Ɛseta 7
7
Haman na to tei to
1Pɛ Zeregese de Haman ma vo ba zo ka-pɛ Ɛseta tei ne se ba di daane. 2Ba na di ded‑o belei tu baŋa ne ba ti ye ba nyɔ sana to, mo pɛ wom daa bwei Ɛseta o we, “Laam ta n bere-ne n ya na lage se a ke kolo to, se amo wó ke a pa‑m, ko ná maŋe ko ye a paare laŋa kam chichworo de.”
3Ɛseta ma leiri o we, “Pɛ, a keim ná sui n yi, ye ko ná pwoli n wo, se n ke a na wó bwei‑m kolo to n pa-ne. Ko ye se n jwoŋi amo ŋwea se n daare n yage a dwi tiina bam maama se ba taa ŋwe. 4Ko na ye tei to, ba maŋe ba yeigi amo de a dwi tiina bam mo se dé maama na chɔgem dé ti. Ko ya ná ye ba lage se dé ji kabɛ mo, amo ya wó taa chem mo, ko na wo yi se a daane‑m to ŋwaane. Ba boboŋe dem nam ye se debam dwi dem jei tega baŋa ne lela!”
5Pɛ Zeregese ma bwei ka-pɛ wom o we, “Wɔ mo boŋe se o ke wo-balɔrɔ kom konto? O wo yei ne mo?” 6Ɛseta ma leiri o we, “Debam dono wom, o na beeri dé toone to mo ye nɔn-balɔrɔ konto, Haman.”
Haman ma lɛɛre o jei o nii pɛ wom de ka-pɛ wom ferebaa, ye foone tiini de zo‑o. 7Pɛ wom ma zaŋe wɛɛne de bane o nwoŋi pwooni ye o yage sana bam nyɔɔm. O ma vo o zege pɛ sɔŋɔ kapworo ne mɛ teeni na wora to. Haman ma maane we pɛ wom boboŋa jaane se o waare‑o o kikia yam ŋwaane. O ma maŋe diga kam ne se o lwoori Ɛseta se o ja pɛ wom naga se o yé te. 8O ma yɔɔre o vo o to gadwogo kolo ne Ɛseta na tigi da to se o lwoori‑o, de pɛ wom de zege pɛ sɔŋɔ kapworo kom ne o zo diga kam. Pɛ wom na nɛ konto to, mo o we, “Nɔɔno wonto laam boŋe se o zi ka-pɛ wom mo a tete sɔŋɔ ne na?”
O taane dem maŋe de wo to tega ne dedaane pɛ sɔŋɔ tontoŋena na tu ba kwoli Haman yibia. 9Pɛ tontoŋena bam dedoa o yere na ye Harebona to ma ta o we, “Haman maŋe o chwi da-kwollu mo o sɔŋɔ ne, te na dɔra te yi jatwogo de noa ni maŋem kuni finnu to, ye o lei ŋone se yera ne se o ma kuuni Modekayi o go. Wonto déem nam mo ye wolo na jwoŋi nmo o yage to.”
Pɛ wom ma pa ni ye o we, “Véi-na á kwei Haman á lei dáane á go.” 10Ba déem ma kwei Haman ba jwoori ba kuuni de ŋone selo o ya na leigi da-kwollu tem yera ne se o ma o kuuni Modekayi o go to.#Lei 94:23 Pɛ wom wo laam ma to.
© 2020, Ghana Institute of Linguistics, Literacy and Bible Translation (GILLBT)