Markos 4
4
E paramichi katar o simichari
Mt 13.1-9; Lk 8.4-8
1O Jesus pale sikavela pasa e mora, ta sar chidinaile but llene, o Jesus likisto ande iek llimia kai saia ande mora, ta beslo andre, a e llene besena pe phuv.#Lk 5.1-3. 2Ondaka thoda te sikavel len but ezgode ande paramiche.
Kana sikavela len phenela lenge gia:
3Asunen:
Iek simichari llelo te thovel e simiche ande phuv. 4Ta kana thovela len, nesave simiche peletar pasa o drom, ta avile e chiriklia ta jale e simiche. 5Aver simiche peletar maskar e barra, kote kai ni saia but chik, goleke goia simicha barili oma soke ni saia but chik, 6a kana o kham likisto, phabarda la ta sukili, soke ni saia la zile. 7Aver simiche peletar maskar e karrne, ta kana e karrne barile tasade la ta ni dia septelie. 8A aver simiche peletar ande lachi phuv, ta dia septelie soke barili, ta nesave die stotina, aver sovardes, aver tranda katar iek.
9Ta o Jesus phenda lenge:
Ka si len kan te asunen.
¿Soke o Jesus sikavela e paramichenchar?
Mt 13.10-17; Lk 8.9-10
10Kana o Jesus achilo korkorre, gola kai sea pasa e desudui disipulura puchle le so mangela te phenel gole paramichaia. 11Vou phenda lenge:
O Del sikavel tumenge so si gurudino katar pi charoina, a golenge kai si avri phendolpe sa e ezgode ande paramiche. 12Ta gia, mai te dikhen, ni ka dikhen, ta mai te asunen, ni ka acharen, te na irin pe kai o Del te prostil len.#Is 6.9-10.
O Jesus sikavel lenge so phenel e paramichi katar o simichari
Mt 13.18-23; Lk 8.11-15
13O Jesus phenda lenge:
¿Ni acharen so phenel gaia paramichi? ¿A sar ka acharen so phenen sa ogola paramiche? 14O simichari si sargo o lleno kai inllarel o phenel e lachi viasta. 15Si llene kai si sargo e simicha kai pelitar po drom:
Asunen e lachi viasta ta samo so asunen la, avel o Satanas ta ikanel lendar e lachi viasta kai saia thodi ande lengo lio. 16Aver llene si sargo e simicha kai pelitar maskar e barra:
Asunen e lachi viasta ta len la veselimaia, 17a sar inai len zile, oma muken o drom e Devleko ta kana avel e patnia ta kana mangen te maren len cheres e orba e Devleki, jasaren po pachape. 18Aver llene si sargo e simicha kai pelitar maskar e karrne:
Asunen e lachi viasta, 19a e bucha gale zivotoke brigin len but, ta kojadon soke volin o barvalipe ta mangen te avel len sa e ezgode. Ta sa gala ezgode den ande lengo lio, ta tasaven o alav ta ni mukel len te den septelie. 20A si llene kai asunen e lachi viasta, ta len la, ta den petar lache septelie, sargo e lachi simicha kai pelitar ande lachi phuv. Katar gola simiche nesave den petar tranda, ta sovardes, ta stotina katar iek.
Sogo si gurudino ka sikadol
Lk 8.16-18
21O Jesus phenda lenge:#Mt 5.15; Lk 11.33.
¿A so, tu phabare iek memeli te uchare la varesoia o te thovela telal tala o kerveto? Iok, iek memeli si te thodol upre te kletosarel. 22Soke sogo si gurudino ka sikadol, ta sa so cherdol po chorial ka llangliolpe.#Mt 10.26; Lk 12.2. 23Gola kai si len kan, te asunen.
24Ta i phenda lenge:#Mt 7.2; Lk 6.38.
Thoven sama so asunen. Gia sar tumen den averen, isto gia o Del ka del tumen, ta ios mai but. 25Soke gole kai si le, ka avel leke dino mai but, a gole kai inai le, i so si le ka avel letar ikando.#Mt 13.12; 25.29; Lk 19.26.
E paramichi katar e simicha kai bariol
26O Jesus phenda:
Isto gia si e charoina e Devleki, sargo iek manus kai thovel e simiche ande phuv: 27ta ni chitilpe te sovela o te avela llungado o simichari, avela ollivesea o avela orachaia, e simicha sa iek bariol, ta vou ni llanel sar. 28Gua si soke e phuv del petar korkorre:
Mai anglal likel o zelenipe, mapalal galbenil, ta ondaka pherdol kucha ta dikhol o lliu. 29Ta kana o lliu si reslo, ondaka chiden le soke avilo o vreme kai si te chindol o lliu.#Jl 3.13.
E paramichi katar e simicha mostasaki
Mt 13.31-32; Lk 13.18-19
30Ta i phenela o Jesus:
¿Pe so mizil e charoina e Devleki, o prema so ka phena kai si? 31E charoina e Devleki si sargo e simicha katar e mostasa, voi si e mai minoni katar sa e simiche kai si pe phuv: 32a kana si thodi ande phuv, bariol ta cherdol e mai bari katar o vostano, ta cherdon bare krangrura gia bare kai e chiriklia cheren pe kuibura telal katar laki senka.
Sar sikavela o Jesus e paramichenchar
Mt 13.34-35
33Ta o Jesus sikavela len e poroka ande but paramiche sargo gaia, prema so sai acharena. 34Suako drom kai sikavela len cherelale samo e paramichenchar, a pe disipulonen sikavela len sa po chorial.
O Jesus achavel o bursin
Mt 8.23-27; Lk 8.22-25
35Isto gua llive, kana peli e riat, o Jesus phenda pe disipulonenge:
Aven pe o goia rig e moraki.
36Ondaka mukle e llenen ta inllarde e Jesuse isto ande llimia kai vou saia, ta i sea aver llimie kai llana lea. 37Ta avilo iek baro bursin balaviaia kai cherela te den e valura andre ande llimia, pe gachin kai pherdola. 38A o Jesus sovela palal pe iek serand. Llungade le ta phende leke:
¡Kovachi! ¿Inai chuke briga kai tasiva?
39O Jesus ustilo ta dia pe balavia, ta phenda e morake:
¡Achi! ¡Na miskosao!
Ta ni asundili ios e balav, ta avilape iek baro esmiripe. 40Ta o Jesus phenda e disipulonenge:
¿Soke darailen? ¿Llik kate inai tumen pachape?
41Ondaka avila lenge but bari dar, ta chudinape ta phenena iek avereke:
¿Ko si gava kai llik e balav ta e mora kanden le?
Nke Ahọpụtara Ugbu A:
Markos 4: BACHRO
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Biblia ande chib Romani © Sociedad Bíblica Chilena, 2018.