Kaabka 7
7
1<< <Sinsaga ale nna a magsi chaab ale nyemagsika tiirim buui ale ŋmasi ta tuilum la. 2Nyemagsika tiirimu a magsi ba tɔgri ka juijui ate ba a tɔgri juka tiirimu duŋka la. Abe ba pai ziimu a boori basi juka kuŋkuŋku kabtaŋa meena. 3Duŋka kpapalaŋa meena se wa pai te Naawen. Ka juiku kpapalaŋa ale kpapalaŋa ŋaai ale bo ponni po la, 4ale yiimaŋa ale kpapala ŋaai ale bo ŋa nyiŋla, a moata chiaka jigini la, ale paŋni kauk kuui ale moata yiimaŋa la. 5Kaabteerɔwa a ju ba meena ale bolim juka kuŋkuŋku zuk a te Naawen. Ka nyemagsika tiirim. 6Nidoa waai meena ale nyini kaabteerɔwa dɔkdemma po la a baga a dɛ kama. Alege se ba dɛ jigi dii ale ta tuilum. Tiirimu a ŋmasi ta tuilum kama.
7<< <Sinsak ŋala dek ale a magsi chaab ale biem tiirimu ale nyemagsika tiirimu. Tiiritaŋa dɛ ka kaabteerɔ waai ale a nye biem duisi basika ale ti la ale soa. 8Kaabteerɔ waai ale pai waai meena juka tiirim a te Naawen la ale soa gbainni. 9Ŋandiinta tiirim buui meena ate bolim wuluk a nak yaase ba a dik chari po yaase taasi tanlaŋ po la, kaabteerɔ waai ale pai a te Naawen la ale soa. 10Ŋandiinta meena tiirim ate kpaam dam du yaase ba ka ŋan kosa la, ba meena ka Aaron nidoabilisaŋa ale magsi ba dɛ a soa se chaab la.
11<< <Sinsaga ale nna a magsi chaab ale suiyɔgni tiiritaŋa, waai a nin pai a te Naawen.
12<< <Wa daa te ase ka jiam teka la, wa te duŋka ale boroborok faasiŋ ate kpaam a dam du ale ka dabinta ale boroborok kuui ate ba sa ale kpaam ale ka dabinta ale zom naliŋ maasa ate ba nye nalimnyiini ale kpaam. 13Ase wa da a nye suiyɔgni tiiritaŋa kaabka ale jiam teka ku a magsi kama ayen wa te wa tiirimu ale boroborok kuui ate dabinta a bo ku po la. 14Wa ta tiirimu boroborok meena kunyi a jam ase cheesika la a te Naawen. Kaabteerɔ waai ale boori suiyɔgni tiiritaŋa kaabka ziimu a basi juka kuŋkuŋku zuk la ale soa. 15Alege suiyɔgni tiiritaŋa kaabka lammu, a magsi ka ba ŋɔbi dai dii danni ate wa nye kaabka la. Wa kan basi ate vari veenti bu.
16<< <Alege kaabka tiirimu a dam ka pumpuulima yaase ka cheesika tiirim, ku a magsi ba ŋɔbi bu ka dai dii danni ate wa nye kaabka la, vari a dan veenti buui ale tali la ni ŋɔbi. 17Alege kaabka lammu a dam boro a paari daa ŋata wa ju bu ale bolim. 18Suiyɔgni tiiritaŋa kaabka lammu a dan paari daa ŋata ate waai ŋɔbi bu. Waai ale te tiirimu la, Nyɔnɔwa a kan tuesi wa, wa kan nya nyuenta, diila bu an welema. Waai ale a ŋɔbi la ale nam ku nyiŋ.
19<< <Lammu a dan tiri jabuui ale daŋ la, ni kan ŋɔbi bu; ni ju bu ale bolim. Alege lam buui ale tali la nuru waai meena ale nala la, a baga a ŋɔbi bu kama. 20Alege nuru waai ale a ŋɔbi lam buui ate ba pai nye suiyɔgni tiiritaŋa kaabka la kaai ate Naawen soa la, wa le taŋ wadek la nyiŋ, nuru wala ku a magsi kama ayen ba yeeri wa ate nyini wa nuruma po a nyini. 21Ase nuru waai a dan tiri jabuui ale daŋ la, ku ka nurubiik daŋka yaase duŋ kaai ale daŋ yaase jabuui ale daŋ ale bie, a yaa ŋɔbi suiyɔgni tiirimu lammu ate Naawen a soa la, nuru wala choawa ba yeeri wa wa nuruma po.> >>
22Ate Naawen a yaa biisi ale Moosis ayen, 23<<Biisi ale Izirali demma ayen. Ku an magsi ayen ni ŋɔbi naab yaase posuk yaase buuk kpapala. 24Duŋ kaai ale kpi la kpapalaŋa yaase duŋ kaai ate duŋsa si chaab a ko la kpapalaŋa ni baga a pai a nye wa yoŋ kama, alege ku kan magsi ayen ni dɛ bu. 25Nuru waai a dan ŋɔbi bolim tiirimu kpapalaŋa ate Naawen soa la, waai ale a dɛ bu la ba yeeri wa a ta nyini wa nuruma po a nyini. 26Kauk kuui meena ate ni boro la ku kan, magsi ayen ni dɛ jayirim yaase duŋ ziimoa ku dan poom ka diidii ya. 27Nuru waai ale a dɛ ziim la, ku a magsi kama ayen ba yeeri wa mɛ a ta nyini wa nuruma po a nyini.>>
28Ate Naawen a yaa biisi ale Moosis ayen, 29<<Biisi ale Izirali demma ayen, <Waai ale a nye suiyɔgni tiiritaŋa kaabka a te Naawen la a magsi wa yeeri tiirimu a nyini ka wa suiyɔgni kaabka tiiritaŋa po a jam te Naawen. 30Wa pai wadek nisa a nye juka kaabka tiirimu a te Naawen. Wa ta kpapalaŋa ale kuusini a jam, a zak kuusini yulum Naawen niŋ ase yulumka tiirim la a te Naawen. 31Kaabteerɔwa a pai kpapalaŋa a ju kuŋkuŋku zuk, alege kuusini ka Aaron ale wa nidoabilisaŋa ale soa. 32Fi magsi fi te kaabteerɔwa ka juga kɔsukku ate nyini fi suiyɔgni tiirimu kaabka ate fi nye la po. 33Kaabteerɔwa waai ale ka Aaron nidoabili la a pai suiyɔgni tiirimu ziimu ale kpapalaŋa a te la ale soa juga kɔsukku ase wa charuk la. 34Izirali demma suiyɔgni tiirimu po, mi pai kuusini ate ba pai yulum la kɔsukku ate ba pai a te ka kaabteerɔwa Aaron ale wa nidoabilisaŋa ase ba daa meena charuk la a nyini a Izirali demma jigi.> >>
35Ba dɛ ka baai ale magsi Aaron ale wa nidoabilisaŋa nyini a soa a ta nyini bolim meena juka tiirim ate Naawen a nyini dai dii danni ate ba lueri ba ase kaabteerɔba la. 36A nyini dai dii danni ate ba lueri ba la, ate Naawen a weeni Izirali demma ayen ba ŋmarisi ase ba daa meena charuk la taam wuu.
37Sinsak ŋaai ale magsi chaab ale meena juka tiirim ale ŋandiinta tiirim ale biem tiirim ale nyemagsika tiirim ale kaabteerɔ bobika tiirim ale suiyɔgni tiirim la ale nna 38tii ate Naawen a jam weeni Moosis diipo ate wa jam bo Sinai Guuku zuk la, ayen Izirali demma a pai ba tiiritaŋa a te Naawen Sinai Gɔnni po la.
Nke Ahọpụtara Ugbu A:
Kaabka 7: BWU
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, Ghana Institute of Linguistics, Literacy and Bible Translation