Ɛseta 9
9
Juu tiina bam di dam ba dona baŋa ne
1Adare chana kam da fuga-yatɔ dɛ dem ma seene de yi. Dɛ dem konto mo pɛ wom ni dem jege se de toŋe. Juu tiina dona bam déem ya teene se ba wane-ba mo, ye banto jwoori ba wane ba dona bam ba di. 2Pɛ Zeregese paare dim laŋa kam ne Juu tiina na zoore mɛ maama to, ba ma la daane se ba jeeri balo na boŋe se ba chɔge-ba to de jara. Nɔɔn-nɔɔno maa ware se o dwoni de-ba, dwi maama tiina na kɔre foone de-ba to ŋwaane. 3Teo maama nakwa, dedaane pɛ wom dedɛɛra, de o yiga tiina, de o tontoŋena maama déem tɔge ba woli Juu tiina bam mo, ba na kɔre Modekayi to ŋwaane. 4Peresia kateira yam maama wone nɔɔna laam tu ba maane we Modekayi mo tiini o jege dam pɛ sɔŋɔ ne. O dam dem déem ke de woli da mo dɛ maama.
5Dɛ dem na yi to, Juu tiina bam déem chɔge ba dona bam ba na lage tei to. Ba ma kwei se-zɔɔro ba jeeri balo na chuli-ba to ye ba go-ba. 6Susa dam jei sem wone, ba déem go nɔɔna bia yanu. 7-10Ba ma go Hamedata bu Haman bu-baara fuga. Wonto déem ye Juu tiina bam dono mo. O bia bam mo tento: Pasandata, de Dalefon, de Asepata, de Porata, de Adalia, de Aridata, de Paramaseta, de Arisayi, de Aridayi, dedaane Vayizata. Ba ma go nɔɔna bam konto maama, ye ba laam wo vere ba jejegero.
11Dɛ dem konto ne ba ma ta ba bere pɛ wom ba na go nɔɔna balo Susa dam jei sem ne to ni na mae tei. 12O de ma guli de ka-pɛ Ɛseta o we, “Susa dam jei sem yerane wone Juu tiina bam go nɔɔna bia yanu mo, ye Haman bia fuga kam tɔge ba wo twa bam wone. Se ko ná ye kateira yadwonna yam wone, ko laam wó taa ye tetɛ mo? Nam ta n bere-ne kolo nmo daa‑n na lage se a ke to, se amo wó ke a pa‑m. Nmo wó lwoori bɛ mo amo tei ne?”
13Ɛseta ma leiri o we, “Pɛ, ko ná dɛ de n wo, se n jwa daa‑n pa Juu tiina bam chwoŋa se ba ke ba na ke tei zem tento to dwoŋi. Ta pa ni se ba kwei Haman bia bam yera ba lei da-kwoli-dedwaaro tem yera ne.”
14Pɛ wom ma pa ni Susa teo wone se ba ke tei ka-pɛ wom na tage to. Ba ma kwei Haman bia bam yera yam ba lei da-kwollu tem yera ne. 15Adare chana kam da fuga-yana dɛ dem ne Juu tiina balo na zoore Susa wone to daa ma ke daane ba go nɔɔna bia yatɔ, ye ba ta wo vere ba jejegero.
16Juu tiina balo na wo kateira yayam yam wone to de ma ke daane se ba jaŋe ba jwoŋi ba tete, ye ba wane ba dona ba di. Ba ma go ba dona morro fuserepɛ-tenu (75,000). Ba de maa wo vere ba dona bam jejegero. 17Ko déem ye Adare chana kam da fuga-yatɔ dɛ dem ne mo ba go-ba. Se ko ná ye da fuga-yana dɛ dem ne, ba sii mo de jara. Ba pɛ se de ji wopwolo dɛ mo ye ba di kuri. 18Ko daare, Juu tiina balo na zoore Susa wone to, mo pɛ se chana kam da fuga-yanu dɛ dem ye wopwolo dɛ ye ba di kuri. Kokuri to, ba mɛ da fuga-yatɔ dɛ dem de da fuga-yana dɛ dem mo ba go ba dona ye ba laam sii de jara yam. 19Konto ma pa se Juu tiina balo na zoore te-balwa wone to kwei Adare chana kam da fuga-yana dɛ dem se de ji ba wopwolo dɛ. Ko ná yeini ko yi dɛ dem konto, ba maa yeini ba ke kuri ye ba daare ba toŋe wodiiru ba pae daane.
Purim kuri dem dim
20Modekayi déem pɛ se ba popone wonnu tento maama mo ba tiŋi, ye o daare o toŋe twanno o pa Juu tiina balo na zoore Pɛ Zeregese paare dim laŋa kam jei maama ne, ba ná maŋe ba ye bwola bwola naa yiga yiga de. 21O ma ta-ba se bene maama wone, ko ná yeini ko kaare ko yi Adare chana kam da fuga-yana dɛ dem de ka da fuga-yanu dɛ dem, se ba taa ke wopwolo kuri, 22ko na ye da yam konto wone mo Juu tiina bam déem vere ba tete ba dona jeŋa ne to ŋwaane. Ko ta ye chana kalo wone ba wo-chechɔgɔ déem na pipiri ko ji wopwolo ye ba cham de ji ywoni to mo. Modekayi ma bere-ba se ba kwei da yam konto ba di kuri ye ba kwɛɛra, se ba taa ke wodiiru pɛɛra ba pa daane, ye ba ta woli yiniga tiina de pɛɛra. 23Juu tiina bam ma sɛ Modekayi ni dem ye ba pa se keim dem konto lɛɛre de ji bene maama kikia, ne ba na bobo se ba ke tei to.
24Ko na ye tei to, Agagi dwi tu Hamedata bu Haman, o ya na ye Juu tiina maama dono to, déem mo boŋe se o chɔge Juu tiina bam o ti. O ma ta jɔrɔ se o lɔre dɛ delo o na wó pa se ba dwi dem saare tega baŋa ne to. Jɔrɔ kom yere mo ‘Pura’. 25Ɛseta ma pa se pɛ wom lɔre Haman boboŋa yam ni ne. Pɛ wom na nigi to, o ma popone o ni o ke tɔnɔ wone, pa se Haman ya na boŋe se o ke Juu tiina bam lwarem delo to pipiri de jwoori o tete yuu ne. Pɛ wom ta ma pa se ba kuuni Haman de o bia da-kwollu yera ne.#Lei 7:16 26Haman ya na tage ‘Pura’ jɔrɔ kom to ŋwaane, ba laam ma lɛɛre ba jege kuri dem konto da yam ba bwoi we ‘Purim’. Juu tiina bam déem sɛ kolo Modekayi tɔnɔ kom na bere-ba se ba taa ke to se ba taa gula kolo maama na yi-ba to. 27Konto ŋwaane ba ma lɛɛre ba sɛ se da yam konto yalei taa zege ya pa-ba, se ba de ba bia, dedaane wolo maama na wó ba o woli ba wone to taa di ywoni. Ba ta ma sɛ se ba tɔge Modekayi ni dem se ba yɔɔre ba di kuri dem bene maama ne, nenɛɛne ko ná yeini ko yi ka maŋa kam. 28Juu tiina bam maama jege se ba jwa jwa taa yei da yalei yam konto ni ne, se ba di Purim kuri dem sɔŋɔ maama ne, de teo de kateiri maama wone, se ba de ba dwi dem yé swei ya ni ne se ko taa vei wuu.
29Ka-pɛ Ɛseta na ye Abihali bu to ma zege Juu tu Modekayi kwaga ne, ye o daare o popone tɔnɔ se ko pa ni delo Modekayi na popone Purim kuri dem ŋwaane to taa jege kuri. 30Ba déem ma pa se twanno yi Juu tiina balo maama na zoore Pɛ Zeregese paare dim laŋa kam kateira bi de finlei-yarepɛ (127) maama wone to. Twanno tem maa tɛ yazura de chega zegem taane mo. 31Te ta ma bere Juu tiina de ba dwi dem se ba tiŋi da yam konto ba di Purim kuri dem nenɛɛne ka maŋa ná yeini ka yi bene maama wone. Ba wó taa ke nenɛɛne Juu tu Modekayi de ka-pɛ Ɛseta na pɛ-ba ni se ba ke tei to, se ko tɔge ba na maŋe ba ke tei ye ba yeini ba vɔ ni wo-chechɔgɔ ŋwaane tei to.
32Ɛseta ni dem konto déem pɛ se Purim kuri dim chullu tem zege. Ba popone-de mo ba ke tɔnɔ wone.
© 2020, Ghana Institute of Linguistics, Literacy and Bible Translation (GILLBT)