Ɛseta 6
6
Pɛ wom pɛ se ba zuli Modekayi
1Tete dem konto ne, dɔɔm ba tui pɛ wom yia ne. O ma pa ni se ba ja ba teo pwa yera seina twanno tem ba na yeini ba popone o paare dim kikia ba tiŋi da to ba ja ba ba ba ga se o cheigi. 2Ba na jege tɔnɔ kom ba gare to, ba ma vo ba di mɛ ko na popone we Bigetana de Terese ya boŋe se ba go pɛ wom to baŋa. Banto déem ye pɛ sɔŋɔ dedɛɛra balo na yere o di sem to, ye Modekayi pa se pɛ wom lɔre ba bana yam ni ne.#Ɛseta 2:21-23
3Pɛ wom ma bwei o tontoŋena bam o we, “Modekayi na ke keim-laao konto to, dé zuli‑o tetɛ seeni mo ko ŋwaane?” Ba ma leiri ba we, “Ba wo ke kolokolo ba pa‑o.” 4Pɛ Zeregese daa ma bwei-ba o we, “Amo nakwa bam wone wɔ mo wo ywo-seeni?”
Ko yɔɔre ko ke ko maŋe dedaane Haman yi pɛ sɔŋɔ manchwoŋo kom. O déem ya tu pɛ wom tei se o lwoori chwoŋa mo se ba kuuni Modekayi de ŋone selo o na leigi da-kwollu tem yera ne to. 5Pɛ tontoŋena bam ma leiri ba we, “Haman wo konkɔlɔ kom ne, ye o beeri chwoŋa se o na‑m.” Pɛ wom ma ta o we, “Pa-na chwoŋa se o zo amo tei ne.”
6Haman na zo pɛ wom tei to, mo Zeregese bwei‑o o we, “Amo boŋe se a ke zula mo a pa nɔɔno wodwoŋi, a yi na su o kikia to ŋwaane. Nmo boŋe tɛ mo se a ke a pa konto tu?”
Haman ma boŋe o tete ne we, “Wɔ mo pɛ daa wó taa lage se o ke‑o zula ko ná dae amo yerane?” 7O ma leiri pɛ wom o we, “Pɛ. Nmo yi ná su nɔɔno kikia ye n boŋe se n ke‑o zula, 8se n pa ba kwei n paare gwaaro telo n tete na zoore to, se ba daare ba ja nmo paare sisein-nɔɔno wom ba ba, ye paare yipuga wo ka yuu ne. 9Nmo laam ma‑n beeri n nakwa bam dedoa na ye nɔn-yuu chekke to, se o kwei gwaaro tem konto o zo nɔɔno wom ye o daare o pa se wolo n na lage n ke‑o zula to dɔge n sisein-nɔɔno wom baŋa ne. O maa wó taa jege kotu o kaare teo kom pwooni ne o tɔɔle o we, ‘Nii-na! Pɛ ná boŋe se o ke nɔɔno zula, o wó ke tento mo o pa kotu.’ ”
10Pɛ wom ma ta Haman o we, “Nmo taane dem lana. Nam ke lela n ti a gwaaro tem yiga dedaane a sisein-nɔɔno wom yiga, se n tete ke n na bere tei maama to se dé ma dé zuli Modekayi na ye Juu tu ye o jei pɛ sɔŋɔ manchwoŋo ni ne to. Yé swei se n ke kolo maama n na tage to n pa‑o!”
11Haman ma vo o jwoŋi paare nenɔŋa gwaaro tem dedaane sisein-nɔɔno wom. O ma pa se Modekayi zo gwaaro tem. Modekayi na diini siseiŋa kam baŋa ne to, Haman laam maa tɔge o yiga o jege‑o o beeri o kaare teo kom pwooni maama. O na vei to, o maa tɔɔle o we, “Nii-na! Pɛ ná boŋe se o ke nɔɔno zula, o wó ke tento mo o pa kotu.”
12Ba na kaare teo kom ba ti to, Modekayi ma jwoori o vo o wo pɛ sɔŋɔ manchwoŋo ni ne o toŋa. Haman ma gwoori o tiri ye o ke lela o jwoori sɔŋɔ de chaveera. 13O ma ta o bere o kaane Zerese de o badwonna maama kolo na yi‑o to. O kaane de o badwonna balo na jege swa to ma ta‑o ba we, “Nmo wo maane we n bobo se n ta‑n toe n pae Modekayi mo na? O ye Juu tu mo, ye n ware‑o. O nam wó de‑m tega ne.”
14Ba ya daa ta wo ba lara yam wone mo, ye pɛ sɔŋɔ dedɛɛra bam ba se ba ja Haman ba ke lela ba vo se o di wodi-fɔrɔ kolo Ɛseta na ke to.
© 2020, Ghana Institute of Linguistics, Literacy and Bible Translation (GILLBT)