Kaabka 8
8
1Naawen yaa weeni Moosis ayen, 2<<Ta Aaron ale wa nidoabilisaŋa, ale ba ŋantaŋa, ale bobika kpa buui ate ba kpiiri a nyo zuk po la, ale lalik kaai ale ka biem tiirim la ale padaasa siye ale boroborok kuui ale kan ta dabinta la ale kpanjɔk. 3Abe fi yaa tigsi nuruma meena viuku nansuiŋku nɔi.>> 4Moosis yaa nye Naawen ale weeni ayen wa nye diila ale tigsi nuruma meena tuka viuku nansuiŋku nɔi.
5Moosis yaa weeni nuruma ayen, <<Naawen ale weeni ayen ni nye diila ale nna.>> 6Moosis yaa ta Aaron ale wa nidoabilisaŋa a jam niŋ a so ba ale nyiam. 7Wa yaa pai tɛŋ garuk woŋku a jo Aaron ale pai garuk pali a bobi wa chiaka. A yaa pai ŋmazuk garuk woŋku a jo vi du. A ŋman pai garuk genni a vi du, a yik garuk genni garuk panni a bobi wa chiaka. 8A pai kuusini garuk panni a vi kuusini zuk, a yaali Urim ale Tummim a nyo ku lɔkka po. 9A pai zutɔkka a vuk wa zukku po, a pai ligmɔniŋka jatanlaŋka a vuk zutɔkka zuk a va chaab ale Naawen ale weeni Moosis diila.
10Moosis yaa pai bobika kpaamu a boori basi viuku nyiŋ ale jaab meena ale bo ku po la ate ba chim tuilum ŋanta. 11Wa misi kpaamu mɛ basi juka kuŋkuŋku zuk buyopɔi ale boori basi kuŋkuŋku ale ku ŋantomtaŋa zuk ale nisa sugrika ale wa jazaanimu zuk ate ba chim tuilum ŋanta, 12ale kpiiri bobika kpaamu mɛ a basi Aaron zukku po a bobi wa ate wa ta tuilum a te Naawen. 13Ate wa yaa ŋman ta Aaron nidoabilisaŋa a jam niŋ a pai tɛŋ garuk woŋta a jo ba. A pai garuk pala a bobi ba chaasaŋa ale pai zutɔksa vuk ba a va chaab ale Naawen ale weeni Moosis diila.
14Moosis yaa jam pai lalikka ale ka biem tiirim la, a te ate Aaron ale wa nidoabilisaŋa a pai ba nisaŋa a vi lalikka zuk. 15Moosis yaa jam tɔgri lalikka a pai nandub a tiak ziimu a basi juka kuŋkuŋku nyiilaŋa zuk a duisi ku. A kpiiri ziim buui ale tali la a basi juka kuŋkuŋku tɛŋ. Wa basi ate di ta tuilum a nye biem duisi basika. 16Moosis mɛ a yeeri kpapalaŋa ale puuka ŋanta nyiŋla, paŋni kauk ale yiimaŋa ŋayema ale kpapalaŋa a ju kuŋkuŋku zuk. 17Alege lalikka ale ka gbainni ale lammu ale puutaŋa wa ta nyini ba boka jigini peelim a ju ase Naawen ale weeni Moosis diila.
18Moosis yaa ŋman pai padiaka ale ka meena juka tiirim la a te ate Aaron ale wa nidoabilisaŋa pai ba nisimaŋa a vi ka zukku zuk. 19Moosis yaa tɔgri padiaka a boori ziimu a basi juka kuŋkuŋku kabtaŋa meena. 20Wa yaa boani padiaka alege ju ka zukku ale lataŋa ale kpapalaŋa. 21Wa sugri puuka po ŋantaŋa ale naŋsaŋa a yaa ju padiaka meena juka kuŋkuŋku zuk ase tiirim la. Ku ka juka tiirim a te Naawen, nyum buui ale masa la, tiirim ate ba nye ale bolim a te Naawen a va chaab ale wa ale weeni Moosis diila.
22Moosis yaa ŋman pai padiak kinkala kaai ale ka bobika padiak la, a te ate Aaron ale wa nidoabilisaŋa a pai ba nisimaŋa a vi zukku. 23Moosis tɔgri padiaka a pai ziimu gela a sa Aaron juga tunni juijui ale baasa la. Wa pai sa wa juga nisaŋa nandub dueku abe wa sa wa juga naŋka nandub dueku. 24Moosis a ŋman ta Aaron nidoabilisaŋa a jam niŋ a pai ziimu a sa ba juga tueŋa, juijui ale baasa la wa pai sa ba juga nisimaŋa nandub duataŋa abe wa sa ba juga naŋsaŋa nandub duataŋa. Abe wa pai ziimu a boori basi juka kuŋkuŋku kabtaŋa meena. 25Wa pai kpapalaŋa, juiku ale ta kpapala la ale kpa buui ale bo puuka ŋantaŋa nyiŋla, ale paŋni kauk ale moata yiimaŋa la, ale ŋa kpapalaŋa ale juga kɔsukku. 26Boroborok kuui ale kan ta dabinta a bo busika po a za Naawen niŋ la, Moosis yeeri boroborok kunyi ale kuui ale kan ta kpaam la, ale boroborok jetik. Wa pai ba dɛ a vi kpapalaŋa ale juga kɔsukku zuk. 27Wa yaa pai bade meena a nyo Aaron ale wa nidoabilisaŋa nisima po a yulum Naawen niŋ ase yulumka tiirim la. 28Moosis yaa ŋman tuesi ŋantaŋa ba nisima po a pai vi juka tiirimu zuk a ju juka kuŋkuŋku zuk. Ku ka kaabteerɔ bobi kaai ate nyummu a masa a te Naawen la. 29Wa yaa pai kuusini a yulum a sak a va chaab ale Naawen ale weeni Moosis diila. Moosis charuk ale la bobika tiirimu po.
30Moosis yaa pai bobika kpaamu ale ziimu gela kuŋkuŋku zuk a misi basi Aaron ale wa gattaŋa nyiŋ ale misi basi wa nidoabilisaŋa ale ba gattaŋa nyiŋ. Wa yaa basi ate Aaron ale wa gattaŋa ale wa nidoabilisaŋa ale ba gattaŋa a ta tuilum a te Naawen tuimaŋa.
31Moosis yaa weeni Aaron ale wa nidoabilisaŋa ayen, <<Ni dik lantaŋa Tuka Viuku nansuiŋku nɔi a ŋɔbi dula ale bobika tiirimu boroboroku ale bo busika po la, a va chaab ale Naawen ale weeni ayen, Aaron ale wa nidoabilisaŋa a ŋɔbi la. 32Ju lam tii ale boroborok tii ale tali la. 33Ni kan basi Tuka Viuku nansuiŋku ate ku ga paari daa ŋayopɔi. Se ni bobika daaŋa a nin nueri. Ni bobika daaŋa a paari ka ŋayopɔi. 34Dii ale nye jinla la ka Naawen ale weeni a magsi ni nye biem duisi basika. 35Ni bo Tuka Viuku nansuiŋku yok ale kantueŋ ate ku paari daa ŋayopɔi. Ni nye Naawen ale weeni diila ate ni kan kpi. Naawen ale weeni ayen mi nye diila ale nna. 36Dila nyiŋ Aaron ale wa nidoabilisaŋa yaa nye wari meena ate Naawen a weeni va Moosis la.
Nke Ahọpụtara Ugbu A:
Kaabka 8: BWU
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, Ghana Institute of Linguistics, Literacy and Bible Translation