Ayat-ayat Alkitab Ternama dari ABhaluumi 8

Bagikan

Timanya huje, mu gonti ʉNgʉlʉbhɨ ahubhabhombela aminza abhantu ɨbho bha bhahunʼgana, hwa huje ɨbho abhakwiziizye alɨngaane nɨ nsɨɨbho zyakwe.

Ɨnsimishiziizye huje nahamo ahantu ha habhajiiye hunʼzijile ʉNgʉlʉbhɨ hutigane atɨ. ɄNgʉlʉbhɨ ajendeelela hutigane hwope nkashele tili bhʉʉmi awe tifwiye. Nantele nabhamo abhantumi, awe abhi‑ikhone, awe ɨvipelwa vyonti ɨvyɨ maha, awe ɨvintu ɨvyo vibhombeha ɨshi awe ɨvyo vyahayɨnza hwitagaalila, awe ɨvintu ɨvya hu mwanya, awe ɨvintu ɨvya huzimu, awe ɨvipelwa ɨvyɨnjɨ vyovyonti ɨvyo vibhajiiye hunʼzijile ʉNgʉlʉbhɨ hutigane atɨ. Ʉkʉndwa ʉwo awiluuye huliitɨ hwi‑idala ɨlya Yeesu ʉKilisiti, ʉMwɨnɨ weetu.

Peeka nɨ‑ɨgo, ʉMʼpepo ʉMʼfinjile ya yʉʉyo ahutaavwa mu dedebhazu weetu, pɨpo saga timɨɨnye apuute shiila sha shihwanziwa huje atɨ timʼpuutaje ʉNgʉlʉbhɨ. Lyoli ʉMʼpepo ʉMʼfinjile yʉʉyo ʉyo ahutipuutila hwa Ngʉlʉbhɨ hu ndiilo ɨyɨ nkʉmbʉ ɨyɨ bhaavi ɨyo saga ɨyangwa.

Ɨshi, tiyanje yeenu hu nongwa yɨ nongwa ɨzyo? Nkashele ʉNgʉlʉbhɨ ali naatɨ, weenu ʉyo abhajiiye hutimene?

Ɨshi, nalumo ʉlongwe ʉlwɨ lufundo hwa bhaala bha bhapatihɨɨnywe nʉ Yeesu ʉKilisiti.

Ʉmuntu ʉyo alongozewa nʉ wuntu waakwe ʉwɨ mbiibhi, ahuwaaga ʉfwe ʉwa wiila. Lyoli, ʉmuntu ʉyo alongozewa nʉ Mʼpepo ʉMʼfinjile, ali nʉ wʉʉmi ʉwa wiila nantele ali nʉ tengaanu.

Leelo hwope nkashele ɨga gonti gahutɨnzɨla, atɨ tijendeelela amene, pɨpo ahutaavwa ʉKilisiti ʉyo atigɨɨne.

Amayɨmba geetu agɨ habhaazyo ɨho saga ɨlola hantu, nkashele ɨhugalɨngaanisya nʉ mwamu ʉwo ʉNgʉlʉbhɨ ahayihutipeela hu habhaazyo ɨho hahwɨnza.

Nahamo ahantu hohonti ha habhajiiye hunʼzijile ʉKilisiti huje agandi hutigane atɨ! ɄKilisiti ajendeelela hutigane hwope nkashele tili mu mayɨmba amagoosi, awe mu zugumizu, awe mu bhaavi, awe tili nɨ nzala, awe tibhuliliilwe amenda, awe tipalamila ateezye ʉwʉʉmi, awe abudwe.

ɄNgʉlʉbhɨ wa‑amɨɨnye zya zili mu mooyo ga bhantu, azimɨɨnye zyope ɨnsɨɨbho zya Mʼpepo ʉMʼfinjile. Enya, ʉMʼpepo ʉyo ahubhapuutila abhooziwa nanshi ʉNgʉlʉbhɨ yʉʉyo sha‑agɨɨne.

Bhonti bha bhalongozewa nʉ Mʼpepo ʉwa Ngʉlʉbhɨ ɨbho bhaana bha Ngʉlʉbhɨ.

Enya, bha bhalongozewa nʉ wuntu waabho ʉwɨ mbiibhi, ɨnsɨɨbho zyabho zisʉngwa abhombe ɨmbiibhi. Leelo, bha bhalongozewa nʉ Mʼpepo ʉMʼfinjile, ɨnsɨɨbho zyabho zisʉngwa abhombe ɨmbombo ɨzyo zihunʼkhondeezya ʉMʼpepo ʉMʼfinjile ʉyo.

ɄNgʉlʉbhɨ saga ahanʼnolɨɨye ɨnkʉmbʉ ʉmwana waakwe yʉʉyo, lyoli ahamʼfumiizye huje afwe hu nongwa yeetu tenti. Ɨshi, nkashele ahamʼfumiizye ʉmwana waakwe yʉʉyo, wɨlɨ saga anza hutipeele ɨvintu vyonti ɨvinza?

ɄMʼpepo ʉMʼfinjile yʉʉyo akhajiilizya peeka na mooyo geetu huje, atɨ tili bhaana bha Ngʉlʉbhɨ. Ɨshi, pɨpo atɨ tili bhaana bha Ngʉlʉbhɨ, tahayambɨɨlɨla ɨnsayo zyonti ɨzyo ʉNgʉlʉbhɨ abhabhɨshɨɨye abhantu bhaakwe, tahayambɨɨlɨla ɨnsayo ɨzyo peeka nʉ Kilisiti. Ɨshi nkashele tijimbiilila mu mayɨmba nanshi ɨsho ahajimbiliiye ʉYeesu, shɨɨsho tahayimwamihwa nanshi ɨsho ahamwamiihwe ʉmwene.

Abhantu bha bhalongozewa nʉ wuntu ʉwɨ mbiibhi, ɨbho bhahwibhɨɨha abhe bhalʉgʉ bha Ngʉlʉbhɨ, saga bhahwɨtɨha alondolezye ɨndajizyo zyakwe, nantele saga bhabhajiiye huzilondolezye.

Enya, ɨvipelwa vyonti vigʉʉlɨla hu nsyʉkwo hu habhaazyo ɨho ʉNgʉlʉbhɨ ahayihubhiilula abhaana bhaakwe.

Timanya huje afishe ɨshi, ɨvipelwa vyonti vilila hu bhaavi nanshi ʉbhaavi ʉwa nʼshɨ lwa‑apaapa ʉmwana.