan a mlin lil a Rum. Nut laha iv'i nut viviln a ti apav'ana hua m'a kana, sena ti naan si stu kinkin anr ardu a Isrel. Si lera nakm krndu mamahi. 11Ipavr ti nen si stu kinkin v'aha si kinkin iviviln a ti p'am'a sanan, kana navr ti nkahm'a. V'eti ipavr ti v'nen avvri iav'i v'nen dau, m'ertu kinkin ihei irndu ti ipatu kana al lm'ar. Kana nv'ara an a mlin lil a Rum a ti iparn v'nenak.”
12Laha, a Vestas iv'ana m'er asisan, sarei, kavr ti a, “?Kv'ara an a mlin lil a Rum a ti iparn v'nenam? Aau, pav'a asnn, ra.”
A Pul ip'tir arna nahn Akripa
13Napn kinkin iv'siau, mlin lil Akripa m'ei a P'ernis arv'a a Sisaria a ti aparlei a Vestas karvr ip'as ani. 14Naran atvlak sarei atlera napn inelnal, a Vestas ivrp'ep'ei an a mlin sei itu hin asn a Pul, kavr ti a, “Naran a Viliks iruh, iln dui iamk al p'resin atlaha. 15Naran nlak a Serusalem, arpris lil m'er eltar ardu a Isrel avvrp'ep'a sei avmlen a Pul sanan kavrn ti p'ev'ana hua m'ei kutakm ani. 16V'eti nvrpranr kavr ti a, ‘Iav'i p'klm'em' a Rum a ti p'vm'ahu a ti m'ertu ki ipamk ipam'a naran idap'tir arna nahr m'ertu avmlani, karndu ti ipavrpranr sena sei avvr ti iani istu.’
17Sena si lera, naran avrama atlaha, natrah napn uraur ml, v'eti m'ih nen, nlak arna nut av'ana hua m'a m'ertu katu v'nen a ti apauirma aulera. 18V'eti naran ardu avmlani avp'tir, ahavvrp'ep'a si stu kinkin inep'a nut nv'ah ti apavani ipanap'ei. 19V'eti avvrur v'nen hapr uaki arna v'ahien avsapei, kavvrur dui ki iamk itam'a sarei, nahan iv'i a Iesu, la a Pul ivrp'ep'ei ihua kavr ti isilv' ha. 20Kana narndu mamh navanel na sei inap'i lera, laha, nmiman ani, kavr ti a, ‘?Ipanap'i? ?Nakm krn ti pav'a a Serusalem a ti p'ev'ana hua m'ah arna si lera udlani?’ 21V'eti a Pul iv'ara an a mlin lil a Rum, kavr ti p'euadei ipaier naran a Ukastas iparn v'nenan. Sena si lera, ntu v'nen a ti apap'auri al p'resin dav'a ti p'etap'ei ipav'a asn a mlin lil a Rum.”
22Laha, Akripa ivr an a Vestas kavr ti a, “Kana ml nrn ti p'ern v'nenan aulera.”
A Vestas ivr ti a, “M'ih parni.”
23M'ih nen, Akripa m'ei a P'ernis arv'a al nmah av'ana m'a m'ertu a nln, m'er mlin lil na m'rnur m'er ardu lilil arna v'anu, laha, avani nahar iv'a eia iviviln a p'klr. Sarei, a Vestas itu v'nen a ti apauirma a Pul. 24A Vestas ivr ti a, “Mlin Akripa, kam'i udlani kvlakp'lt m'a kam'em' atlaha. Kam'i kvlei aulera, nelnal udlani a Isrel avv'ana m'a kana sanan, arna nut laha m'a nut a Serusalem, kavv'ara eia kavvr ti iaviviln a ti ipasilv' ml. 25V'eti kana nla ti iaan si kinkin iviviln a ti ipam'a sanan, v'eti hin iv'ara an a Ukastas a ti iparn v'nenan. Sena si lera, kana nttu sarei a ti p'etap'ei ipav'a. 26V'eti kana narndu mamh sei p'ulul ani ipav'a asn a mlinak. Sena si lera nuirma a ti ipap'tir arna nahm'i, kap'tir arna nahm, mlin Akripa, sena ti naran p'vv'ana sarei m'ei, p'eiak a si kinkin p'ulul ani. 27Sena ti nv'ah ti iaviviln a ti p'etep'a m'ertu ipamk ilak al p'resin, ipavr ti navrp'ep'a si stu avr ti iani.”
© 2023 Presbyterian Reformed Church of Australia