Parei 22
22
1Laha, ivr ti a, “Ardu, tv'alk udlani, tatei udlani, pavv'rn a v'nenak p'evr a kam'i.” 2Naran avrn ti iv'ana arna v'nenar arm'ertu a Isrel, avlak ms mau.
Laha ivr ti a, 3#Parei 5:34-39.“Nvrdaui, kana nv'i dui a Isrel. Niak a Tasis, iv'i v'anu lil a Sailisia, v'eti nma kalil arna v'anu laha, kalak asn tisa lil iv'i a Kamaliel, iv'iv'en a kana si udlani arna v'nen huan a tetiad. Kana np'tir ihua arna parian Atua, inep'a kam'i udlani dika. 4#Parei 8:3; 26:9-11.Ntp'ev' nelnal avsapa navanelan a Iesu laha a ti p'erpep'nr, kahuda dui m'a tav'et, kataur al p'resin. 5Mlin lilar pris udlani m'er elta udlani apavvr ti nvrdaui. Arna naran lera nlev' ruplet kinkin avulul ani ipav'a asnr tv'ald, kadav'a a Tamaskas a ti p'ehudar nelnal avsapa navanel lera, kauirv'ar a Serusalem a ti aputakm anr.
A Pul ivrur naran a Iesu iv'iv'en Hin ani
(Parei 9:1-19; 26:12-18)
6Naran nsapa navanel kamima asn nut a Tamaskas lihalm'au, iv'amk m'a ti nut ren lil iamk iaan eia kadama kertalu a kana. 7Laha, nrs a nadep', karn nadl iamk ivr a kana kavr ti a, ‘?Sul, Sul, ktp'ev' Kana sena v'ata?’ 8Nvrprani, kavr ti a, ‘?Mlin, Nakm kv'i ak?’ Ivr a kana kavr ti a, ‘Kana nv'i a Iesu, dui a Nasaret, la ktp'ev' Kana nakl ha.’
9Hir udlani avsapa kana avla nut ren kavdedrn, v'eti ahavrn nadl Dui iv'ana m'a kana. 10Laha, nvr ti a, ‘?Mlin, p'en v'ata?’ A Mlin Lilak ivr kana, kavr ti a, ‘Pap'tir kav'el kadav'a a Tamaskas. Arna nut lera apavr anh si udlani ntaui ti pani.’ 11V'eti nut ren lera ier ihuadau, iani ti narndu ti p'ela sei. Laha, m'ertu avsapa kana avua lm'ak kavv'ev'a kana dav'a nier a Tamaskas.
12Arna nut lera, dui iamk, nahan iv'i Ananaias ilak. Hin iv'i dui iv'ah Atua, kasapa mamh v'nen hua. M'ertu a Isrel avlak atlera avvr ti iv'i dui p'as iamk. 13Hin ima asnk, kap'tir kavr a kana kavr ti a, ‘Tv'alk, Sul, paledu sei ml.’ Iv'amk m'a ti np'ei. 14Laha, ivr ti a, ‘Atuan a tetiad itv'li sarah a ti parndu sei Hin irn ti ipani, kav'laih a ti pala Dui Viviln lera karn nadl iaan al pnn. 15Sena ti nakm pav'i v'nenan asnr m'ertu udlani, kavrp'ep'a sei klei karni. 16?Hilaha ktrah v'ata ml? Pap'tir kapaptais, kav'ara an a Mlin Eia a ti ipasilelua si stuam.’
Atua itap'ei a Pul a ti ipavrp'ep'a v'nen p'as asnr v'anudl udlani
17Naran nm'alet dama ml a Serusalem, ntu tamat al nmah tamat kaklus m'atak. 18Kala ti a Mlin Lilak ivr a kana kavr ti a, ‘Parakn, karuh ipalahml arna nut a Serusalem, sena ti akav'rn a v'nenam naran pavrur Kana.’ 19Laha, kana nvr ti a, ‘Mlin, hir avrndu ti kana nv'a al nmah tamatar udlani kauadar m'ertu avv'ahah, karpr. 20#Parei 7:58.Laha, naran avani ti din a Stivn, iv'i v'nenam, irarev', kana np'tir m'er karn ip'as naran nla ti im'a, kap'aur klusar m'ertu avrpi.’ 21Laha, ivr a kana kavr ti a, ‘Pav'el, sena ti p'etap'ah v'iv'a au asnr v'anudl.’ ”
A Pul ivrp'ep'a ti iv'i dui a Rum
22Nelnal avv'rn mamh v'nenan a Pul dav'a ier v'nen lera, sarei kavv'ara eia kavvr ti a, “Pavlev'la m'ertu inap'i lera arna nadep' ka, sena ti iaviviln a ti ipasilv' ml.” 23Avv'ara dav'a kavhsla klusar kavlev' neiev' kavsrani unanut. 24Laha, mlin lil na m'rnur itu v'nen a ti apavuirv'a a Pul al nmahar m'rnur, kavr ti apavrpi a nahau, a ti apavrndu sei m'ertu avv'ara eia kavmlani inap'i lera sanan. 25V'eti naran avhudei ihua a nahau, a Pul imiman an a mlin na m'rnur la ip'tir mima ha, kavr ti a, “?Iviviln a ti kam'i pavrp dui a Rum a nahau, naran adataui arna kut?”
26Naran mlin nen irn si lera, iv'a asn mlin lil na m'rnur, kavrp'ep'ei kavr ti a, “Pav'ahur sei pani, sena ti aulera iv'i dui a Rum.”
27A mlin lil ima kavr ani, kavr ti a, “?Pavr a kana, nakm kv'i dui a Rum?” Ivr ti a, “Aau.”
28Mlin lil ivrprani, kavr ti a, “Kana nsran nav'et istudau a ti p'ev'i dui a Rum.” V'eti a Pul ivr ti a, “Kana niak kav'i dui a Rum.”
29Iv'amk m'a ti m'ertu la avrn ti apavmiman sei ipahua ani ha, avruh asnn. Mlin lil hin idedrn naran irndu ti iv'i dui a Rum, sena ti ithuda sarei.
A Pul ip'tir arna nah Kaunsel
30M'ih nen, iulni katu v'nen anr pris lil udlani, m'er nelnal arna Kaunsel kavr ti apavp'lt, sena ti iparndu sei ardu a Isrel avmlani sanan. Laha, ilev' a Pul ima auei kani ti ip'tir arna nahr.
© 2023 Presbyterian Reformed Church of Australia