Kaabka 11
11
1Naawen a yaa ŋman biisi ale Moosis ale Aaron a weeni ba ayen, 2<<Biisi ale Izirali demma ayen, <Duŋsaŋa de meena ale bo tɛŋka po la, sii ate ni baga a ŋɔbi la ale nna. 3Jaabuuri meena ale ta naŋsaba la, ate naŋsabaŋa a labi buye alege a guli a chaam la alege chim duŋ la, ni baga a ŋɔbi ka lammu kama.
4<< <Alege ku an magsi ni ŋɔbi si dɛ. Duŋsa gela ale boro a guli a chaam alege si naŋsabaŋa an labi ya. Si gela naŋsabaŋa a labi alege si kan guli a guli a chaam. Ku a fɛ kama ayen ni kan ŋɔbi si. Laalaakomi a guli a chaam kama alege ka naŋsaba, nama jigi di ka ja daŋtik a te ni. 5Siseri a guli a chaam kama alege ka naŋsaba, di ka ja daŋtik a te ni. 6Suom mɛ a guli a chaam kama alege bu ka naŋsaba, bu ka ja daŋtik a te ni. 7Deri a ta naŋsaba kama ate ŋa labi buye alege kan guli a chaam, di mɛ ka ja daŋtik a te ni. 8Ni kan ŋɔbi si lantaŋa yaase si dan kpi ni tiri si nyiŋka, ba ka ŋan daŋtisa a te ni.
9<< <Jaabuui meena ale bo nya kpienta po ale belinaŋsa po la, ni baga ŋɔbi ŋan baai ale ta pie ale pagta la kama. 10Alege jabuui ale bo nya kpienta po yaase belinaŋsa po a ka pie ale pagta la, ba bo ŋan fiisa ale a cheŋ ale chaab po yaase ba bo ŋan yona po ni a kisi ba. 11Ase ba ale ka kisuk ŋanta a te ni la. Ku kan magsi ayen ni ŋɔbi ba yaase ni tiri baai ale kpi la. 12Jaabuui ale bo nyiam po ate wa ka pie ale pagta la ni a kisi ba.
13<< <Alege ni a kisi nuinsaŋa gela. Ŋan yirintaŋa dɛ a be le jiiruk ale duiŋ ale duiŋ sobluk ale 14kpaluŋchiak mɔnuŋ ale kpaluŋchiak sobluk buuri meena ale 15tagaaruk buuri meena ale 16poinaab ale viiuk kuui ale a nye ase ku ta nyiila la ale jumyigrik ale kpaliŋ buuri meena, 17ale viiuk kanankuniŋ ale amaavak ale viiuk kpioŋ ale 18viiuk peeluk ale gɔi viiuk ale takaribayauk ale 19jumbaliiruk ale jumyigrik ale chiintain ale jinjaanuŋ.
20<< <Ŋan yirin tii meena ale ta kinkaŋŋa ale ta naŋsa sinaansi a cheŋ la ni a kisi ba. 21Alege ŋantaŋa de ni baga ŋɔbi ba kama ate nyini ŋan baai meena ale ta kinkaŋŋa ale ta naŋsa sinaansi a cheŋ la. Baai naŋsaŋa ale tom chaab ate ba a jomisi a bo tɛŋka po la ni a ŋɔbi. 22Ŋantaŋa de po ni baga a ŋɔbi tintue buuri kama ale paansa ale nanchoŋta. 23Alege ŋan yirin tii meena ale ta naŋsa sinaansi la ba ka kisuk ŋanta a te ni.
24<< <Ni le daŋ nidek ase ni nin tiri ŋantaŋa de, ba le nye ate ni daŋ. Ase waai a dan tiri jakpiuk wa a daŋ ka wadek a ga paari wen siŋka. 25Waai a dan tiri jakpiuk se wa sugri wa kɔlimaŋa abe wa daŋ a ga paari wen siŋka.
26<< <A magsi chaab ale duŋ sii meena ale ta naŋsaba alege naŋsabaŋa an labi yaase si kan guli a chaam la, ba ka ŋan daŋtisa a te ni. Waai ale a tiri si la mɛ a daŋ ka wadek. 27Duŋ sii meena ale ta naŋsa sinaansi a cheŋ ale sii ale a cheŋ ninyeensa zuk ka ŋan daŋtisa a te ni, waai ale a tiri duŋ kpiuk la a daŋ ka wadek a ga paari wen siŋka. 28Nuru waai a dan tiri duŋ kpiuku ku a magsi ka wa sugri wa gattaŋa, wa le daŋ ka wadek a ga paari wen siŋka si ka ŋan daŋtisa a te ni.
29<< <Si de ale daŋ a te ni a gum chaab ale sii ale pai si lɔŋŋa a vuuri tɛŋ la, ŋanta bala abe le: Tueruk ale ŋooŋ ale baŋ kpieŋsa buuri meena ale 30kasilik ale wuri ale baŋ fiisa ale kasoluk ale bunoruk. 31Bade meena ale a cheŋ ba lɔga zuk la a daŋ kama a te ni. Waai a dan tiri jaab kpiuk kula wa daŋ ka wadek a ga a paari wen siŋka. 32Ase ba wanyi a dan kpi a lo jaab zuk, jabula ale ka jaab waai la wa mɛ a daŋ kama. Ba dan poom pai ka daata nye wa yaase garuk yaase gbana yaase wa ka boorik yaase ni pai lusi nyiam po, wa daŋ kama a ga a paari wen siŋka ate wa yaa nala. 33Ba wanyi a dan lo liik po jabuui meena ale bo ka po la daŋ kama, ku a fɛ kama ate ni mobi liikka. 34Ŋandiin tii ate ni a dɛ ate nyiam a bo ti po samɔniŋka po la a daŋ kama, ŋan ŋaasa meena ate ni a nyu ka po la a daŋ kama. 35Jaab kpiuku ale a tiri jabuui meena la jabula a daŋ kama. Ku dan poom tiri daaniŋ yaase samɔniŋ kaai ate ba pai a dik la ba kaasi si. Ba daŋ kama. Ni nya ba ase ba daŋ kama la. 36Alege bulik yaase vili ate ba a ŋari nyiam du la a nala kama, alege waai ale a tiri jakpiuku de wanyi la a daŋ kama. 37Alege jakpiuku a dan lo ŋan buura meena ate ba a bori la po, ŋa nala kama. 38Nyiam a dan bo bieŋa po ate jakpiuku a lo ŋa po ŋa daŋ kama a te ni.
39<< <Alege duŋ sii ate ni a ŋɔbi la kanyi a dan kpi, waai ale tiri jakpiuku la a daŋ kama a ga paari wen siŋka. 40Waai ale ŋɔbi jakpiuku la a sugri wa gattaŋa kama, wa a daŋ ka wadek a ga paari wen siŋka. Waai ale a pai jakpiuku la ku a fɛ kama ate wa sugri wa gattaŋa abe wa chim waai ale daŋ wadek a ga paari wen siŋka.
41<< <Jaabuuri meena ale a cheŋ tɛŋka zuk la ka kisuk ŋanta, ni kan ŋɔbi ba. 42Ni kan ŋɔbi jabuui ale cheŋ tɛŋka zuk la, wa cheŋ wa lɔgni zuk yaase naŋsa sinaansi yaase naŋ boari ku a kisi kama. 43Ni kan daŋ nidek ale ŋantaŋa de. Ni kan basi ate ŋantaŋa de a daŋ ni yaase ni tiri ba a daŋ. 44Mi ale Naawen ni Wenni. Ni gaari nidek a jam m jigi abe ni ta tuilum, ale mi a ta tuilum kama. Ni be kan chim baai ale daŋ la a ta va chaab ale ŋan baai ale a cheŋ tɛŋka zuk la. 45Ale ka Mi ale Naawen dii ale ta ni a nyini Ejipiti tɛŋka po a nyini ayen m chim ni Wen. Dila nyiŋla ni ta tuilum ale mi a ta tuilum kama.
46<< <Sinsaŋŋa a ni la a magsi chaab ale duŋsaŋa ale nuinsaŋa ale jaab meena ale bo nyiam po la ale baai meena ale a cheŋ tɛŋka zuk la. 47Ku a fɛ ate ni a gaari ŋan daŋtisa ale naliŋsa baai ale magsi dɛka ale baai ale kan magsi dɛka.> >>
Nke Ahọpụtara Ugbu A:
Kaabka 11: BWU
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, Ghana Institute of Linguistics, Literacy and Bible Translation