Mege Gaya 32
32
1“Krkarac! Tlleus mbahang kari mu.
Tai so mbahang kari quwaq mu ka dxeral.
2Tnugesa mu we mntena quyux mphuriq,
kari mu we mntena dremus pnttingan.
Mntena qyexun quyux gmhuriq bobo speriq,
mntena nuhur hmeru ckceka sama.
3Ado mpgarang ku ngayan Utux Tmninun,
pqrii mege Utux Baro ta ka knparu.
4Heya we pusu btunux. Noda na we mttuku riyung.
Kana noda na we ini bale psaanak.
Utux Baro bale ba ini qberiq ka heya,
msderux ma ini bale kridil.
5Knxalan mbiki mnaqah nii,
mquri heya meepah noda naqah.
Ado kiya ka pusu qnnaqah daha,
kiya de uxe laqi na.
6Seediq mngataq uka knkela!
Ma namu so nii cmiyuk Utux Tmninun ho?
Heya we uxe tama su ma, smnalu isu peni?
Heya ka smnalu isu ma pnheyu sunan.
7Lngelung ka ndaan ali cbeyo,
psbrnahi ka knkawas knxalan cuuxal.
Slingi ka tama su, mprengo isu ka heya.
Slingi ka rdrudan su, mprengo isu ka heya.
8Mege dxeral qqlhangan ka Utux Tgpusu Baro,
spooda na knhbragan duutux,
ptaayus qqlhangan kana seediq.
9Ado nuUtux Tmninun ka seediq na,
nangal na we, kiya ka Yakobu.
10Utux Tmninun we, meniq tadus brenux,
meniq dxeral knuglahang ma, mpsterung dxeral nlaxan gaga rmengac camac hiya.
Kiya de mptqiri heya, mpqlahang heya.
Mpqlahang heya mntena so qmlahang seediq gaga ckceka doriq.
11Huwa mesa lmgelu rudu na ka qdiro,
skiya bobo wawa qdiro,
rmaguh palic na mapa wawa kjiro,
paanun na bobo daha palic.
12Utux Tmninun nanak we mpkeso nii dmudul heya uri,
uka ka utux icil gaga theyaq heya.
13Utux Tmninun we ptlamun na bobo msuubung dxeral ka dheya,
heya we mekan uqun pneeyah qnpahan.
Utux Tmninun we speekan na beyuq walu pneeyah ckceka lhengo,
mangal abura pneeyah tasil.
14Mpeekan uqun snmalu nunuh dapa, nunuh dapa, siyang miric duri,
baus miric ma miric pneeyah Basan ma,
tgmalu bale mugi,
mpiimah su sino malu lipas.
15Mtbeno ka Yesurun ma, mkela metur msbolung.
Qtehur su, mkrkere ma, msdheriq su.
Qmada Utux Baro smnalu heya ka heya,
psbiciq qmita pusu btunux dmnoi baga na ka heya.
16Pbrebur snhuur Utux Baro tnhmkuwan daha tikung,
pooda qyqeya psaneq daha ptutuy seang na.
17Smapuh bgihur naqah uxe bale ba Utux Baro ka heya,
ini daha klai ka duutux,
duutux hani prading,
duutux ini kcugi pusu rdrudan namu.
18Ini su psparu pusu btunux pntuting sunan,
chngiyan su ka Utux Baro pntuting sunan.
19Qmnita ka Utux Tmninun,
ado wada psrading heya de qmada dheya ka heya.
20Rmengo ka heya: ‘Mpbege ku qilu dheya,
so mphuwa mesa noda daha nexal.
Knxalan mptbrinah ka dheya,
dlqlaqi uka knbale ka dheya.
21Sdoi daha uxe Utux Baro ptutuy snhuur mu,
sdoi daha duutux uka dungus ptutuy seang mu.
Spsnhuur yamu ka uxe kesun qnlhangan uri.
Spkseang mu yamu ka mngataq qlhangan.
22Ado msqama ka seang mu,
betaq tuxan mnkuung truma riyung.
Qmhedu mekan dxeral ma pnhmaan qnpahan,
ani pusu dgiyaq we mpsqama uri.’
23‘Ptnetun mu heyi daha ka mqraqil,
ccebu mu dheya kana ka budi mu:
24Knrayan mpkuure seediq,
mnarux mttilux mpsqama seediq,
snliqan psraqil.
Mplawa ku camac mdoi waqic daha qmiyuc dheya,
mplawa ku gaga mkkarang dxeral mdoi pnugcahu phuqil dheya.
25Niqan hlmadac nganguc pphuqil seediq,
ckceka toma we niqan pkcugun.
Mpkeso kiya ka riso ma weewa,
lqlaqi mnunuh ma mqudi tunux we so nii uri.
26Rmnengo ku, pstmaqun mu ka dheya,
mpkuuka peeyah ckceka seediq ka ngayan na.
27So uxe mptraki ka pais,
uxe mptuuqu ka pais daha,
betaq rmengo, wada mbeyax ka baga ta,
kana nii we uxe noda Utux Tmninun.’
28Ado qnlhangan uka gnkela oda ka dheya,
uka bale knkela daha lmngelung ka dheya.
29Tai so maha niqan knkela ka dheya, mpkela noda nii,
kiya de mplmngelung qhdean daha nanak ka dheya.
30Nasi uxe pusu btunux daha ka bnaruy dheya,
nasi uxe Utux Tmninun ka bnege dheya,
mphuwa mesa smdurak 10'00 heyi ka 1 seediq,
mphuwa mesa pqduriq hmrinas mang seediq ka 2 seediq peni?
31Tena mkela kana ka pais ta,
pusu btunux daha we ini so pusu btunux ta.
32Qhuni lipas daha we qhuni lipas Sedom,
mdakil qnpahan Amorah.
Lipas mpgcahu ka lipas daha,
mngihur ka kana puyuy na.
33Nii we uxe gisu psliyan yaku hini,
gisu skuun ckceka repun mu peni?
34Nii we uxe nii psseli kenan,
nii shetur repun mu peni?
35Yaku ka mciyuk na,
dehuk ali de mptakur papak daha.
Ado smdaling ka ali pqrqilun daha,
msdaling riyung ka prqilun daha.
36Qmita uka bale beyax ka seediq Utux Tmninun,
ani gisu ngalun tnqliyan, mtraguh we uka bale ka mtngari.
Kiya de mdayo ku dheya mprengo,
mpgaalu ku tnqliyan mu nanak.
37Mprengo ka heya: Wada inu ka duutux daha,
wada inu ka pusu btunux sntmaan daha?
38Kiya ka mnekan siyang snapuh,
kiya ka mnimah sino snpuhan.
Plaani meyah dmayo yamu ka duutux kiya,
kiya ka mpqlahang yamu!
39Tai saya! Yaku. Wano yaku ka Utux Baro.
Wano ba yaku uka ka kesun utux icil.
Yaku ka phuqil seediq, yaku ka pkuudus seediq.
Yaku ka pluqah seediq, yaku ka pkmalu seediq.
40Mpheyu ku baga quri karac,
spooda mu uka psteqan knuudus mu psdehu rmengo:
41Nasi ku lepax hlmadac mu tqwilaq,
dmoi beyax psgao ka qapal baga mu ciida,
kiya de mpciyuk ku pais mu,
mciyuk ku dseediq tmnraqil kenan.
42Mpkbsukan pnmahan mu dara ka budi mu,
kiya ka dara dseediq wada phqilun ma qrapun.
Kiya ka heyi pneeyah snuunux tunux dpais.
43Kana qqlhangan! Spui mqaras ka dseediq Utux Tmninun.
Ado mpdayo rmengo dara dtnqliyan na ka heya.
Mpciyuk dpais na,
mpdoi baga dxeral na ma seediq na.”
44Moseh ma Hosea laqi Nun we, meyah rmengo ma pqbahang na seediq ka kana kari uyas nii. 45Mhedu smepu kana kari nii ka Moseh ma dseediq Israel de, 46rmengo dheya: “Pdakar ku yamu spooda mu kana kari nii saya. Yamu we pniqi lhebun namu kana. Tgsai ka lqlaqi laqi namu, tleus muyu kana kari pnatis gaya nii. 47Ado uxe uka pnugluban namu ka kari nii. Niqan pnugluban knuudus namu. Ado muyu namu kari nii de, mpqbsiyaq nniqun namu dxeral nangal namu mntaril yayung Yarden hiya.”
Tgplaale Rmengo Hnqilan Moseh
(Spe 27:11-14)
48Kiya ka ali ciida, rmengo Moseh ka Utux Tmninun: 49“Osa mgkala ddgiyaq Abarim dxeral Moab ka isu, osa sipo dgiyaq Nebo Yerixo. Osa qmita dxeral Kenaan bbege mu dseediq Israel. 50Isu we mphuqil su bobo dgiyaq nsaan su mkala. Mpquri su pusu rdrudan su hiya. Mntena qbsuran mtswai su Aharon mnhuqil bobo dgiyaq Hor, wada mquri pusu rdrudan namu hiya. 51Ado wada namu niqan qnquwan noda yaku meniq namu ckceka Israel, meniq namu tadus brenux Cin. Kiya ka qsiya Meribah Kadis hiya. Ini su psparu prtaso kenan meniq ckceka seediq Israel. 52Dxeral bnege mu seediq Israel, isu we qtaan su nanak, uxe su mpremux hiya ka isu.”
Pilihan Saat Ini:
Mege Gaya 32: Stgdaya
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
The Bible Society in Taiwan, 2020
© 台灣聖經公會版權所有，2020