Kaabka 10
10
1Aaron nidoabilisaŋa Nadab ale Abiyu yaa pai jabuui ate ba pai a yeeri bolim la a yaa yeeri bolim a pai ŋan baai nyum ale masa la a nyoro. Ba taka bolim chaŋ a jam Naawen niŋ, alege an va wa wanni la. 2Bolim yaa nyini Naawen jigi jam dɛ ba dula Naawen niŋ. 3Moosis yaa weeni Aaron ayen, <<Dii ate Naawen a jam biisi a weeni ayen, <Baai ale a jam mi jigi la suŋsuŋ M le sak ayen m ta tuilum, nuruma meena niŋ M le nya zula.> >> Alege Aaron nye diki.
4Moosis yaa wi Misael ale Elzafan Aaron kowa suoku Uzziel nidoabilisaŋa a weeni ba ayen, <<Ni jam dɛ a pai ni suataŋa tuka jigini niŋ a ta nyini peelim.>> 5Ba yaa jam yik ba gattaŋa a vuuri ba a ta nyini peelim. Baai ale pai ba la a nye kama a va Moosis ale weeni diila.
6Ate Moosis yaa weeni Aaron ale wa nidoabili sinsila Eleaza ale Itamar ayen, <<Ni kan basi ni zuisaŋa dila, ni bɛ kan cheeri ni gattaŋa, dan kan daa di ni le kpi ate Naawen sui a puuri ale nuruma meena. Alege fi dɔkdemma ale Izirali demma a baga a kum baai ate Naawen a ko ale bolimu la kama. 7Ni kan diem basi Tuka Viuku nansuiŋku dan kan daa di ni le kpi, dii nyiŋla Naawen a bobi ni kama.>> Ba yaa nye Moosis ale weeni ba diila.
8Naawen yaa weeni Aaron ayen, 9Fi ale fi nidoabilisaŋa a kan nyu da pagriga yaase da buui ale kum ya diipo meena ni a jo Tuka Viuku po la, dan kan daa di ni le kpi ka ŋmarisi kaai ale ka doa a magsi nama ale ni gaŋsa a ta cheŋ. 10Ku a fɛ ate ni gaari tuilum ŋanta a nyini ŋankoa po, abe ni gaari ŋan naliŋsa ale ŋan daŋtisa tɔgatɔga. 11Sak Izirali demma meena ŋmarisi sii ate Naawen a te Moosis ate wa te ni la.
12Moosis yaa weeni Aaron ale wa nidoabili sii ale tali la, Eleaza ale Itamar ayen, <<Ŋandiinta tiirimu ate ni ju ale bolim te Naawen ate ti tali la, ni dɛ ti kuŋkuŋku tɛŋ ni kan nyo dabinta du. Ka ŋandiin tii ale ŋmasi ta tuilum. 13Ni dɛ ŋandiintaŋa dɛ tuilum jigi, dii nyiŋla ka fi ale fi nidoabilisaŋa charuk ale la tiirim buui ate ba ju ale bolim a te Naawen la po. Naawen ale weeni mi diila ale la. 14Alege fi ale fi nidoabilisaŋa ale fi liema a baga a ŋɔbi duŋka kuusini ale naŋka ate fi zak sak la. Ni ŋɔbi bu juijui ale nala la. Izirali suiyɔgni tiirimu po fi ale fi nidoabilisaŋa charuk ale la. 15Naŋka ate fi pai te la ale kuusini ale kpapalaŋa ate fi zak sak Naawen la. Ka fi ale fi nidoabilisaŋa daa meena charuk ale la ate Naawen a weeni la.>>
16Moosis ale bek buuk kuui ale ka biem tiirim la wari la, wa yaa nya ayen ba ju ku kama, ate wa sui a puuri ale Aaron nidoabili sii ale tali la, Eleaza ale Itamar a yaa bek ayen, 17<<Ka boa ale soa ate ni an ŋɔbi biem tiirimu duŋka Wen yenni po? Ka tuilum tiirim ate ba pai te ni ayen ni nye biem duisi basika ate nuruma chivieŋa a cheŋ. 18Ziimu ale kan jo Wen yenni po la, ni ti ŋɔbi buuku ka Wen yenni po ase Naawen ale weeni diila.>>
19Aaron yaa tulisi Moosis ayen, <<Jinla ba pai ba biem tiirimu ale juka tiirimu a te Naawen, alege wieŋa de chaab a nye mi nya kama. Ase mi dan poom ŋɔbi biem tiirimu duŋka kama jinla Naawen sui ti peenti kama?>> 20Moosis ale wom nnala la, wa suinni yaa yɔk.
Nke Ahọpụtara Ugbu A:
Kaabka 10: BWU
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, Ghana Institute of Linguistics, Literacy and Bible Translation