Markos 6
6
O Jesus ando Nazaret
Mt 13.53-58; Lk 4.16-30
1O Jesus llelotar kotar karing po foro o Nazaret, ta leke disipulura llele lea. 2Kana avilo o sabado, thoda te sikavel ande khanlliri e judionengi. Ta but llene kana asunde e Jesuse, chudisaile ta puchenape:
¿Kai sikilo gava lleno pe gachin ezgode? ¿Ta katar ikanda gua bizaipe ta gola bare ezgode kai cherel? 3¿Inai gava o lleno kai cherel ezgode kastune, ta si chavo e Mariako ta phlal e Santiagoko, e Joseeko, e Judaeko ta e Simonoko? ¿Ta ni zivin kate maskar amende i leke phlal?
Ta ni pachana ande lete. 4A o Jesus phenda lenge:#Jn 4.44.
Pe suako rig den liubao iekhe profeta. Samo ande leki phuv ni den le liubao, ni maskar pi familia ta ni ande leko cher. 5Kote nasti cherda ni iek bari ezgoda Devlikani, samo thoda pe va pe nesave nasuale ta sastarda len. 6Ta chudisailo soke gola llene ni pachana ande le ta o Jesus llala kai e forichura kai sea truial ta sikavela. 7Ikharda e desuduie disipulonen, ta thoda te bichalel len po dui llene, ta dia len te gazdarin pe duura bilache. 8Ta phenda lenge te na inllaren niso e dromeke, samo iek rovli. Ta saia te na inllaren ni jape ni love.#Lk 10.4-11. 9Sai thovena sinele, a nasti inllarena premena. 10Ta i phenda lenge o Jesus:
Kana tumen ka den ande iek cher, racharen kote lligo ni ka llantar katar gua than. 11A varende te na avile tumenchar pachivale, ta te na mangle ni te asunen tumen, liken kotar ta chinosaren o prajo katar tumare porrne te dikhen kai ni avila tumenge drago so cherde tumenchar.#Ech 13.51.
12Ondaka e disipulura llele te phenen e llenenge te irinpe karing o Del. 13Ta i tradie bute llavolonen, ta thovena zeitino pe but nasuale ta sastarena len.#Stg 5.14.
O meripe e Juaneko gua ka kristila
Mt 14.1-12; Lk 9.7-9
14O charo o Erodes asunda kai dena orba katar o Jesus, soke leki viasta llelia pe suako rig. A Nesave llene phenena:
O Juan gua kai kristila ustilo katar o meripe, ta goleke vou sai cherel gala bare ezgode.
15Aver llene phenena:#Mt 16.14; Mk 8.28; Lk 9.19.
Vou si o profeta o Elias.
A aver phenena:
Vou si iek profeta, sargo e purane poraukura.
16Kana o Erodes asunda so phenena e llene, phenda:
Gua lleno si o Juan. Me bichaldem te chinen leko soro ta akana ustilo katar o meripe.
17O Erodes cheres e Erodias, bichaldaia te phanden e Juane, ta phenda te phanden le lanchonenchar ande rubie. E Erodias saia zinime e Filipoia, phlal e Erodeseko, a o Erodes zinisailoa laia. 18A o Juan phendaia e Erodeseke:#Lk 3.19-20.
Tu nasti chere chiri e rromi che phlaleki.
19Goleke e Erodias murzila po Juan, ta mangela te mundarel le a nasti cherela le, 20soke o Erodes darala letar, soke llanela kai o Juan saia iek manus chacho ta Santo, ta vou arakhela le. Kana o asunela le ni acharela leke so phenela, a e Erodeske saia drago kana asunela le. 21A e Erodias dikhla kai sai cherel pe piro soke o Erodes nakhela iek burs ios sar kana biandiloia, ta cherda iek baro jape pe mai bare sudonenge ta e llenenge kai sea mai asunde ande Galilea. 22Ondaka e chei e Erodiaski dia kote kai jana ta chelda, ta avila gia drago e Erodeseke ta e llenenge kai besena lea pe sinia, kai o charo phenda e cheake:
Mang mandar sogo kamea, ta me ka dav le chuke.
23Ta jala lake sovel but droma kai ka del la sogo voi mangela letar, i dopas katar o foro kai vou gazdarila. 24E chei likisti kotar, ta puchla pe da:
¿So ka mangav letar?
A laki dei phenda lake:
Mang letar o soro katar o Juan kai kristil.
25E chei lleli oma kai o charo, ta phenda leke:
Mangav te ane isto akana ande iek tepsia o soro katar o Juan kai kristil.
26O charo tristosailo but a pala po alav kai diaia la ta i pala e llene kai sea lea pe sinia, ni kamla te phenel lake iok pe so voi mangla letar. 27Ondaka bichalda iekhe boñiko te anen lete o soro e Juaneko. O boñiko llelo ande rubie, chinda e Juaneko soro 28ta inllarda o soro ande iek tepsia, ta diale e cheake, ta e chei diale kai pi dei.
29Kana e disipulura e Juaneke llangle kai vou mulo, lie leki esnaga ta inllarde le te prajon le.
O Jesus del te jal bute llenen
Mt 14.13-21; Lk 9.10-17; Jn 6.1-14
30Mapalal, e disipulura chidinaile e Jesusea ta phende leke sa so von cherde ta so von sikade. 31O Jesus phenda lenge:
Aven, samo amen te lelpe amendar o chiñipe pe iek than mai esmiro.
Soke sea pe gachin llene kai llana ta avena kai ni resela len o vreme ni te jan. 32Ondaka o Jesus ta leke disipulura llele dur ande iek llimia. 33A but llene dikhle len kana llanatar, ta pinllarde len. Ondaka katar sa e forura prastie incha, ta avile mai oma neko von. 34Kana o Jesus fulisto katar e llimia, dikhla e sueto, ta avila leke zao lendar, soke sea sargo bakre kai inai len chobano, ta thodape te sikavel len but ezgode.#Nm 27.17; 1 R 22.17; 2 Kr 18.16; Jer 50.6-7; Ez 34.5; Zak 10.2; Mt 9.36. 35Pasa e riat, avile kai o Jesus leke disipulura ta phende leke:
Gava than kai sam si pusto ta lel te perel e riat, 36phen e llenenge te llantar pe droma ta ande forichura kai si truial te chinen peke vareso te jan.
37A o Jesus phenda lenge:
Den len tumen te jan.
Von phende leke:
¿Mange te lla te china marrno kai mol le o rado iekhe burseko te da len te jan?
38O Jesus phenda lenge:
¿Pe gachin marrne si tumen? Llan te dikhen.
Kana dikhle, phende leke:
Panch marrne ta dui mache.
39Ondaka phenda te cheren e llenen te besen pe char zeleni, nesave pe iek rig a averen pe aver rig. 40Ta besle po stotina ta po pinda llene.
41Ta o Jesus lia ande pe va e panch marrne ta e dui mache, dikhla ando miloso ta molisailo, phagla e marrne ta dia len kai pe disipulura te fulaven len e llenenchar. Ta fulada i e dui mache sa e llenenchar. 42Saurre jale ta chalile, 43ta katar e kotora kai achile katar o marrno ta e mache pherde lenchar desudui kotariche. 44Gola kai jale katar e marrne sea preko panch milie murusa.
O Jesus phirel upral pe mora
Mt 14.22-27; Jn 6.16-21
45Mapalal, o Jesus cherda te liken leke disipulura ande llimia te nakhen pe o goia rig katar e mora mai oma neko vou, karing e Betsaida, a vou achilo e llenenchar kai llanatar. 46Ta kana lleletar e llene, llelo po burdo te molilpe. 47Kana peli e riat, e llimia saia po dopas katar e mora. A o Jesus achilo korkorre pe phuv, 48ta dikhla kai nasti cherena te llal angle e llimia soke e balav chalavela lenge anglal. A kana lena te pharron e zore llelo lende o Jesus phirindo upral pe mora, ta lela te nakhel pasa lende, 49kana dikhle kai phirela upral pe mora, mislisaile kai saia iek chojano, ta urkisarde 50soke sa dikhena le ta daraile. A o Jesus phenda lenge:
¡Cheren tumenge zor! ¡Me sem, na daran!
51Likisto ande llimia, ta e balav achili, ta von chudisaile but, 52soke ni achardea e bari ezgoda kai cherdaia e marrnenchar, soke lengo mislo saia ando truniariko.
O Jesus sastarel e nasualen katar o foro o Jenesaret
Mt 14.34-36
53Nakhle pe o goia rig katar e mora ta avile ando Jenesaret, ta phangle e llimia pasa e phuv. 54Samo so fuliste katar e llimia, e llene pinllarde e Jesuse. 55Phairde sa goia phuv, ta anena e nasualen ande postelie kote kai asunena kai si o Jesus. 56Ta kaigo llala o Jesus, ande forichura, forura o pe droma, thovena e nasualen po drom ta molinape leke te mukel len samo te dodin iek rig katar leko gertachi, ta sa gola kai dodina le, sastona.
Nke Ahọpụtara Ugbu A:
Markos 6: BACHRO
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Biblia ande chib Romani © Sociedad Bíblica Chilena, 2018.