Ayat-ayat Alkitab Ternama dari Deuteronomio 10

Bagikan

Tupakwö yöawinobe Moisesma, israel jojodönö: —Ja̧danö chömöledö israel jojodö, kwuluwo̧duwi Isabenö Jo̧ Dios ökwödönö wei̧ma, di̧ya? Sule bi̧yada weobe chömöledö: Kwuluwo̧duwi Isabenö Jo̧ Diosnö yebabinö omukwatö, jo̧ba ösödi̧danö ja̧bö ja̧nö, jo̧banö ile nibebö kwösödaduwobö. Ja̧danö okobe jwiinö kwomajadöduwinöbi, kwo̧'woduwinöbi jwaikwöda kwuluwo̧duwi Isabenö Jo̧ Dios ömöayedö kwö̧jaduwobö, ja̧danö okobe jwiinö kwuluwo̧duwi Isabenö Jo̧ Dios ökwödönö wei̧ babe ökwödönö yötawi̧ jawa ja̧bö kwö̧jaduwobö. Ja̧da ökwödönö weobe chömöledö, ja̧danö baikwö yöta̧la jejenö wei̧ma, ökwödönö suli̧ öwaedotö jö̧ba̧löma jejenö webö̧kö̧, otiwanö kwö̧jaduwobö ösödobetjö̧, ökwödönö pjaatakwawa baibanö jejenö webo̧ chömöledö.

—Jau chömöledö, isabenö Dios wei̧ kwa̧ja̧kwaduwobö jo̧be, baikwö yötawa: Kwuluwo̧duwi Isabenö Jo̧ Diosma, okobe deinö tjösödawö̧tjö inesö Diosbo̧ chömöledö, ja̧danö okobe deinö luwedötjö inesö la'aka luwo̧, ja̧danö jo̧bada inesö juluwo̧ Diosma, okobe deinö yetjaibo jö̧tja̧lökwema. Ju'wibi, wainökwena omukwatökönö, bakwainö edo̧ jo̧bama jojodönö. Ju'wedö lȩekwa jojodöma jweinö yöbawökönö, jojodö tjimidobö abebadö, sulabenö lȩekwa yötjawobö, jo̧kwaijayonö jejenöbö̧kö̧ Diosma chömöledö, bakweminö jweinö lȩbebo̧, juna̧ladönöbi jwibadönöbi.

Jo̧kwajabetjö̧, isabenö jo̧ba wei̧ kwa̧ja̧kwaduwobö jo̧be chömöledö, baikwö wanedö yötawa, kwomajadeduwi bajalesa̧do̧ 'diado̧ma 'wibekwö loköbaduwo, kwuu 'diinö a̧ja̧kwökönö kwö̧jaduwi̧ kakatibaduwakobetjö̧.

Ja̧danö löyödönöbi, tji̧lekwamu wobekwinadönöbi tjöbeba̧lö pjabato̧, ju'wedö jobadönö sulabenö ja̧tja̧pji jö̧ba̧lö. Ja̧danö ju'wibi jelobetjö ichajadönö ösödö pjabato̧, tju̧kwa kwakwawabi, tjitea ka̧miji̧do̧bi iyö.

Jo̧banöda ösödö, Otiwo̧ja jö̧ba̧lö kwösödaduwonö. Jo̧bada kwuluwo̧duwi Dios chömöledö, ja̧danö ökwödöma kwöbajaleduwinö edinadöja, iteda ujulu i̧sȩbö, juluwi̧ ji̧ jojodö edajitjökö jawa i̧sȩbinama.

—Kwuluwo̧duwi Isabenö Jo̧ Diosnöda yebabinö omukwatö kwösödaduwo chömöledö, jo̧banöda bȩbachibö kwösödaduwo, jo̧banöda do̧ba̧lö kwö̧jaduwo, –Duluwo̧ Dios, –jö̧ba̧lö, ja̧danö jo̧ba iminöda yöbawö kwujunaduwo, –Yöbawö chujunaja̧danö ja̧bökönö, wainö ja̧titjö̧ma, Isabenö Jo̧ lȩebobö ja̧kobe, –jö̧ba̧lö.

Chömöledö, kwuluwo̧duwi Isabenö Jo̧ Diosma okobe jwiinöbi, okobe deinöbi inesö la'aka tjuluwo̧, okobe jwiinö mölejȩbi, bö̧jebi, okobe jwiinö bö̧jȩnö ji̧bi, inesö la'aka luwo̧ma jo̧bada.

Ja̧danö chömöledö, baikwö yötawaduwakwö, damötjö ökwödöma jelobetjö ichajadö, ju'wedö tjitebo nijinö kwö̧jinaduwobe, Egiptonö, jö̧tö? Jo̧kwajabetjö̧ ja̧ jelobetjö ichajadö ju'wedö tjitebonö kwö̧jinaduwa omukwatö, ju'wedö jelobetjö ichajadö kwiteboduwinö tjö̧jenama, jobadönö kwösödaduwo, kwuluwo̧duwi Dios jobadönö ösödi̧danö.