Ayat-ayat Alkitab Ternama dari दानिएल 3

Bagikan

शदराक, मेशक, अबेदनागू बोलअ नबूकदनेसर राज़ै लै, “माहा राज़, ऐहा गल्‍ला लै निं हाम्हैं ताल्है किछ़ै बोल़णअ च़ाहंदै। माहा राज़अ, ज़हा परमेशरे च़ाकरी अर स्तोती हाम्हैं करा, सह सका हाम्हां बडै ज़ल़दै आगीए भैठै का बच़ाऊई अर ताखा बी छ़ड़ैऊई। पर ए माहा राज़अ, ज़ै सह इहअ नांईं बी करे, तैबी लअ तूह ऐहा गल्‍ला समझ़ी कि हाम्हैं निं तेरै देअआ-देबीए पूज़ा करदै, नां हाम्हां ऐहा सुन्‍नें मुहुर्ती सेटा माथअ टेक्‍कणअ ज़ुंण तंऐं आसा स्तापी दी।”

राज़ै बोलअ, “तै मुखा किल्है शुझिआ इहअ कि आगीए बडै कूंडा जैंदरी आसा च़ार मणछ हांढदै लागै दै? नां ईंयां बान्हैं दै शुझदै अर नां इना आगी करै किछ़ हान्‍नी हुई! अह च़ौथअ मणछ शुझिआ मुखा स्वर्ग दूता ज़िहअ!”

नबूकदनेसर राज़ै बोलअ, “ज़ुंण शदराक, मेशक अर अबेदनागूओ परमेशर आसा, हुंह करा तेऊए ज़ै-ज़ैकार। तेऊ छ़ाडै आपणैं स्वर्ग दूत इना मणछा बच़ाऊंदै ज़ुंण तेऊए च़ाकरी करा अर तेऊ परमेशरे आसरै रहा। इनै निं तेऊ परमेशरा लै मेरअ हुकम मनअ अर होरी देअआ-देबीए पूज़ा करनै का समझ़अ इनै आप्पू मरनअ ई खरअ।

“ऐबै करा हुंह इहअ हुकम ज़ारी कि देशा-देशे अर हर भाषा-बोली बोल़णैं आल़ै लोग ज़ुंण शदराक, मेशक, अबेदनागूए परमेशरे खलाफ किज़ै बोले, तेऊए करनै मुंह काटी करै ठोर-ठोर। तिन्‍नें घअर पाणै ढोल़ी कि तेथ रहणअ सिधअ माट्टै-गट्टैओ रूल़। किल्हैकि इने परमेशरा ज़िहअ निं कुंण देअ नां देबतअ आथी ज़ुंण इहअ बच़ाऊई सका।”