Aromayi 2
2
Shekwoyi owada ɓəfyece nya
1Ntucenu, ho to n aɓoɓwashi bai lo m, əho ń ho da əzado owa lo nyi m, ntuge abahobahoi ń ha da zado owa, ho znu əhohni əknyi nu, ntuge əho ń ho da zado owa nyi, ho zhni aɓo ye pya nu lo cè n hohni. 2Nsaiye yi kpəlo nge Shekwoyi owada ń kwo tu n aza yi tukwo ń ɓa zhni aɓo ye pya nyi, kwo vyi gaiciyanunui nu. 3Ntulonu, əsa ń əho zanyikwoci azanga, ho da azaje owa jesnu hoi dudu hoi zhni aɓo ye pya ce, ho zhninubwo nge ho ɓə la pwo Shekwoyi owada nuu? 4Kwo ho ci əwo yeye yaakwo wyegba nu, əwo əmìɓwa n bwugbaɓwai, to hoi kpe nge Shekwoyi bwugbaɓwa kwo gwo kwa zhni ho ha yeabwi nu ma a?
5Ama ntu əho bwugba akalákpe ɓo ɓədo n əho ədu tna-abwuye nyai, ho gnyi hoi ye minagyi napyei zhi əhohni nu, ntu nyipyei Shekwoyi minagyi napyei nya ɓo; əwyi n əwo owada ɓəfyece nya ɓə kpeyawu ncei. 6Shekwoyi “ɓə ga zahozahoyi əwo gyiba vyi əɓo nu n wo kwu zhni nyi.” 7Aza yi n ɓa kwu gyima ɓəzhni manai ɓai zna latu shni, mwamwai n wyewyeyi tnafyii, ɓa ɓə ɓwa wyewyeyi nyalonyalo nya. 8Ama tu ń aza yi tukwo ń ɓa zna əɓahni ɓəye nu shni, jesnu n ɓa ná gaiciyanunui aɓo, ɓai vyi aɓo nukwoi, ɓa ɓə ɓwa minagyi napyei ɓədo ǹ minagyii. 9Zahozahoyi n wo zhni aɓo nukwoi, wo ɓə ɓwa azhnìgye n agwunyaznui: kpmisnui ntu Yahudiyi ɓo, nlonu ntu Abyedo ɓo. 10Ama latu, mwamwa n bwugbafui ntu əzahozahoyi ɓo n wo zhni əɓo manai: kpmisnui ntu Yahudiyi ɓo, nlonu ntu Abyedo ɓo. 11Ntuge Shekwoyi ta wu aza bmyashi woi tnu-tnu nu m.
12Aza vnyanya n ɓa zhni leifyi ntna owa yekpé, nlonu ɓa ɓə fyí ntna Mwusa owa, ama aza vnyanya n ɓa zhni leifyi fyí n Mwusa owa yekpé, a ɓə da ɓa owa n Mwusa owai nu. 13Ntuge aza yi nù to n ɓa wo owa nyawu fyi n atnubwa n ɓa zhni aɓəfyeceyi n Shekwoyi awyeba m, ama aza yi nù n ɓa shi owa ɓwa nyi, ń a ɓə yi ɓa nge aɓəfyeceyi. 14(Ɓəhnihnii, əsa n Abyedo, n ɓa to n owai lo ɓai vyi nyi m, n ɓa zhni əɓo n owa ncei cekpe, kwo la ɓa zè owa ga əɓahni, kwo shikwonyi ɓa to n owai lo m. 15Ɓa wu nge ənya n owa ncei cekpe nge a shiɓwa, kwo kafyilo ń əɓa adu, əɓa atukwovnyi ce n zhni əɓa aɓəgbmiyi, jesnu nsahoi əɓa ɓənubwozhni ɓai ma ɓa aɓo, jesnu n asajei, ɓai bma ɓa.) 16Dəye ɓə zhni n əwyi nu ń Shekwoyi ɓə da aza əɓa aɓo asosoi owa ncei, ntu əɓa aɓo nukwoi zhni ɓo dna n Yeisu Kirisiti, ngye she əmi nabagyi manai da lo nyi.
Ayahudiyi n owai
17Nsaiye əho, ń ho yi əhohni nge Yahudiyi nyi; ndəi n ho kpema lo ń owa jesnu hoi gyigbe n Shekwoyii; 18ngye ho kpé əwo ɓəye əye lo jesnu hoi tuɓwa n aɓətnu n ɓa gnabmya; ntuge a kwu owa wu ho; 19ngye kwo la ho kwnuawye, nge ho zhni awyebwayi zokwowuyi nu, awyegbmada bwuznagna; 20amama aɓəgbegayi, aɓyipwutu nyawuyii, ntuge dna ń owa, ho n ɓəyekpei lo n gaiciyanunui; 21əho, ń ho ga azaje nyawu nyi, ho ta wu əhohni lo m? Əho ń ho zhni waazi tu əvyiwyi ɓo, ho wyivyi lo? 22Əho ń ho gna aza nge ɓa to zhni anagbái nyi m, ho zhni anagbái lo? Əho ń ho wnunu n ashnai nyi, kwo ho wyivyi lo dna n dagayipwuwa? 23Əho n ho gyigbe n owai nyi, kwo ho dna Shekwoyi vnyinkwo lo n owa gnanaznui a? 24Ngye she a cei kafyilo: “A da Shekwoyi əye atukwopmi ɓo lo fyi ń Abyedo ntu əfye ɓo.”
25Nyaznu n apmai lo, ń fya shi owa əɓwa, ama ń fya znu owa gnana, fye kwu zè ngye atnanyaznuyi. 26Ntulonu nsaiye, aza yi ń ɓa to n nyaznui lo m, ń ɓa zhni əɓo ń owa ncei da nge a zhni, a taa gye ɓa əwye ngye anyaznuyi nu m? 27Əza ń wo to n ənyai znuznui lo ń nayi m, ama wo shi owa nyawu əɓwa lo, wo ɓə znu ho əknyi, kwo shikwonyi ho n owa kakayii shi lo, n ənyai znuznui, ho zhni owa gnanaznui nu.
28Əza to zhni Yahudiyi nu ntuge a ma wo dna n nayi dna n Ayahudiyi m, kwo nge nyaznu ɓwasnu n əbmyi nu n nayi m. 29Aawo, əza zhni Yahudiyi dna ń əmì nù jesnu nyaznu zhni nyaznu ədu nya nu, n Zafnu nu naa zhni, toge owa kakai n aɓwai m. Əza yi pya cici kwo ta gbmi n azaje aba nu m, ama ń Shekwoyi aba.
Pilihan Saat Ini:
Aromayi 2: GNB
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.