Kaabka 9
9
1Da naanika ale taam la, Moosis yaa wi Aaron ale wa nidoabilisaŋa ale Izirali nisɔmma. 2Wa yaa weeni Aaron ayen yaali lalikbili a magsi biem tiirim ale padiak a magsi meena juka tiirim. Ba kan ta jomi ya a pai te Naawen. 3Abe fi weeni Izirali demma ayen, ba yaali buduk a magsi biem tiirim. Pa bein naabiik ale bein pabiik ate ba kan ta jomi ya a magsi meena juka tiirim. 4Ba yaali naab ale padiak a magsi suiyɔgni tiirim a ta jam te Naawen. Ba gum ŋandiinta tiirim du. Ba dam kpaam du. Jinla Naawen ale pai wadek a sak ni.
5Ba yaa ta ŋan baai meena ate Moosis ayen ba yaali la a cheŋ Tuka Viuku niŋ ate Izirali demma meena a jam zaani Naawen niŋ. 6Ate Moosis yaa weeni ayen, <<Naawen ale weeni ayen ni nye diila ale nna ate ni nya wa nyaksika.>>
7Moosis yaa weeni Aaron ayen, <<Cheŋ kuŋkuŋku jigini a pai fi biem tiirimu ale juka tiirimu a nye biem duisi basika a te fidek ale nuruma. Pai nuruma tiirimu a te Naawen a nye biem duisi basika a te ba ase Naawen ale weeni diila.>>
8Aaron yaa jam dakanni jigi a tɔgri naabiika ale ka biem tiirim la a te wadek. 9Wa bisaŋa yaa ta ziimu a jam te wa, ate wa pai wa nandummu a su du a pai nyo kuŋkuŋku nyiilaŋa nyiŋ. Ziim buui ale tali la wa pai kpiiri a basi juka dakanni tɛŋ. 10Juka kuŋkuŋku zuk yaa ju kpapalaŋa ale yiimaŋa ale paŋni ale ka kauk kuui ale moata yiimaŋa la ale ka biem tiirim la, a magsi chaab ale Naawen ale weeni diila. 11Lammu ale gbainni wa ta nyini ka peelim a ju ba meena.
12Wa yaa ŋman tɔgri juka tiirimu duŋka. Wa bisaŋa yaa pai ziimu a te wa ate wa boori basi juka kuŋkuŋku kabtaŋa meena. 13Ba yaa pai juka tiirimu lam gela, a te wa ale zukku, ate wa ju kuŋkuŋku zuk. 14Ate wa ŋman sugri duŋka ponni po ŋantaŋa ale naŋsaŋa a pai vi juka tiirimu zuk a ju dakanni zuk.
15Aaron yaa ta nuruma tiirimu a jam. Wa yaa pai buuku a magsi nuruma biem tiirimu a yaa tɔgri a te magsi biem tiirimu ase wa le liŋ a nye diila.
16Wa yaa ta juka tiirimu a jam te va ku le magsi diila. 17Wa yaa ta ŋandiinta tiirimu mɛ a jam a nye nisa nɔi a ju dakanni zuk a gum saluiku juka tiirimu po.
18Wa tɔgri naamu ale padiaka mɛ ase suiyɔgni tiirim la a te nuruma. Wa bisaŋa yaa pai ziimu a te wa ate wa boori basi kuŋkuŋku kabtaŋa meena. 19Ate ba yaa yeeri naamu ale padiaka kpapalaŋa, juiku kpapalaŋa, kpapala ŋaai ale lik la, yiimaŋa ale paŋni kauk kuui ale moata yiimaŋa la, 20ba yaa pai ba dɛ a vi kuusini zuk ate Aaron a ju kpaata ŋantaŋa de kuŋkuŋku zuk. 21Aaron yaa zak kuusini ale juga naŋka a sak Naawen ase zak sakka tiirim la a magsi chaab ale Moosis ale weeni diila.
22Aaron yaa zak wa nisimaŋa a tuk nuruma nyiŋ a niak ba. Wa pai biem tiirimu ale juka tiirimu ale suiyɔgni tiiritaŋa a te nueri la wa yaa siŋ tɛŋ.
23Moosis ale Aaron yaa jo Tuka Viuku po. Ba ale ŋman nyini la, ba yaa niak nuruma ate Naawen pai wa nyaksika a sak nuruma meena. 24Bolim yaa nyini Naawen jigi a jam dɛ juka tiirimu ale kpapalaŋa kuŋkuŋku zuk. Ate nuruma meena ale nya dila la, ba yaa nuem ale suipeentik ale koori tɛŋ a te wa zula.
Nke Ahọpụtara Ugbu A:
Kaabka 9: BWU
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, Ghana Institute of Linguistics, Literacy and Bible Translation