Ɛseta 5
5
Ɛseta na vei pɛ wom tei ye o ta kolo to
1Ɛseta ni-vɔre dem da yatɔ dɛ dem ne, mo o zo o paare gwaaro tem o laam vo o zo pɛ sɔŋɔ konkɔlɔ kom ne o zege da. Jei sem konto jeeri de paare diga kam. Pɛ Zeregese déem jei o paare yituŋu kom baŋa ne mo o nii diga kam ni dem seeni. 2O ma na we Ɛseta zege konkɔlɔ kom ne. O wo ma pwoli ded‑o ye o tei o sabu-seŋa nacheiga kam o jeeri‑o se o ma zaane‑o. O de ma fɔɔre o yi o tei, ye o dwei ka nabili dem seeni. 3Pɛ wom ma bwei‑o o we, “Ɛseta, bɛ mo daane‑m? Ta n bere-ne kolo n na lage to, se ko ná maŋe ko ye a paare dim laŋa kam chichworo de, amo wó kwei-ka a pa‑m.” 4Ɛseta ma leiri‑o o we, “Pɛ, laŋa ná daare, se nmo dedaane Haman ba amo tei zem se dé di daane. A lage a vo a ti wodi-fɔrɔ yiga abam ŋwaane mo.”
5Pɛ wom ma pa ni se ba ke lela ba bwoŋi Haman se ba vo Ɛseta tei ba di, ne o na tage tei to. Ba ma seene ba vo. 6Ba na di ba ti ye ba nyɔ sana to, pɛ wom ma bwei Ɛseta o we, “Ta n bere-ne n na lage se a ke kolo to, se amo wó ke a pa‑m, ko ná maŋe ko ye a laŋa kam chichworo de.”
7Ɛseta ma leiri‑o o we, “Pɛ, amo na wó lwoori kolo nmo tei ne to mo tento: 8Nmo yi ná sui a kikia yam ye n wo ná dɛ se n ke kolo a na lage to, se nmo de Haman jwa daa jwoori ywo-seeni. Amo ta wó ke wodi-fɔrɔ se abam ba á di. Kanto maŋa ne, a laam wó ta kolo a na lage to a bere‑m.”
Haman bane zaŋe de Modekayi
9Dɛ dem konto ne, Haman na nwoŋi ka-pɛ Ɛseta tei ye o maa viiri to, o wo yɔɔre ko tiini ko pwoli mo. Ko daare, o na nwoŋi pɛ sɔŋɔ manchwoŋo kom ni ne o maa kɛ to, mo o nɛ Modekayi. Wonto maa wo zaŋe wɛɛne, o nam wo kɔre foone de Haman. Konto ŋwaane Haman bane tiini de zaŋe o baŋa ne. 10De ko de, o déem peene o bane mo ye o viiri. O na yi sɔŋɔ to, o ma bwoŋi o badwonna se ba ba o sɔŋɔ, ye o bwoŋi o kaane Zerese o woli da. 11O laam ma ŋɔɔne o bere o tete de o jejegero, de o bu-baara na daga tei, de pɛ na zeiŋi wonto se o saŋe o kwaga pa se teo kom nakwa de naduna maama jege se ba taa kɔre‑o tei to. 12Haman laam ma ta o woli da o we, “Kolo na tiini ko dwoi maama to mo ye ka-pɛ Ɛseta na ke wodi-fɔrɔ se pɛ wom ba o di to, amo yerane mo o bwoŋi se a da a vo. O daa ma ta o we dé ta jwoori jwa ne se dé daa di daane. 13Amo nam ná nɛ tento maama, ye a jwoori a na Juu tu Modekayi na jei pɛ sɔŋɔ manchwoŋo ni ne tei to, tento maama ye kafɛ mo.”
14O kaane Zerese de o badwonna bam maama maa bwɛ ded‑o ba we, “Ko nam ná ye konto, pa se ba chwi da-kwollu na dɔra te yi jatwogo de noa ni maŋem kuni finnu to. Laam lei ŋone te yera ne se jwa tetete, n vo pɛ tei n jwoŋi chwoŋa se n kuuni Modekayi te baŋa ne n go. Ko kwaga ne, n laam wó tɔge de pɛ wom n vo n di dedaane wopwolo.”
Haman ma kwei ba boboŋe dem o ke o yuu ne, ye o pa se ba chwi da-kwoli-dedwaaro se ba wane ba kuuni Modekayi te baŋa ne.
© 2020, Ghana Institute of Linguistics, Literacy and Bible Translation (GILLBT)