Ayat-ayat Alkitab Ternama dari Tuteronomi 28

Bagikan

“Iwe, are oupwe aleasochisi alon ewe Samol mi Lapalap ämi we Kot o tümwünüöchü le apwönüetä an kewe allük meinisin üa ngenikemi ikenai, i epwe atekiakemiitä mwen ekewe mwü meinisin won fanüfan.

Ekei feiöch meinisin repwe feito womi o akom mwemi, are oupwe aleasochisi alon ewe Samol mi Lapalap ämi we Kot.

Ewe Samol mi Lapalap epwe föri pwe ämi ewe mökür, nge ousap ewe mechan. Iwe, oupwe chök nonom won, nge ousap nom fan, are oua aleasochisi ekewe allük än ewe Samol mi Lapalap ämi we Kot üa allük ngenikemi ikenai, o tümwünüöchü le apwönüretä.

Ewe Samol mi Lapalap epwe suki ngenikemi läng an lenien iseis mettoch mi aüchea, pwe epwe apüngätiu üt won fanüemi lon fansoun öch o afeiöchü angangen pöümi meinisin. Ämi oupwe mwütawu mettoch ngeni chomong mwü, nge ousap paaro seniir.

Iwe, ewe Samol mi Lapalap epwe akufu chon oputemi mi ü ngenikemi. Repwe feito won efoch al pwe repwe maun ngenikemi, nge repwe süla me mwemi won fufoch al.

Ewe Samol mi Lapalap ämi we Kot epwe afeiöchü ämi lenien iseis, epwe pwal afeiöchü meinisin mine oua föri. Iwe, epwe afeiöchükemi lon ewe fanü i epwe ngenikemi.

Oupwe feiöch lon mettoch meinisin mine oupwe föri.

Ewe Samol mi Lapalap epwe afeiöchü ämi kewe telinimw, epwe pwal afeiöchü ämi kewe tanipi.

Iwe, ewe Samol mi Lapalap epwe afeiöchükemi o ngenikemi chomong nöümi, epwe achomonga uän ämi pwül, nöümi pwiin man repwe up, nöümi apanen kow me apanen sip repwe chomongola.

Iwe, ewe Samol mi Lapalap ämi we Kot epwe aükemiitä pwe oupwe eu mwichen aramas mi pin fän itan, usun a fen pwon ngenikemi fän akapel, are oua aleasochisi alon o föri meinisin mine a allük ngenikemi.

Epwe afeiöchü ämi chük pwe epwe wor chomong uän irä lor, epwe pwal afeiöchü ewe mongö oua amolätä seni.

Iwe, ewe Samol mi Lapalap epwe awöüükemi, epwe achomonga upun womi me nöümi pwiin kow, epwe pwal achomonga uän ämi pwül lon ewe fanü ewe Samol mi Lapalap a fen pwon fän akapel ngeni ämi kewe lewo pwe epwe ngenikemi.

Mürin, aramasen fanüfan meinisin repwe küna pwe ewe Samol mi Lapalap a filikemiitä pwe oupwe nöün aramas, repwe pwal niuokusitikemi.

Ousap fokun aleasolap ngeni ekei kapas üa allük ngenikemi ikenai, ousap fel ngeni pwal ekoch kot o angang ngeniir.”

“Nge are ousap aleasochisi alon ewe Samol mi Lapalap ämi we Kot, ousap pwal tümwünüöchü le apwönüetä an kewe allük me pwüüng meinisin üa allük ngenikemi ikenai, mürin ekei anümamau repwe feito womi o nonom mwemi.