Markos 5
5
O gadareno kai ande le sea llavolula
Mt 8.28-34; Lk 8.26-39
1Avile pe o goia rig katar e mora, ande phuv katar e Jerasa. 2Samo so fulisto o Jesus katar e llimia, avilo lete iek lleno kai saia ande le iek duo bilacho, gava lleno likistoia katar e limoria, 3soke vou zivila andre. Ta niko nasti istarela le, ni lanchonenchar. 4But droma phanglea leke va ta i leke porrne lanchonenchar, a vou suako drom drobosarela e lanchura, ta niko nasti achavela le. 5Ta sorro llive ta sorro riat urkila maskar e burdura ta maskar e limoria ta chalavelape e barrenchar. 6A kana dikhla e Jesuse duratar, prastio, ta dia changa angla le, 7ta urkisarda zurale:
¡Na amisao manchar, Jesus, Chavo katar o Del e milosoko! ¡Mangav tutar ando anav e Devleko te na patisare man! 8Vou dela orba gia soke o Jesus phenela leke:
¡Like katar gava lleno, duo bilacho!
9Ta puchla le:
¿Sar ikhardo?
Vou phenda:
Mo anav si lejion, soke sam but.
10Ta mangla but e Jesusetar te na bichalel e duonen avri katar gua foro. 11A sar kotar pase, pe iek rig e burdoki, sea but bale kai jana, 12e duura mangle letar, ta phende leke:
Bichal amen ande bale ta muk amen te da ande lende.
13O Jesus mukla len te den ande bale, ta gola duura likiste katar gua lleno ta die ande bale. Ta e bale sea preko dui milie, prastie karing e mora katar iek jar, ta kote ande mora tasile.
14E llene kai arakhena e balen nasle, ta llele te phenen ando foro ta pe droma so von nakhle ta e llene avile te dikhen so avilaiape. 15Ta kana avile kai o Jesus, dikhle gole llene kai saia ande le o llavolo ta e lejion e Duonengi, kai saia besindo, furiado, ta ande pi golli, ta e llene daraile, 16ta gola llene kai dikhle so nakhla o lleno kai saia ande le e llavolura, ta so avilape e balenchar, phende avere llenenge so nakhle. 17Ondaka mangle e Jesusetar te llaltar kotar.
18Kana o Jesus irisailo kai e llimia, o lleno kai saia ande le e llavolura mangla letar te llal lea. 19A o Jesus nikamla, ta phenda leke:
Llatar kai cho cher, kai chi familia, ta phen lenge sa so cherda chuke o Gazda, ta sar avila leke zalba tutar.
20Gua lleno llelotar ta thodape te phenel ande forura katar e Dekapolis so cherda o Jesus pala le, ta sa chudisaile.
E diskinia kai saia nasuali ta e chorri e Jairoki
Mt 9.18-26; Lk 8.40-56
21Kana o Jesus irisailo ande llimia pe o goia rig katar e mora, chidinaile but llene, ta vou achilo pasa e mora. 22Ta avilo iek katar gola kai gazdarin ande khanlliri e judionengi kai ikhardola Jairo, ta kana dikhla e Jesuse chudiape pe leke porrne, 23ta mangla letar but, ta phenela leke:
Mi chorri merel, aide te thove che va pe late, te sai sastol ta te zivil.
24O Jesus llelo lea, ta but llene llana truial letar. 25A maskar o sueto saia iek diskinia kai saia nasuali, ta cherela desudui burs kai peravela rat. 26Nakhla bari patnia bute doktorenchar, ta jalaia sa pe love lenchar, ta nasti sastarde la, ta llala lake ios mai gore. 27Kana asunda kai dena e Jesuseki orba, goia diskinia avili maskar e llene ta thodape pase pala o Jesus ta dodisarda leko gertachi. 28Soke phenela voi peke:
Samo te dodiu leko gertachi ka sastivav. 29Ta isto kote o rat achilo, ta acharda pe pi esnaga kai sastili katar po nasualipe. 30Ondaka o Jesus thoda sama kai likista letar zor, boldinailo te dikhel pe llene, ta puchla:
¿Ko dodisarda mo gertachi?
31Leke disipulura phende leke:
Dikhe kai o sueto espidel tut katar suako rig, a puche:
¿Ko dodisarda tut?
32A o Jesus pale prezola truial pe, te dikhel ko dodisardaia le. 33Ondaka e diskinia, izdrala daratar, soke llanela so avilape laia, lleli ta dia changa angla le, ta phenda leke sa o chachipe. 34A o Jesus phenda lake:
Chorrie, pala cho pachape avilan sastardi. Llatar esmiro ta sasti katar cho nasualipe.
35Ta kana o Jesus dela orba, avile nesave llene katar o cher e Jairoko; O Jairo saia iek katar e llene kai gazdarina ande khanlliri e judionengi, ta phende e Jairoke:
Chi chorri mulitar. ¿Na joliar ios e Gazda?
36A o Jesus ni thoda lenge sama, ta phenda e Jairoke:
Na dara, samo pacha.
37Ta phenda te llan lea samo o Pedro, o Santiago ta o Juan, o phlal e Santiagoko. 38Kana avile kai o cher e Jairoko ta dikhle e burkania ta e llenen kai rovena ta urkina, 39o Jesus dia andre ta phenda lenge:
¿Soke cheren gachin burkania ta roven gia? E minoni inai muli, voi sovel.
40E llene asaie e Jesusetar, a vou cherda te liken sa avri, ta lia e dade, ta e dea ta e llenen kai sea lenchar, ta die andre kote kai saia e minoni. 41Istarda la e vastetar ta phenda lake:
Talita, kumi kai gua si:
Chorrie, chuke phenav, uste.
42Ondaka e chorri, kai sea lake desudui burs, ustili ta thoda te phirel. Ta e llene chudisaile but. 43A o Jesus phenda lenge te na phenen le nikake, ta mapalal phenda te den la te jal.
Nke Ahọpụtara Ugbu A:
Markos 5: BACHRO
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Biblia ande chib Romani © Sociedad Bíblica Chilena, 2018.