The Colloquial Galilean Bible (CGB) is an easy Bible to understand, particularly for children and youth. It is free in audio, video, and text. For free access or to support our ministry, contact us at www.aibible.org. الكتاب المقدس (العهد الجديد) باللهجة العامية الجليلية هو كتاب سهل الفهم خاصة للأطفال والشباب. ونصوصه متوفرة مجانا في صيغ صوتية ومرئية ونصية. للحصول على هذه النصوص أو لدعم خدمتنا، الرجاء زيارة موقعنا على العنوان التالي: www.aibible.org

ترجمة الكتاب المقدس باللهجة العامية الجليلية

وأوّل م طلع الفجر يوم الأحد أجو الستات ع القبـر وجابو معهن الروايح والمواد اللي حضروها. ولـمّا لاقوا الحجر مِدَحْرِج عن باب القبـر فاتوا بس م لاقوش جتة الرب يسوع. وكانوا بعدهن مصدومات من هالشوفه وِاللا في تنين زلام واقفين جنبهن ولابسين أواعي بتلمع مِتِل م بيلمع البـرق. ارتعبوا الستات ونزّلو روسهن ع الأرض. سألوهن الزلام: "ليش عم بِدَّورا على الحي بين ل موات. هو مش هون لأنو قام. تذكروا شو قلّقو وهو بعدو في الجليل. قال: لازم يوقع ابن الإنسان بإيدين ناس أشرار وينصلب ويقوم في اليوم الثالث". وتذكروا الستات كلام يسوع. وتركوا القـبر وراحوا وحكوا اللي صار ل ال 11 ولباقي التلاميذ. والستات هنـي مريم المجدلية وحنّه ومريم إم يعقوب وفي معهن كمان ستات. وحكوا الستات للرسل كل اللي صار. بس الرسل فكروا إنو كلامهن حكي فاضي. ومَ صدقوهنش. بس بطرس قام وركض ع القـبر. ولما وَطّى شاف الأكفان بدون الجثة. وروّح وهو متعجب من اللي عم بصير.
وفي نفس اليوم كان في 2 من التلاميذ رايحين ع قرية بعيدة حوالي 11 كيلو عن أورشليم واسم القرية عمواس. وكانو عم بتخرفوا مع بعض عن كل اللي صار وهنـي عم بحكو وبتجادلو إلا يسوع نفسه قرَّب وصار يمشي معهن. انعمـى بصرهن وُ مَ عرفوهُش. وسألهن يسوع: عن شو كنتو عم تحكو وأنتو ماشيين؟ تجمدوا محلهن وهني مكشرين. وُ واحد منهن اسمو كليوباس رد ع يسوع وقال: شو إنت الزاير الوحيد اللي زار أورشليم ومش عارف شو صار فيها في هاي الأيام؟ فسألهن: شو صار؟ سيعتها حكولو عن يسوع النصراوي وإنو كان نبي عظيم بالعمل والكلام قدام الله وقدام كل الشعب. وشرحولو وقالو: رؤسا الكهنة وقادتنا سلّموا يسوع لحكم الموت وللصلب. بس إحنا كنا متأملين إنو هو اللي رَح يحرر إسرائيل. وكمان بعد هاي الأشياء واليوم تالت يوم في ستات من جماعتنا طيّـروا عقلنا باللي صار معهن سيعة الفجر عند القبـر. مَ لاقوش جتة يسوع ورجعوا وصاروا يقولو إنهن شافوا رؤيا فيها ملايكة عم بتقول إنو يسوع حي. وراحوا ناس من جماعتنا ع القبـر وشافوا إنو حكي الستات مش غلط بس مَ شافوش يسوع. فقلهن: فش عندكو عقل وقلبكو قاسي مش مصدقين كل اللي حكوه الأنبيا. طيب مش المسيح كان لازم يتعذب بهاي الطريقة قبل م يتمجد؟ وبدي يفسرلهن كل إشي انكتب عنو. وبدي من كتب موسى وكمّل لحد م خلّص كل الأنبيا.
وقرّبوا ع القرية اللي كانوا رايحين عليها. واعطاهن يسوع الانطباع إنو رايح يكمّل مشواره. فشدوا عليه وقلّولو: نام عِنّا لأنو قرّبت الشمس تغيب والدنيا صارت ليل. فراح ينام عندهن. ولما قعد يتعشى معاهن مسك خبـزة وبارك وكسَرها واعطاهن منها. فانفتحت عينيهن وعرفوه وبعدين اختفى. وقالو لبعض: مش كنّا حاسين كأنو نار في قلوبنا لمّا كان يحكي معنا في الطريق ويفهِّمنا الكتب؟ وُقاموا في نفس هديك اللحظة ورجعوا ع أورشليم ولاقوا هناك ال 11 تلميذ ومعهن كمان ناس. وكانوا عم يشهدوا إنو الرب عنجد قام وظهر لسمعان. وحكوا التلميذين شو صار معهن في الطريق وكيف عرفوا يسوع لما كسَر الخبزة.
وهني بعدهن عم بحكو شو صار واللا يسوع ظهر وُوقف بيناتهن وسلّم عليهن. ارتعبوا وخافوا وفكروا إنهن شايفين شبح. فقلهن: ليش مرتعبين والشكوك شاغلة فكركو؟ تطلّعوا ع إيدي وع إجري عشان تتأكدوا إنو أنا يسوع. إطّلّعوا علي وحسوني لأنو الروح م إلوش عظم ولحم زي م إنتو شايفين. وبعد م قال هادا الحكي أرجاهن إيديه وإجريه. ومن كثـر الفرح والاستغراب كانوا بعدهن مش مصدقين فسألهن: في معكو أكل؟ اعطوه شقفة سمكة مشوية فتناولها قدامهن وأكلها.
وقلهن: الحكي اللي حكيتلكو إياه لما كنت معكو عم بتحقق قدام عينيكو لأنو لازم تتحقق كل الأشياء المكتوبة عنـي في توراة موسى والأنبيا والمزاميـر سيعتها فتحلهن عقلهن ففهموا الكتب. وقلهن: الكتب بتأرجينا إنو المسيح رَح يتعذب ويقوم من بين الأموات في اليوم التالت. ورَح يعلنوا باسمه توبة غفران الخطايا من أورشليم ولحد م يوصلوا لكل الشعوب. وإنتو رَح تكونوا شهود تشهدوا عن هاي الأشياء. وهيــّـاني رَح ابعتلكو اللي وعد فيه أبوي. فخليكو في البلد لحد م تحل عليكو قوة من فوق.
وأخذهن من المدينة لحد بيت عنيا ورفع إيديه لفوق وباركهن. وهو عم بباركهن صار يرتفع للسما وبعَّد عنهن. وسجدولو وبعدين رجعوا ع أورشليم وهني مكيفين. وكانوا كل الوقت يباركوا الله في الهيكل.

Dengarkan لوقا 24