रोमी 3
3
1कई सका इहअ बोली, “ज़ै खतैर करनै का बाद बी परमेशर हाम्हां नांईं मने; म्हारअ यहूदी हणैंओ किज़ै फाईदअ? हाम्हैं हुऐ तै होरी ज़ाती ज़िहै ई!” 2पर हुंह बोला तम्हां लै कि यहूदी हणैंओ आसा खास्सअ फाईदअ। सोभी का आजी, इहअ कि परमेशरै आपणीं गल्ला यहूदी का किई प्रगट।#रोम. 9:4
3अह गल्ल आसा सच्च़ी कि तिन्नां यहूदी मांझ़ै तै कई विश्वास घाती, पर सिधअ एता पिछ़ू कि तिंयां थिऐ विश्वास घाती, एतो कै इहअ मतलब आसा कि परमेशरै ज़ुंण करार आसा किई दी सह निं तेऊ पूरी करनी? 4इहअ निं कधि हणअ। पर परमेशर बोला हर बगत शुचअ अर हर मणछ हणअ झ़ुठअ, ज़िहअ पबित्र शास्त्र परमेशरे बारै बोला,#भज. 51:4; 116:11
“मुल्है दोश लाणा लै आसा तूह शुचअ अर मेरअ नसाफ करना लै आसा तूह धर्मीं।”
5ज़ै म्हारै बूरै ऐहा गल्ला रहैऊए कि परमेशर आसा धर्मीं; हाम्हां कै बोल़णअ? इहअ, “परमेशरे हाम्हां लै रोश्श करनअ अर हाम्हां लै सज़ा दैणीं आसा गलत!” ऐहा गल्ला बोला हुंह आम मणछे साबै। 6पर इहअ निं कधि हई सकदअ, ज़ै परमेशर यहूदी मणछो फैंसलअ राम्बल़ै करै नांईं करे, तेखअ परमेशरा एऊ संसारो फैंसलअ किहअ करै करनअ?
7कई सका इहअ बी बोली, “ज़ै मेरअ झ़ुठअ हणअ परमेशरो सत्त प्रगट करा अर तेऊओ होर बी ज़ादी प्रतप्प हआ, तै परमेशर मुंह पापी लै किल्है दैआ सज़ा?” 8कई बोला म्हारै बारै एही झ़ुठी गल्ला कि हाम्हैं बोला इहअ, “ज़ेतरअ खास्सअ पाप करे तेतरअ हणअ भलअ!” ज़ुंण मेरै बारै इना एही झ़ुठी गल्ला बोला तेऊ लै दैणीं परमेशरा सज़ा।
कोहै निं धर्मीं आथी
9तै किज़ै हुअ? तै कै हाम्हैं यहूदी तिन्नां यूनानी का बधिया आसा? कधि निं, किल्हैकि हाम्हैं आसा मुक्कै दै यहूदी अर यूनानी दुही लै इहअ दोश लाई कि तिंयां सोभै आसा पाप करने शगतीए बशै पल़ै दै। 10ज़िहअ पबित्र शास्त्रा दी आसा लिखअ द,#ज्ञैन. 7:20
“कोहै निं धर्मीं आथी,
ज़ाथी निं एक बी आथी!
11इहअ निं कोहै समझ़कार आथी ज़हा का थोघ आसा कि ठीक किज़ै आसा,
परमेशरे लोल़-तोप करनै आल़अ निं कोहै आथी।
12“सोभै मणछ आसा कबाता गऐ दै पेठी,#भज. 14:3; 53:1
ज़ाथी आसा सोभै भ्रष्ट गऐ दै हई,
कोहै निं भलअ करदअ,
ज़ाथी निं एक बी आथी!
13“तिन्नें गल्ला आसा बृथा, घुआल़ी घोरी का ल्हासे शल़ैन्हां ज़ेही।#भज. 5:9; 140:3
तिन्नें आसा हर गल्ला झ़ुठी,
आपणीं गल्ला करै मारा तिंयां होरी लोगा शपैल़े बिशा ज़िहै।
14“तिन्नें गल्ला आसा फिटक अर कल़ुई गल्ला करै भर्हुई दी।#भज. 10:7
15तिन्नैं खूर ठुर्हा लोहू बहाऊंणा लै आजू।
16ज़िधी बी तिंयां डेओआ तिंयां करा हर गल्ला बरैबाद अर तिंयां आणा खरी।
17“तिन्नां निं होरी लोगा संघै लल़ाई-झ़गल़ै बाझ़ी शांती दी ज़िऊंणअ एछदअ।#ईशा. 59:8
18“तिन्नां कदुष्ट मणछा निं परमेशरे डअर हंदी।”#भज. 36:1
19हाम्हां का आसा थोघ कि बधान आसा तिन्नां ई यहूदी मणछा लै ज़हा एता मनणे ज़रुरत आसा। ताकि यहूदी अर होरी ज़ाती कोही का बी परमेशरा सेटा किछ़ै भान्नअ निं होए अर सारै संसारे मणछ परमेशरे सज़ा जोगी होए। 20किल्हैकि बधाने साबै कामां करै निं कोहै बी मणछ धर्मीं हई सकदअ, इहअ करै कि मोसा गूरै लिखअ द बधान करा ऐहा गल्ला हाम्हां लै प्रगट कि हाम्हैं आसा पापी।#भज. 143:2
विश्वासा करै धर्मीं
21पर ऐबै निं हाम्हां बधाना मनणे ज़रुरत आथी अर परमेशरै बणाऐं हाम्हैं आप्पू संघै धर्मीं। हाम्हैं परमेशरै धर्मीं किहअ करै बणाऐं; एते बारै आसा मोसा गूरे बधाना दी अर होरी गूरे कताबा दी खास्सी साला पैहलै परमेशरै करार किई दी। 22हाम्हैं किअ ईशू मसीहा दी विश्वास अर एता करै बणाऐं हाम्हैं परमेशरै आप्पू संघै धर्मीं। अह गल्ल आसा विश्वास करनै आल़ै सोभी लै शुची किल्हैकि सोभै लोग आसा एक बराबर।
23किल्हैकि सोभी आसा पाप किअ द अर परमेशरे प्रतप्पा का आसा सोभै दूर। 24परमेशरै किई हाम्हां लै एही झींण कि म्हारै पाप करनैओ लिखअ-जोखअ पाअ मटाऊई बणाऐं हाम्हैं तेऊ धर्मीं। हाम्हैं निं एता लै किछ़ै किम्मत दैनी। मसीहा ईशू किअ अह काम हाम्हां लै छ़ुटकारै दैई पूरअ।
25परमेशरै किअ ईशू पाप दूर करना लै बल़ीदान। ज़ेभै लोग इहअ विश्वास करा कि ईशू मसीहा बहाऊअ आपणअ लोहू अर सह हुअ म्हारी तैणीं बल़ीदान तेभै बणाऐं मणछ परमेशरा संघै धर्मीं। अह बल़ीदान करा ऐहा गल्ला प्रगट कि परमेशरै निं भेदभाब किअ अर तेऊ निं तिन्नां लै सज़ा दैनी ज़ुंणी पैहलै पाप किऐ तै। 26इहअ कि तेभी परमेशरे धर्मीं हणअ प्रगट होए कि सह किहअ धर्मीं आसा अर ज़ुंण ईशू दी विश्वास करे तेऊ बी बणांए सह धर्मीं।
27तै कै इहअ आसा किज़ै ज़ेते बारै हाम्हैं घमंड करी सके? तेते निं कोई ज़ैगा आथी, किज़ू बिधी पिछ़ू? कै बधाने साबै काम करने बारै? नांईं, पर अह आसा म्हारै मसीहा ईशू दी विश्वास करनै करै। 28इहअ करै निखल़अ म्हारै एतो अह नचोल़ कि हाम्हैं निं बधाने साबै काम करनै करै धर्मीं बणाऐं पर हाम्हैं बणाऐं परमेशरै मसीहा ईशू दी विश्वास करनै करै धर्मीं।
29परमेशर कै सिधअ यहूदी मणछो आसा? सह कै होरी ज़ातीओ आथी निं? हाँ, सह आसा होरी ज़ातीओ बी। 30किल्हैकि परमेशर आसा एक्कै, खतैर किऐ दै यहूदी मणछ अर खतैर नांईं किऐ दै होरी ज़ातीए मणछ बणाणैं तेऊ दुहै विश्वासा करै धर्मीं।
31ज़ै हाम्हैं इहअ बोले कि हाम्हैं किअ मसीहा दी विश्वास अर परमेशरै किऐ हाम्हैं धर्मीं, एतो मतलब कै इहअ आसा कै बधान हुअ ऐबै बृथा? इहअ निं कधि हणअ! पर असली दी करा हाम्हैं बधान पूरअ।
Pilihan Saat Ini:
रोमी 3: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.
रोमी 3
3
1कई सका इहअ बोली, “ज़ै खतैर करनै का बाद बी परमेशर हाम्हां नांईं मने; म्हारअ यहूदी हणैंओ किज़ै फाईदअ? हाम्हैं हुऐ तै होरी ज़ाती ज़िहै ई!” 2पर हुंह बोला तम्हां लै कि यहूदी हणैंओ आसा खास्सअ फाईदअ। सोभी का आजी, इहअ कि परमेशरै आपणीं गल्ला यहूदी का किई प्रगट।#रोम. 9:4
3अह गल्ल आसा सच्च़ी कि तिन्नां यहूदी मांझ़ै तै कई विश्वास घाती, पर सिधअ एता पिछ़ू कि तिंयां थिऐ विश्वास घाती, एतो कै इहअ मतलब आसा कि परमेशरै ज़ुंण करार आसा किई दी सह निं तेऊ पूरी करनी? 4इहअ निं कधि हणअ। पर परमेशर बोला हर बगत शुचअ अर हर मणछ हणअ झ़ुठअ, ज़िहअ पबित्र शास्त्र परमेशरे बारै बोला,#भज. 51:4; 116:11
“मुल्है दोश लाणा लै आसा तूह शुचअ अर मेरअ नसाफ करना लै आसा तूह धर्मीं।”
5ज़ै म्हारै बूरै ऐहा गल्ला रहैऊए कि परमेशर आसा धर्मीं; हाम्हां कै बोल़णअ? इहअ, “परमेशरे हाम्हां लै रोश्श करनअ अर हाम्हां लै सज़ा दैणीं आसा गलत!” ऐहा गल्ला बोला हुंह आम मणछे साबै। 6पर इहअ निं कधि हई सकदअ, ज़ै परमेशर यहूदी मणछो फैंसलअ राम्बल़ै करै नांईं करे, तेखअ परमेशरा एऊ संसारो फैंसलअ किहअ करै करनअ?
7कई सका इहअ बी बोली, “ज़ै मेरअ झ़ुठअ हणअ परमेशरो सत्त प्रगट करा अर तेऊओ होर बी ज़ादी प्रतप्प हआ, तै परमेशर मुंह पापी लै किल्है दैआ सज़ा?” 8कई बोला म्हारै बारै एही झ़ुठी गल्ला कि हाम्हैं बोला इहअ, “ज़ेतरअ खास्सअ पाप करे तेतरअ हणअ भलअ!” ज़ुंण मेरै बारै इना एही झ़ुठी गल्ला बोला तेऊ लै दैणीं परमेशरा सज़ा।
कोहै निं धर्मीं आथी
9तै किज़ै हुअ? तै कै हाम्हैं यहूदी तिन्नां यूनानी का बधिया आसा? कधि निं, किल्हैकि हाम्हैं आसा मुक्कै दै यहूदी अर यूनानी दुही लै इहअ दोश लाई कि तिंयां सोभै आसा पाप करने शगतीए बशै पल़ै दै। 10ज़िहअ पबित्र शास्त्रा दी आसा लिखअ द,#ज्ञैन. 7:20
“कोहै निं धर्मीं आथी,
ज़ाथी निं एक बी आथी!
11इहअ निं कोहै समझ़कार आथी ज़हा का थोघ आसा कि ठीक किज़ै आसा,
परमेशरे लोल़-तोप करनै आल़अ निं कोहै आथी।
12“सोभै मणछ आसा कबाता गऐ दै पेठी,#भज. 14:3; 53:1
ज़ाथी आसा सोभै भ्रष्ट गऐ दै हई,
कोहै निं भलअ करदअ,
ज़ाथी निं एक बी आथी!
13“तिन्नें गल्ला आसा बृथा, घुआल़ी घोरी का ल्हासे शल़ैन्हां ज़ेही।#भज. 5:9; 140:3
तिन्नें आसा हर गल्ला झ़ुठी,
आपणीं गल्ला करै मारा तिंयां होरी लोगा शपैल़े बिशा ज़िहै।
14“तिन्नें गल्ला आसा फिटक अर कल़ुई गल्ला करै भर्हुई दी।#भज. 10:7
15तिन्नैं खूर ठुर्हा लोहू बहाऊंणा लै आजू।
16ज़िधी बी तिंयां डेओआ तिंयां करा हर गल्ला बरैबाद अर तिंयां आणा खरी।
17“तिन्नां निं होरी लोगा संघै लल़ाई-झ़गल़ै बाझ़ी शांती दी ज़िऊंणअ एछदअ।#ईशा. 59:8
18“तिन्नां कदुष्ट मणछा निं परमेशरे डअर हंदी।”#भज. 36:1
19हाम्हां का आसा थोघ कि बधान आसा तिन्नां ई यहूदी मणछा लै ज़हा एता मनणे ज़रुरत आसा। ताकि यहूदी अर होरी ज़ाती कोही का बी परमेशरा सेटा किछ़ै भान्नअ निं होए अर सारै संसारे मणछ परमेशरे सज़ा जोगी होए। 20किल्हैकि बधाने साबै कामां करै निं कोहै बी मणछ धर्मीं हई सकदअ, इहअ करै कि मोसा गूरै लिखअ द बधान करा ऐहा गल्ला हाम्हां लै प्रगट कि हाम्हैं आसा पापी।#भज. 143:2
विश्वासा करै धर्मीं
21पर ऐबै निं हाम्हां बधाना मनणे ज़रुरत आथी अर परमेशरै बणाऐं हाम्हैं आप्पू संघै धर्मीं। हाम्हैं परमेशरै धर्मीं किहअ करै बणाऐं; एते बारै आसा मोसा गूरे बधाना दी अर होरी गूरे कताबा दी खास्सी साला पैहलै परमेशरै करार किई दी। 22हाम्हैं किअ ईशू मसीहा दी विश्वास अर एता करै बणाऐं हाम्हैं परमेशरै आप्पू संघै धर्मीं। अह गल्ल आसा विश्वास करनै आल़ै सोभी लै शुची किल्हैकि सोभै लोग आसा एक बराबर।
23किल्हैकि सोभी आसा पाप किअ द अर परमेशरे प्रतप्पा का आसा सोभै दूर। 24परमेशरै किई हाम्हां लै एही झींण कि म्हारै पाप करनैओ लिखअ-जोखअ पाअ मटाऊई बणाऐं हाम्हैं तेऊ धर्मीं। हाम्हैं निं एता लै किछ़ै किम्मत दैनी। मसीहा ईशू किअ अह काम हाम्हां लै छ़ुटकारै दैई पूरअ।
25परमेशरै किअ ईशू पाप दूर करना लै बल़ीदान। ज़ेभै लोग इहअ विश्वास करा कि ईशू मसीहा बहाऊअ आपणअ लोहू अर सह हुअ म्हारी तैणीं बल़ीदान तेभै बणाऐं मणछ परमेशरा संघै धर्मीं। अह बल़ीदान करा ऐहा गल्ला प्रगट कि परमेशरै निं भेदभाब किअ अर तेऊ निं तिन्नां लै सज़ा दैनी ज़ुंणी पैहलै पाप किऐ तै। 26इहअ कि तेभी परमेशरे धर्मीं हणअ प्रगट होए कि सह किहअ धर्मीं आसा अर ज़ुंण ईशू दी विश्वास करे तेऊ बी बणांए सह धर्मीं।
27तै कै इहअ आसा किज़ै ज़ेते बारै हाम्हैं घमंड करी सके? तेते निं कोई ज़ैगा आथी, किज़ू बिधी पिछ़ू? कै बधाने साबै काम करने बारै? नांईं, पर अह आसा म्हारै मसीहा ईशू दी विश्वास करनै करै। 28इहअ करै निखल़अ म्हारै एतो अह नचोल़ कि हाम्हैं निं बधाने साबै काम करनै करै धर्मीं बणाऐं पर हाम्हैं बणाऐं परमेशरै मसीहा ईशू दी विश्वास करनै करै धर्मीं।
29परमेशर कै सिधअ यहूदी मणछो आसा? सह कै होरी ज़ातीओ आथी निं? हाँ, सह आसा होरी ज़ातीओ बी। 30किल्हैकि परमेशर आसा एक्कै, खतैर किऐ दै यहूदी मणछ अर खतैर नांईं किऐ दै होरी ज़ातीए मणछ बणाणैं तेऊ दुहै विश्वासा करै धर्मीं।
31ज़ै हाम्हैं इहअ बोले कि हाम्हैं किअ मसीहा दी विश्वास अर परमेशरै किऐ हाम्हैं धर्मीं, एतो मतलब कै इहअ आसा कै बधान हुअ ऐबै बृथा? इहअ निं कधि हणअ! पर असली दी करा हाम्हैं बधान पूरअ।
Pilihan Saat Ini:
:
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.