Manu - WBT (Mark,John) Non Drama

Manu - WBT (Mark,John) Drama

Pô̤̌nudě, Yeshǔ hǎhtò̌cû̌kè dǒ Galilè̤̌ shikoǒdû̌ lô̤̌bò̌ tôkhô. (Kòyò kaǎ kû̌ shikoǒdû̌ Tiberǐ mî̌ amè̤̌mè̤̌.) Kòyò saprṳ̂ kè̌shǐ htobò ta̤cô̌klǐcô̌sè dǒ Běcǎ cû̌ ma̤hǎmǎ bǎ kòyòsha tokhlǒ akhû̌akhî, asî gû̌ cû̌plṳ̂cû̌phǎ kû̌ bò lû̌kò. Dě Běcǎ Yeshǔ htò̌ dǒ khôlôkhû̌ dě a kû̌ akhôphijǎ tokhlǒ htò̌ hǎnòò̌ lô̌khô bǎnu. Bǎnuakha Yǔdaphû̌ ta̤cû̌bò̌tûlû̌pwè a glè̌ bǎ hǒ.
Bǎ Běcǎ Yeshǔ kè̌cû̌ dě a kè̌shǐ kòyò saprṳ̂dû̌ hè tô dǒ lû̌ô̌ akha, a hî̌ Khûphǐlǐpǔ kû̌, “Pa tô cû̌ pwî̤ǎ bǎ kòyò hǒtokhlǒ lǎ̤ǎ bǎtè ya?” A gwè̌ kè̌bǎpwǎ Khûphǐlǐpǔ pwǎ. A glè̌ ma̤ bǎ asî hî̌tè pěnu, a gènè̤nǎ htobò dǒ a sǎphlǒkû hǒ.
Khûphǐlǐpǔ hî̌shěshu kû̌, “Pa pwî̤ǎ bò bǎ asî kû̌ ruyî̌ Denari tôkô̌ gûlǎ̤ mî̌, asî ǎ pwǎ tôpwa̤ tômû nô̤̌nu apô̌ǎnô̌tô̤̌.”
A khôphijǎ dǒ ashǔshawa̤ tôpwa̤ dǒ ami̤ kû̌ Khûîdru, a mî̌ Khûshǐmû Petarǔ apṳ̌ tôpwa̤ hî̌ Běcǎ kû̌, “Phijǎ pwa̤khûphû̌ ô̌ bǒo tôpwa̤. Amû̌ dǒ kòyò ma̤ kû̌ bǔbalî̤ a ô̌ yè̤̌phlǒ kû̌ tò̤̌phû̌ ginǐ̤bǎ. Bǎbǎkǎlè a gǔ pô̌ǎ pû kòyò bepwa̤ya?”
Běcǎ Yeshǔ hî̌ kû̌, “No hǎnòò̌ kòyò nutokhlǒ,” A hî̌ pô̤̌nu. Gûlǎ̤ bǎnu tûkû mî̌ mi̤su duwî̤̌꤮ le. Dě còcè̌ bò pwa̤khûdû̌ dǒ a hǎnòò̌lò̤ bǎnu tokhlǒnu, a phǔ ô̌ yè̤̌rî̌. Běcǎ Yeshǔ phî̌ mû̌ nutokhlǒ dě a hî̌bwǐhî̌sîrîhtò̌ Cǒmara. Htodě a ǐlò̤ kû̌ akhôphijǎ tokhlǒ dě asî yṳ̂̌lò̤ bǎ bò kû̌ kòyò hǎnòò̌ô̌ bǎnu tokhlǒ. A phî̌ tò̤̌phû̌ nuginǐ̤bǎ dě a ma̤ sô̌sô̌kû̌ pô̤̌ mû̌nu. Dě kòyò nutokhlǒ a sǎǎ pwî̌꤮ tènu a phî̌ǎ lô̌khô.
Bǎ asî ǎkǒôbe htobò pṳ̂̌꤮ tôpwa̤ akhanu, Běcǎ Yeshǔ hî̌ akhôphijǎ tokhlǒ kû̌, “Phî̌ ge plǒ bòsô̌ shǎǎ ô̌lǒkè nutokhlǒ, no ô̌kèlǒ tǎ̤ atǎ̤mǎ̤,” A hî̌ asî pô̤̌nu. Pô̤̌nudě akhôphijǎ tokhlǒ phî̌wô̌ mû̌ bǔbalî̤ yè̤̌phlǒ dǒ kòyò ǎ htobò nudě a kashǎ ô̌kè tokhlǒnu a ô̌be pe kû̌ phû̌bě shǐginǐ̤mè.
Bǎ kòyò hǒtokhlǒ kè̌shǐhto Běcǎ Yeshǔ ma̤ ta̤cô̌klǐcô̌sè tokhlǒ akhanu, asî hî̌ lô̌khô kû̌, “Piwi̤pèshè dǒ a glè̌ hèlò̤ dǒ hǎkhû̌nu pě, kòyò hî̌ kè̌khî numî̌ amè̤̌ mî̌ca a hǒ,” A hî̌ lô̌khô pô̤̌nu. Běcǎ Yeshǔ sî̌ganǎ̤ kû̌ asî glè̌ hènoshû̌ htûhtò̌ lû̌û kû̌ khwǐ akhû̌akhî, a cû̌htò̌ khô̌kè tû̌ dǒ khôlôkhû̌ tôpwa̤nô̤̌ pwǎ.


Bǎ lṳ̌mṳ̌lò̤ akhanu, akhôphijǎ tokhlǒ gelò̤ cû̌ lô̌khô dǒ shikoǒdû̌htu. Asî hǎtě̤ dò̌nṳ̌ sǒkhli bǎnu dě a hǎhtò̌cû̌ lô̌khô dǒ Wî̤̌kaperanò̤. Wî̤̌nu a ô̌ dǒ shikoǒ lô̤̌bò̌ tôkhô. Lṳmṳ̌khǐhǒ bǎbǎkǎlè Běcǎ Yeshǔ getǒ̤ kû̌ asî tô̤̌. Gili̤mǒ̤lò̤ dě shi pěpǒdû̌ hèshû̌. Bǎ asî khlòcû̌tǒ̤ su, lǐ̤mila akhanu, asî kè̌shǐ Běcǎ Yeshǔ cû̌ dǒ shikhû̌ dě hèphǔtô asî sǒkhli. dě asî ǐsha gònò̤̌gòglè bò lû̌lǎ̤. Dě Běcǎ Yeshǔ hî̌ asî kû̌, “Hepwǎ! ǐsha lô̌khô tǎ̤mǎ̤.” Hǒtaplǎdě asî sǎlě̤sǎlò̤ kaǎshǔ lô̌khô Yeshǔ dǒ sǒkhlikû. Dě taplǎnô̤̌, sǒkhli cû̌tǒ̤ kè dǒ shihtu bǎ asî lǎ̤cû̌nu tûkû.

Nô̌kò tôwô̤dě, kòyò saprṳ̂ ô̌kè bǎ lô̤̌bò tôkhô pahǎnô̤̌ tokhlǒnu a sî sî̌ganǎ̤ lô̌khô kû̌ sǒkhli ô̌kè tôbǎ nô̤̌pwǎ. Dě Běcǎ akhôphijǎ tokhlǒ dò̌ lô̌khô sǒkhli nutôbǎ dě a hǎhtò̌cû̌ tû̌ lô̌khô. Kòyò saprṳ̂ tokhlǒ sî̌ganǎ̤ kû̌ Běcǎ Yeshǔ dò̌cû̌ kû̌ akhôphijǎ nutokhlǒ tô̤̌, asî hǎhtò̌cû̌ tû̌ lô̌khô pwǎ. Htodě sǒkhli ô̌ dǒ Wî̤̌tǐberǐ dě a hè tokhlǒnu, a hè ô̌kǔ phǔ lô̌khô bǎ Běcǎ lǎ̤ hî̌bwǐhî̌sîrî htò̌ Cǒmara dě a dǐǎ kòyò saprṳ̂ tokhlǒ kû̌ mû̌ agûlǎ̤ nutûkû. Bǎ kòyò saprṳ̂ tokhlǒ kè̌shǐ Běcǎ Yeshǔ kû̌ akhôphijǎ tokhlǒ bǎnu tô̤̌ akha, pô̤̌khô asî gǔ cû̌ kè̌lǎ kè̌shǐ Běcǎ Yeshǔ ayanu, asî nṳ̌ lô̌khô dǒ sǒkhli tokhlǒ akû dě hǎhtò̌cû̌ lô̌khô dǒ Wî̤̌kaperanò̤.

Bǎ asî cû̌ kè̌shǐ Yeshǔ dǒ shikoǒdû̌ lô̤̌bò̌ akhanu, a gwè̌ lû̌û kû̌, “Rabǐ, na hètǒ̤ bǒo bǎkhò̌tè?”
Běcǎ Yeshǔ hî̌shěshu asî kû̌, “He hî̌cǒcǒ sî, sî kè̌shǐ he ma̤ ta̤cô̌klǐcô̌sè dě sî kè̌lǎ he mè̤̌tô̤̌. Sî ǎkǒ mû̌ dě sî kè̌lǎ he pwǎ. Jî̌pwǐ̤ ma̤pû shǎǎ lǎ̤ǎlǎ̤ô dǒ a nuso jò nutokhlǒ aya tǎ̤mǎ̤. Jî̌pwǐ̤ ma̤pû shǎǎshǎô dǒ a gǔ ǐ sî yôla htûpwa̤ tûjû̌pwa̤ tokhlǒ ayanu. Kòyòphû̌khû nî̌, a gǔ ǐ kòyò shǎǎ pô̤̌nu tokhlǒ pě, ma̤titèhî̌dě pha Cǒmara dǔlè̌lṳ̌ hto kû̌ a sǎphlǒô̌ lû̌û hǒ.”
Dě asî gwè̌ lû̌û kû̌, “Kè̌ ahî̌pô̤̌nu dě, pô̤̌khô pa gǔ ma̤tôma̤bǎ Cǒmara asǎphlǒ dě pa bǎma̤ kwè̌ mî̌titè?”
Dě Běcǎ Yeshǔ hî̌shěshu asî kû̌, “Yṳ̌ǎ lô̌khô he dǒ Cǒmara nohè anu.”
Pô̤̌nudě asî gwè̌ lû̌û kû̌, “Pô̤̌khô pa gǔ kè̌shǐ ta̤cô̌klǐcô̌sè dě pa gǔ yṳ̌ǎ ayanu, na gǔ dǔlè̌lṳ̌ bǎ pa ta̤cǒklǐ titèpěya? Na gǔ ma̤ bǎ pa mî̌titèpě ya? Pô̤̌khô lî̤plò̌shǐkû hî̌ kû̌, ‘A dǐǎ asî kû̌ shǎǎ ô̌ dǒ mǒkhû̌ hèlò̤ tokhlǒ,’ lî̤plò̌shǐkû ahî̌pô̤̌nu dě, paphipaphu dǒ awǐkhanu tokhlǒ ǎ lô̌khô mû̌ dǒ kòyò kaǎ kû̌ ma̤nǎ dǒ lǒ̤mî̌shô̌klanu.”
Běcǎ Yeshǔ hî̌shěshu asî kû̌, “He hî̌cǒcǒ sî, shǎǎ ô̌dǒ mǒkhû̌ hèlò̤ numî̌, Khûmṳ̂shě dǐǎ asî mè̤̌tô̤̌. Hepha dǐǎ asî pwǎ. Khònò̤̌dě a dǐǎ sî shǎǎ mè̤̌caca dǒ a ô̌ dǒ mǒkhû̌ hèlò̤ nuhǒ. Ma̤titèhî̌dě Cǒmara ashǎǎ mè̤̌mî̌ca mî̌ a ô̌ dǒ mǒkhû̌ hèlò̤ dě a ǐ kòyò hǎkhû̌phû̌ ta̤htûpwa̤ nutôpwa̤ hǒ,” A hî̌ asî pô̤̌nu.
Dě asî hî̌ kû̌, “Běcǎ, pṳ̂̌꤮ ni̤ni̤ ǐ mò̌ pa shǎǎnu.”
Dě Běcǎ Yeshǔ hî̌shěshu asî kû̌, “He mî̌ shǎǎ dǒ a ǐ kòyò ta̤htûpwa̤ hǒ. Kòyò dǒ a hètǒ̤ dǒ heô̌ nu, a sǎwǐsǎô pe tôkhò̌꤮ tô̤̌. Kòyò dǒ a yṳ̌ǎ he nu, a sǎôpe tôkhò̌꤮ tô̤̌. Bǎbǎkǎlè, pô̤̌ he hî̌hto sînu, sî kè̌shǐ he bǎbǎkǎlè sî yṳ̌ǎ he tô̤̌. Kòyò lǒ̤bò dǒ hepha ǐ he tokhlǒnu, a gǔ hè dǒ heô̌ pě. Kòyò mò̌pèpè̌꤮ bǎbǎ, a kè̌ hè dǒ heô̌ nu, he wṳ̂̌hǎhtò̌kè nô̌ a tîkî̌꤮ tô̤̌. Ma̤titèhî̌dě he ô̌dǒ mǒkhû̌ hèlò̤ dě he hèma̤ jû̌ tûû̌ he sǎphlǒ pô̤̌nu mè̤̌tô̤̌. He hèma̤ pô̤̌ pwa̤ dǒ a nohè he nutôpwa̤ a ta̤sǎyṳ nupwǎ. Ta̤ dǒ atô pwǎ dǒ a nohè he tôpwa̤ asǎphlǒ mî̌ ma̤titè numî̌, kòyò lǒ̤bò dǒ a ǐ he nutokhlǒ he bǎplû hǎmǎkè asî tô̤̌. Htû̌ lṳmṳ̌ni̤ gutṳ̌kò tôni̤ pěnu, he bǎma̤ ihtǒhtûpwa̤ getîkhî asî pě. Ma̤titèhî̌dě, hepha a ta̤sǎyṳ mî̌ amè̤̌kû̌ lǒ̤bò kòyò dǒ a kè̌shǐ aphû̌khû nudě a yṳ̌ǎ tokhlǒnu, a gǔ nǐ̤bǎ yôla htûpwa̤ tûjû̌pwa̤, dě he gǔ ma̤ ihtǒhtûpwa̤ getîkhî asî htû̌ lṳmṳ̌ni̤ gutṳ̌ nutini̤ pě.”
“He mî̌ shǎǎ ô̌dǒ mǒkhû̌ hèlò̤,” Běcǎ Yeshǔ hî̌ pô̤̌nu akhû̌akhî, Yǔdaphû̌ tokhlǒ tûmṳ̂̌ta̤ma̤bò lû̌û. Asî hî̌ lô̌khô kû̌, “A mî̌ Phayṳ̂tǎ aphû̌khû Yeshǔ hî̌nu tôpwa̤ pwǎ yahě? Amǒ̤apha mî̌ pa sî̌ganǎ̤ pwǎ mè̤tô̤̌ya? Ma̤titèdě a cû̌ hî̌ǐtǒ̤ tû̌ anǎ̤ kû̌, ‘he ô̌ dǒ mǒkhû̌ hèlò̤’ hî̌tè?”
Běcǎ Yeshǔ hî̌shěshu asî kû̌, “Tûmṳ̂̌ta̤ma̤ pe tǎ̤ lô̌khô tǎ̤mǎ̤. Kè̌ mè̤̌ kû̌ hepha dǒ a nohè he tôpwa̤ gǔ nohè kòyò dǒ heô̌ tô̤̌ hî̌nu, kòyò hèbò̌ dǒ he ô̌ tôpwa̤꤮ tô̤̌. Kòyò dǒ a hè dǒ heô̌ tokhlǒnu, he gǔ ma̤ ihtǒhtûpwa̤ getîkhî asî htû̌ lṳmṳ̌ni̤ gutṳ̌ tôni̤ pě. Piwi̤pèshè tokhlǒ wě̤nǎ kû̌, ‘Cǒmara gǔ sû̌ǐtòwòǐ asî bò̌꤮ bò pě.’ Lǒ̤bò kòyò dǒ a ganǎ̤de pha a ta̤sû̌ǐtòwòǐ dě a hè sû̌ǐtòwòǐ ta̤ dǒ lû̌ô̌ tokhlǒnu, a gǔ hè dǒ heô̌ pě. Kòyò kè̌shǐbǎ pha Cǒmara tôpwa̤pwa̤, he sǎyṳ hî̌ pô̤̌nu mè̤̌tô̤̌. Kòyò kè̌shǐbǎnô̌ pha tôpwǎ̤꤮ tô̤̌, kè̌shǐbǎ pha mî̌ tǒ̤pwǎ a ô̌ dǒ Cǒmara a ô̌ dě a hèlò̤ nutôpwa̤ pwǎ. He hî̌cǒcǒ sî, kòyò dǒ a yṳ̌nǐ̤nǎ̤nǐ̤ he tôpwa̤pwa̤nu, a gǔ nǐ̤bǎ yôla htûpwa̤ tûjû̌pwa̤ hǒ. He mî̌ shǎǎ dǒ a ǐ kòyò ta̤htûpwa̤. Sî phiphu dǒ awǐkha tokhlǒ ǎ ma̤nǎmû̌ bǎbǎkǎlè a sipe lô̌khô pwǎ. Bǎbǎkǎlè, shǎǎ ô̌ dǒ mǒkhû̌ hèlò̤ he hî̌ sî numî̌, a ô̌ bǒo. Mòpèpè̌꤮ bǎbǎ a kè̌ ǎ shǎǎ numî̌, a si petô̤̌. He mî̌ shǎǎ dǒ a ǐ kòyò ta̤htûpwa̤ dě a ô̌ dǒ mǒkhû̌ hèlò̤. Mòpèpè̌꤮ bǎbǎ, a kè̌ ǎ shǎǎnu, a gǔ htûpwa̤ tûjû̌pwa̤ pě. Shǎǎ numî̌ amè̤̌kû̌ heyî̌ nuhǒ. Pô̤̌khô kòyò hǎkhû̌phû̌ gǔ htûpwa̤ ayanu, he ǐlò̤kè he nǎ̤glǒnu dǒ asîya hǒ.”
Yǔdaphû̌ tokhlǒ ahtè̌ǐ kè̌khî lû̌û kû̌, “A cû̌ dǐǎ jò pa kû̌ ayî̌ hî̌tè?”
Dě Běcǎ Yeshǔ hî̌shěshu asî kû̌, “He hî̌cǒcǒ sî, sî kè̌ ǎ Kòyòphû̌khûnu ayî̌ tô̤̌, sî kè̌ ô asǐ tô̤̌ hî̌nu, ta̤htûpwa̤ ô̌ dǒ sîkû tô̤̌. Bǎbǎkǎlè kòyò dǒ a ǎ heyî̌, ô hesǐ tokhlǒnu, a nǐ̤bǎ yôla htûpwa̤ tûjû̌pwa̤, dě htû̌ lṳmṳ̌ni̤ gutṳ̌ dǒ nô̌kòlǒ tôni̤ pěnu, he gǔ ma̤ihtǒhtûpwa̤ gesô̌ lû̌û pě. Ma̤titèhî̌dě heyî̌ mî̌ lǎ̤ǎ mè̤̌mî̌ca, hesǐ mî̌ lǎ̤ô mè̤̌mî̌ca hǒ. Kòyò dǒ a ǎ heyî̌ ô hesǐ tôpwa̤pwa̤nu, a ô̌htûpwa̤ dǒ hekû, dě he ô̌htûpwa̤ dǒ akû hǒ. Phadǒ a nohè he nutôpwa̤ a htûpwa̤ akhû̌akhî, he htûpwa̤ kû̌yǎ. Pô̤̌nudě kòyò dǒ a ǎ heyî̌ tôpwa̤pwa̤nu, dǒ hekhû̌khî dě a gǔ htûpwa̤ pě. Phadǒ a nohè he nutôpwa̤ a htûpwa̤ akhû̌akhî, he htûpwa̤ kû̌ yǎ. Hǒomî̌ shǎǎ ô̌dǒ mǒkhû̌ hè hǒ. Sîphisîphu dǒwǐkha tokhlǒ ǎ ma̤nǎmû̌ bǎbǎkǎlè a si lô̌khô pwǎ. Bǎbǎkǎlè kòyò dǒ a ǎ shǎǎ dǒ he hî̌ bǎ sî khònò̤̌ tokhlǒnu a gǔ htûpwa̤ tûjû̌pwa̤ pě.” Bǎ a sû̌ǐtòwòǐlò̤ kòyò dǒ Wî̤̌kaperanò̤ ta̤cabahǐkû akhanu, a hî̌ kòyò pô̤̌nu.

Asî ganǎ̤de Běcǎ Yeshǔ ahî̌pô̤̌nu dě, akhôphijǎ saprṳ̂ hî̌ lô̌khô kû̌, “A ta̤sû̌ǐnu apò̤̌ jî̌jî̌. Mò̌pè tôpwa̤ glè̌ yṳ̌ǎ phî̌shǐshu bò̌ a ta̤sû̌ǐ ya?”
A khôphijǎ tokhlǒ tûmṳ̂̌ta̤ma̤ lô̌khô pô̤̌onu a sî̌ganǎ̤ akhû̌akhî, a hî̌ asî kû̌, “He hî̌ pô̤̌o dě sî sǎphlǒpî̌ bò lô̌khô kû̌ he ta̤sû̌ǐ nutokhlǒ ya? Kè̌ ma̤pô̤̌nu hî̌dě, sî kè̌shǐ Kòyòphû̌khû gǔ gehtò̌ sô̌ dǒ agûlǎ̤ lǎ̤ô̌ pě hî̌dě, sî gǔ gènè̤ lô̌khô hî̌tè pě ya? Yôla Plò̌shǐ Běcǎnu a ǐ ta̤htûpwa̤ tûjû̌pwa̤. Kòyò hǎkhû̌phû̌nu, a ǐ jò ta̤htûpwa̤ tûjû̌pwa̤ tô̤̌. Yô̤̌ dǒ he hî̌bǎ sî tokhlǒ numî̌, Yôla Plò̌shǐ Běcǎ a ta̤hî̌bǎ tokhlǒ dě a ǐbò̌ kòyò ta̤htûpwa̤ tûjû̌pwa̤. Bǎbǎkǎlè dǒ sîklanu, kòyò dǒ a yṳ̌ǎ gû̌ kòyò tô̤̌nu a ô̌ tokhlǒ.” Ma̤titèhî̌dě Běcǎ Yeshǔ sî̌ganǎ̤ dǒ akòshî̌ kû̌, dǒ asîklanu a yṳ̌ǎ lû̌û tô̤̌, dě a gǔ shaǎlò̤kè lû̌û pěnu a ô̌tôpwa̤nu, a sî̌ganǎ̤ dě a hî̌ asî pô̤̌nu pwǎ. A hî̌ sělě pô̤̌ kû̌, “Dǒ sîklanu kòyò yṳ̌ǎ he tô̤̌ ô̌ tokhlǒ, htodě he hî̌ sî kû̌, pha kè̌ nohè kòyò dǒ he ô̌ tô̤̌ hî̌nu, kòyò hèbò̌ dǒ heô̌ tôpwa̤꤮ tô̤̌, pô̤̌nu hǒ.”
Sahtò̌ bǎnu dě akhôphijǎ tokhlǒ gekè dû̌wî̤ dě gû̌ kû̌ pe lû̌kò tô̤̌.
Dě a gwè̌ akhôphijǎ shǐsò̌ginǐ̤ tokhlǒ kû̌, “Sîlè, sî sǎyṳ hǎhtò̌gekè helǎ̤ pô̤̌nu ya hě?” A hî̌ asî pô̤̌nu.
Khûshǐmû Petarǔ hî̌ geshěshu lû̌û kû̌, “Běcǎ, pa glè̌ cû̌ dǒ mò̌pè ô̌? Ta̤sû̌ǐtòwòǐ dǒ a ǐ pa yôla htûpwa̤ tûjû̌pwa̤nu a ô̌ pwǎtǒ̤ dǒ naô̌nô̤̌ pwǎ. Pa yṳ̌ǎ dě pa sî̌ganǎ̤ kû̌ na mî̌ Cǒmara a pwa̤plò̌shǐ tôpwa̤, dě a nohèlò̤ na hǒ.”
Htodě Běcǎ Yeshǔ hî̌shěshu asî kû̌, “He rû̌htò̌ hto sî shǐsò̌ginǐ̤hǒ, mè̤̌tô̤̌ ya? Bǎbǎkǎlè, dǒ sîklanu, hǎkhû̌tana ô̌ tôdo,” A hî̌ asî pô̤̌nu. (A hî̌ pô̤̌numî̌ a sǎyṳ hî̌ Phashǐmṳ̂ Isakariyû aphû̌khû Khûyǔda. A mî̌ a ô̌plǒ dǒ shǐsò̌ginǐ̤ akla bǎbǎkǎlè dǒ nô̌kònu a shaǎlò̤kè Běcǎ Yeshǔ.)

Dengarkan Yṳ̂ha 6