If you have would like a copy of this version please contact info@davarpartners.org

Mandeali Bible, CC-BY-SA-4.0, The Love Fellowship (Text). Mandeali New Testament Audio Bible, CC-BY-SA-4.0, Davar Partners International, 2021 (Audio)

Mandeali New Testament

This work is licensed under Creative Commons Attribution-ShareAlike 4.0 License.

इन्हा गल्ला ले बाद यहूदी लोका रा एक साजा हुआ होर यीसू यरुस्लेम सैहरा जो चली गया। यरुस्लेम सैहरा मन्झ भेड फाटका वाले एक तलाब आ जेस जो इब्रानी भासा मन्झ बेतसैदा बोल्हा ऐं। होर एसरे चारो वखा जो छापर था, जेसरे पांज खम्बे थे। इन्हा मन्झ बौह्त बीमार, काणे, लंगड़े, होर बेजान हुई चुकिरे अंगा वाल़े पाणी रे हीलणे रे इंतजारा मन्झ तेथी पईरे हुंहाँ ऐं थे। क्यूंकि नियुक्त कितिरे टैमा रे मताबक परमेसरा रे स्वर्गदूत तलाबा मन्झ उतरी किन्हें पाणी जो हिलाहें थे। पाणी हीलदे रे बाद झटपट जो कोई पैहले उत्रहा था से ठीक हुई जाहाँ था चाहे तेसरी केह्ड़ी भी ब्मारी कि नी हो। तेथी एक माह्णुं था, जो ठती साला ले ब्मारिया मन्झ पईरा था। यीसूए तेस जो तेथी पईरा देखी किन्हें होर ये जाणी किन्हें कि ये बौह्त ध्याड़े ले एस दसा मन्झ पईरा। तेस ले पूछेया, “क्या तू ठीक हूंणां चाहां?” तिन्हें ब्मारे यीसू जो जवाब दितेया कि, “हे प्रभु, मेरे वाले कोई माह्णुं नी आ कि, जेबे जे पाणी हिलाया जाहाँ, ता मुंजो तलाबा मन्झ तुआरी सके; पर मेरे पुजदे-पुजदे दूजा मेरे ले पैहले उतरी जाहाँ।” यीसूए तेस जो बोल्या, “उठ आपणा बिस्त्रा चक होर हांडदा लग।” से आदमी झटपट ठीक हुई गया, होर आपणा बिस्त्रा चकी किन्हें चली गया।
होर से ध्याड़ा अरामा रा ध्याड़ा था। एता कठे यहूदी लोक तेस किन्हें बोल्दे लगे जो ठीक हुई गईरा था कि, “आज ता अरामा रा ध्याड़ा आ, होर मूसा रे व्यवस्था रे मताबक तेरा बिस्त्रा चकणा ठीक नी आ।” तिन्हें तेस जो जवाब दितेया कि, “जिन्हें हांऊँ ठीक कितेया, तिन्हें ई मुंजो बोल्या, ‘आपणा बिस्त्रा चकी किन्हें हांडदा लग।’” तिन्हें तेस ले पूछेया, “से कुण माह्णुंआं जिन्हें जे तुजो बोल्या, आपणा बिस्त्रा चकी किन्हें हांडदा लग।” पर से जे ठीक हुई गईरा था, से नी जाणदा था कि तेस जो ठीक करणे वाल़ा कुणहां; क्यूंकि तेस जगहा मन्झ भीड़ भड़ाका हूंणे री बजहा ले यीसू तेथी ले बिना दसे चली गया। इन्हा गल्ला ले बाद यीसू जो से मन्दरा मन्झ मिल्या, तेबे यीसूए तेस किन्हें बोल्या, “देख, तू ता ठीक हुई गईरा; फेरी दबारा कधी पाप देख्या करदा, एह्ड़ा नी हो कि एता ले भी कोई बड्डी बिपदा तेरे पर आई जाए।”
तेबे तिन्हें माह्णुंऐ जाई किन्हें यहूदी अगुवे किन्हें बोली दितेया कि, जिन्हें जे हांऊँ ठीक कितेया, से यीसू आ। एता रे कठे यहूदी अगुवे यीसू जो स्तांदे लगे, क्यूंकि से एह्ड़े-एह्ड़े काम अरामा रे ध्याड़े करहा था। पर यीसूए तिन्हा जो बोल्या कि, “मेरा बापू हमेसा काम करहा, होर मुंजो भी काम करणा चहिए।” क्यूंकि एस गल्ला जो बोलणे री वजहा ले यहूदी अगुवे होर भी ज्यादा तेस जो मारणे री कोसिस करदे लगे कि, से ना सिर्फ अरामा रे ध्याड़े रे नियमा जो तोड़हा, पर परमेसरा जो आपणा बापू बोली किन्हें, आपणे आपा जो परमेसरा रे बराबर मन्हां।

एता पर यीसूए तिन्हा जो बोल्या, “हांऊँ तुस्सा किन्हें सच्च -सच्च बोल्हा, हांऊँ मह्ठा आपणे आप कुछ नी करी सक्दा, पर से सिर्फ तेह्ड़ा ई करहा जेह्ड़ा से बापू परमेसरा जो करदे देख्हा, क्यूंकि जो-जो काम से करहा, तिन्हा कामा जो मह्ठा भी तेह्ड़ा ई करहा। क्यूंकि मह्ठा बापू परमेसरा किन्हें प्यार करहा होर जो-जो काम से आपु करहा, से सभ तेस जो दस्हा; होर तेस एता ले भी बडे-बडे काम तेस जो दसणे, ताकि तुस्से हरान हुई सको। क्यूंकि जिहां बापू मरिरे लोका जो जिउंदा करी किन्हें जिन्दगी देहां, तिहां ईं मह्ठा भी जिन्हां जो से चांहा तिन्हा जो जिन्दगी देंहां। एह्ड़ा नी आ कि बापू केसी रा न्याय नी करदा। जिहां सब लोक बापू री इज्जत दें तिहां ईं मह्ठे जो भी इज्जत देयां, बापू परमेसरे न्याय करणे रा सारा हक मह्ठे जो देई दितिरा। जो मह्ठे री इज्जत नी करदा से बापू परमेसरा री भी इज्जत नी करदा जिन्हें जे से भेजिरा।”
“हांऊँ तुस्सा किन्हें सच्च -सच्च बोल्हा, जो मेरे बचन सुणी किन्हें मेरे भेजणे वाल़ेया रा विस्वास करहा, अनंत जिन्दगी तेसरी ई, होर तेस पर सजा रा हुक्म नी हुन्दा पर से मौता ले पार हुई किन्हें नौंईं जिन्दगी पाई चुकिरा। हांऊँ तुस्सा किन्हें सच्च -सच्च बोल्हा, एह्ड़ा टैम आहूँआं, होर ऐबे भी आ, जेबे मरिरे लोका मेरी यानि परमेसरा रा मह्ठे री अवाज सुणनी। होर जो सुणघे तिन्हा हमेसा जीणा। क्यूंकि जिहां बापू आपणे आपा मन्झ जिन्दगी रख्हा, तिहां ईं तिन्हें ये हक आपणे मह्ठे जो भी दितिरा कि स्यों आपणे आपा मन्झ जिन्दगी रखे। क्यूंकि हांऊँ माह्णुं रा मह्ठा आ। इधी कठे बापू परमेसरे मुंजो न्याय करणे रा भी हक दितेया।”
“एता ले हरान मत हुआ, से टैम आहूँआं कि, जितने भी मरिरे लोक ऐं, सभिया तेसरी अवाज सुणनीं होर जिउंदे हुई जाणा। जिन्हें जे भलाई कितिरी तिन्हा अनंत जिन्दगी रे कठे मरिरे मन्झा ले जी उठणा, होर जिन्हें जे बुराई कितिरी तिन्हा सजा रे कठे मरिरे मन्झा ले जी उठणा।”

“हांऊँ आपणे आप कुछ नी करी सक्दा; जो हांऊँ सुणहां, हांऊँ तेह्ड़ा ई न्याय करहा, होर मेरा न्याय सच्चा आ, क्यूंकि हांऊँ आपणी इच्छा नी, पर आपणे भेजणे वाले री इच्छा चांहां। जे हांऊँ आप्हुए आपणी गुआही देऊँ ता मेरी गुआही सच्ची नी ई। एक होर आ जो मेरा बापू आ, जेह्ड़ा मेरे बारे मन्झ गुआही देहां। होर हांऊँ जाणहां कि जेह्ड़ी गुआही से देहां से सच्ची ई। तुस्से यहून्ना बपतिस्मा देणे वाल़े लोक भेजे, होर तिन्हें सच्चाई री गुआही दिती। पर हांऊँ आपणे बारे मन्झ माह्णुंआं री गुआही री जरूरत नी, फेरी भी हांऊँ ये गल्ला इधी कठे करहा, ताकि तुस्सा जो उद्धार मिले। यहून्ना एह्ड़ा दिऊया था जो भख्हा होर चमक्हा था। होर तुस्सा जो कुछ देरा तक तेसरे प्रयासे मन्झ, मगन हूंणां बांका लग्या। पर मेरे वाले जो गुआही ई से यहून्ना बपतिस्मा देणे वाल़े री गुआही ले बड्डी ई। क्यूंकि जो काम बापूए मुंजो पूरा करणे रे कठे सौम्पिरा से येई काम आ जो हांऊँ करहा, स्यों मेरे गुआह ऐं कि, बापूए हांऊँ भेजिरा। होर बापू जिन्हें जे हांऊँ भेजिरा, तिन्हें ई मेरी गुआही दिती। तैं ना कधी तेसरी अवाज सुणी, होर ना तेसरी सकल देखी। होर तुस्से तेसरे बचना जो मना मन्झ नी बसणा देंदे क्यूंकि जिन्हें जे से भेज्या तेसरा विस्वास नी करदे।”
“तुस्से पवित्र सास्त्रा रा मनन करहा ऐं, क्यूंकि तुस्से ये सोच्हा ऐं कि तेता मन्झ तुस्सा जो अनंत जिन्दगी मिल्हा ई, होर ये सभ गल्ला मेरे बारे मन्झ ई गुआही देंहां ईं। फेरी भी तुस्से अनंत जिन्दगी पाणे रे कठे मेरे वाले नी आऊंणा चाहन्दे।
हांऊँ माह्णुं ले इज्जत नी चाहन्दा। पर हांऊँ तुस्सा जो जाणहां कि, तुस्सा परमेसरे किन्हें प्यार नी करदे। हांऊँ आपणे बापू रे नांऊँआं ले आईरा, होर तुस्से मुंजो नी मन्नदे; अगर कोई होर आपणे ई नांऊँआं ले आई जाए, ता तुस्सा से ग्रैहण करी लैणा। तुस्से मेरे पर विस्वास नी करी सकदे? क्यूंकि तुस्से जे एक दूजे ले इज्जत चाहें, होर तेस्सा इज्जता रे बारे मन्झ सोच्दे भी नी जो परमेसरा री तरफा ले आहूँआं ईं।”
“ये नी समझा कि, मां बापू रे साम्हणें तुस्सा पर दोस ल्गाणा, तुस्सा पर दोस लगाणे वाल़ा ता मूसा आ जेस पर तुस्से आस रखिरी। क्यूंकि अगर तुस्से मूसा रा विस्वास कितेया, ता तुस्से मेरा भी विस्वास करदे, क्यूंकि तिन्हें मेरे बारे मन्झ लिखिरा। पर मुसे जेह्ड़ा मेरे बारे लिखिरा अगर तुस्से एस गल्ला रा विस्वास नी करदे, ता मेरी गल्ला रा विस्वास तुस्सा किहाँ करणा?”

Dengarkan यहून्ना 5