Ɛseta 8
8
Ba pɛ Juu tiina chwoŋa se ba jaŋe ba jwoŋi ba ŋwea
1Dɛ dem konto ne mo Pɛ Zeregese kwei Juu tiina bam dono Haman jejegero maama o pa Ɛseta. Wonto de ma ta de pɛ wom we Modekayi ye o choro mo. Modekayi laam ma na chwoŋa se o zo pɛ wom tei. 2Pɛ wom nam ya maŋe o le o dam jafole dem mo Haman jeŋa ne. O laam ma kwei-de o ke Modekayi noa ne. Ko na zege dɛ dem konto ne to, Ɛseta ma pa se Modekayi lɛɛre o nii kolo maama Haman ya na jege to.
3Ɛseta daa ta ma zo pɛ wom tei se o lwoori‑o o dwi tiina bam ŋwaane. O déem to o pwoa ne mo ye o keera. O ma lwoori‑o se o che boboŋ-balɔrɔ kolo Agagi dwi tu Haman ya na ke se o ma o chɔge Juu tiina bam to. 4Pɛ wom ma tei o sabu-seŋa nacheiga kam o jeeri Ɛseta, ye o zaŋe wɛɛne o fɔɔre o yi pɛ wom tei. 5Ɛseta daa maa we, “Pɛ, nmo wo ná dɛa, ye ko maŋe dede‑m, nmo yi maa ná sui a kikia yam ye n yiga ná wo amo wone, se n pa kwora kalo na wó che Haman ni dem se de daa yé toŋe. Ko ye ni delo Agagi dwi tu Hamedeta bu Haman na pɛ we ba chɔge Juu tiina bam nmo paare dim laŋa kam jei maama ne to taane mo a tɛa. 6Amo nam bá wane a yage se lɛɛro tento ba a dwi tiina bam baŋa. A bá wane a peene a tete ye ba jege a tete chorro ba goe.”
7Pɛ Zeregese ma ta de ka-pɛ Ɛseta de Juu tu Modekayi o we, “Nii-na amo na ke tei Juu tiina bam ŋwaane. A pɛ se ba kuuni Haman mo de o na boŋe lwarem se o ti Juu tiina bam to, a ta ma kwei o jejegero tem a pa Ɛseta. 8Amo nam wó pa abam chwoŋa se á kwei amo yere á popone á na lage kolo maama to á ke twanno wone se ko woli Juu tiina bam ba cham wone. Á ná popone taane dem á ti, se á kwei a dam jafole dem á ma nye twanno tem baŋa ne. Ko nam ná ye ni delo ba na kwei pɛ yere ba popone-de, ye ba daare ba ma o jafole dem ba nye tɔnɔ kom to, dento bá wane de kwane.”#Danyeli 6:15
9Ba déem ma bwoŋi pɛ wom tɔn-poponna bam se ba ba. Modekayi ma ta kolo ba na wó popone to, se o kwei o ni dem o pa Juu tiina bam, de pɛ wom yiga tiina, de dedɛɛra, de nakwa balo na wo kateira bi de finlei-barepɛ (127) yam maama wone to, se ko zege India ne se ko yi Etiopia. Ko maa ye chane setɔ chana kam da finlei-yatɔ dɛ ne mo tento maama kea. Chane kam yere mo ‘Sivan’. Ba déem popone twanno tem de teo maama dwi taane, nenɛɛne ba na yeini ba popone-de tei to mo. Juu tiina bam de ma jwoŋi ba twanno de ba tete taane, dedaane ba poponem na ye tei to. 10Modekayi déem mɛ Pɛ Zeregese yere mo o popone twanno tem, ye o daare o kwei pɛ dam jafole dem o nye te baŋa ne. O ma daare o kwei-te o pa pɛ tontoŋena balo na diini pɛ wom tete sisein-nɔɔna balo na wae ba duri lela to.
11Twanno tem déem bere pɛ wom ni we Juu tiina na zoore teo kolo maama wone to jege chwoŋa se ba la daane se ba jaŋe ba jwoŋi ba tete ba yage. Ko ta we, jar-keira ná nwoŋi dwi delo maama wone, naa teo kolo maama wone, ye ba kwaare jara de Juu tiina bam, banto wó wane ba chɔge balo maama na done-ba to ba ti, ko ná maŋe ko ye ba kaana de ba bia de. Ba ta wó wane ba kwei ba dona bam jejegero ba taa tei. 12Dɛ dem Juu tiina bam na jege chwoŋa se ba jaŋe ba jwoŋi ba tete Pɛ Zeregese paare dim laŋa kam maama wone konto to maa ye chane fuga-selei chana kam, ka yere na ye Adare to, da fuga-yatɔ dɛ dem ne.#8:12 da fuga-yatɔ dɛ dem ye dɛ dem Haman ya na kuri se ba ma chɔge Juu tiina bam to (3:13). 13Ba déem pɛ se kateiri de kateiri maama taa jege de tɔnɔ kom, se dwi maama tiina wane ba lɔre ni dem jaja. Ba ke se de dɛ dem ná yia, se Juu tiina bam ti yiga se ba jaŋe de ba dona mo. 14Pɛ wom ni dem ma pa se o sisein-dira bam duri lela ba ja twanno tem ba vo ba yi jei maama. Ba ta ma tɔɔle taane dem Susa dam jei sem wone.
15Modekayi ma nwoŋi pɛ sɔŋɔ kom ne o maa viira, de o zo paare gwaaro mo telo nyenyero na ye napwonnu de nazwon-pupwia to. O ta ma daŋe gare-fefala kalo nyenyego na ye nasoŋ-pupwia to o ke da, ye sabu-seŋa yipuga wo o yuu ne. Susa teo kom dam jei sem laam ma su dedaane sɔɔ, nɔɔna bam na jege wopwolo to ŋwaane. 16Juu tiina bam wo déem ma pwoli de kolo maama na ke to. Nɔɔna maama ma pa-ba zula jei maama ne. 17Ba déem na tɔɔle pɛ wom ni dem teo maama de kateira maama wone to, ko pɛ se Juu tiina bam ke kuri mo ba di wodiiru, ye ba kwɛɛre, ba na tiini ba jege wopwolo to ŋwaane. Dwi-gɛ tiina dedɛ de bere ba pipiri ba ji Juu tiina, ba na tu ba kɔre foone de Juu tiina bam to ŋwaane.
© 2020, Ghana Institute of Linguistics, Literacy and Bible Translation (GILLBT)