Ayat-ayat Alkitab Ternama dari Taga-Roma 1

Bagikan

Naan-anay ti panagtalekko iti ebanghelio ta isut' pannakabalin ti Dios a mangisalakan kadagiti amin a mamati, umuna kadagiti Judio kasta met kadagiti Hentil.

Ta ipakaammo ti ebanghelio a ti panangpalinteg ti Dios iti tao mangrugi iti pammati ket agpatingga iti pammati. Kas kuna ti Nasantoan a Surat: “Agbiagto ti pinalinteg ti Dios babaen iti pammati.”

Manipud pay idi pinarsua ti Dios daytoy lubong, ti agnanayon a pannakabalin ken kinadiosna, uray saan a makita, mabigbig ken nalawag a makita babaen kadagiti gapuananna. Isut' gapuna a pulos nga awan ti mabalinda a pagpambar.

Ammoda ti Dios, ngem dida agdayaw wenno agyaman kenkuana kas maiparbeng. Nagbalin ketdi nga ubbaw ti panagpampanunotda ket sipnget ti linaon dagiti isipda.

Tinallikudanda ti kinapudno maipapan iti Dios ket patienda ti kinaulbod. Agdayaw ken agserbida kadagiti pinarsua ti Dios a saan ketdi nga iti mismo a Namarsua a rumbeng a daydayawen iti agnanayon! Amen.

Manipud langit, impakaammo ti Dios no kasano nga ukomenna dagiti tattao gapu iti amin a basol ken kinadakes nga inaramidda. Gapu iti kinadakesda, lappedanda ti pannakaipakaammo ti pudno.

Daytoy ti gapuna a binaybay-an ti Dios ida kadagiti nakababain a kinaderrep. Uray ti babai, saanen a makikaidda iti lalaki. Ti laengen padana a babai ti kaiddaenna. Kasta met ti lalaki. Ti laengen padana a lalaki ti kaiddaenna ket sumgedda iti kinaderrep. Nakababain ti ar-aramidenda iti maysa ken maysa. Isut' gapuna a madusada a kas kaikarianda gapu iti dakes nga aramidda. Agsipud ta di bigbigen dagita a tattao ti kinapudno maipapan iti Dios, binaybay-an ida ti Dios nga agpanunot iti dakes ken agaramid kadagiti saan a maiparbeng.

Kunkunada a mamasiribda, ngem maagda met. Saanda nga agdaydayaw iti Dios a di matay, ngem agdaydayawda ketdi kadagiti ladawan ti tao a matay wenno tumatayab wenno ayup wenno agkarkarayam a parsua.