ROOMA KAM 6:11

Սիրելի՛ բարեկամ, առաջիկա 7 օրերի ընթացքում ուղերձների մեր շարքը հիմնված է լինելու մի թեմայի վրա, որ կոչվում է «Մարդու սրտի գաղտնիքները»։ Հույս ունեմ, որ դու կօրհնվես այս շարքով և կբացահայտես Տեր Աստծո անսահման սերն ու հայրական հոգատարությունը քո հանդեպ։ Նրա առջև չկա ոչ մի փակ դուռ։ Նա ներկա է այն ծածուկ վայրում, որտեղ դու առանձնանում ես մարդկանցից, և Նա տեսնում է քո սիրտն ու լսում մտքերդ։

Իմաստությունը Տեր Աստծուն Աստվածաշնչի շնորհիվ ճանաչելն է և Նրա հանդեպ սուրբ երկյուղ ունենալը։ Մեղքը սիրելը, մեղքն արդարացնելը կամ այն թաքցնելն ու փայփայելը խոսում են Տիրոջ երկուղի բացակայության մասին։ Աստվածավախությունը կարևորագույն նախապայման է Տեր Աստծու խոստացած օրհնություններն ընդունելու համար։ Աստծուց երկյուղ ունեցող մարդը լցվում է Տիրոջ Խոսքի ու խոստումների հանդեպ վստահությամբ։ Աստվածավախությունը բխում է հավատքից և մարդու մեջ զարգացնում է Տեր Աստծու կամքի ու պատվիրանների հանդեպ հնազանդության վերաբերմունք, առանց որի չկա փրկություն:

Այս աշխարհում կան շատ վտանգներ։ Մարդու կյանքի ողջ ընթացքը կախված է նրա հոգևոր վիճակից։ Երբ մարդը իր համար հաճելի վիճակ փնտրելով հակառակվում է Աստծու կամքին, նա կամովի մուտք է գործում մեղքի ու մահվան տիրույթ և վտանգում է թե՛ սեփական առողջությունը, թե՛ գործերի հաջողությունը և թե՛ իր հոգևոր ընթացքն ու պաշտպանվածությունը։ Մեղքն իր մեջ մեծ զորություն ունի մարմնավոր մարդկանց դեպի իրեն քաշելու համար։ Մեղքն ունի ուժ միայն այնքան ժամանակ, քանի դեռ այն գաղտնի է։ Երբ մեր մեղքերը բերում ենք լույսի մեջ՝ խոստովանելով դրանք Աստծուն և որոշում կայացնելով դրանք հեռացնել մեր կյանքից, Աստծու պաշտպանությունը գալիս է մեզ վրա:

Երբ ընկճված ես ու ուժասպառ, աչքերդ ուղղի՛ր Տեր Աստծուն։ Նրա համար չկա անելանելի իրավիճակ։ Նրա համար չկա անհնարին որևէ բան։ Սակայն Նրանից օգնություն ընդունելու համար պայման գոյություն ունի։ Մարդը պետք է համարձակությամբ մոտենա Նրա շնորհի աթոռին։ Աստված խոնարհներին է շնորհ տալիս և հոգ է տանում նրանց համար։ Քո ողջ ուշադրությունը կենտրոնացրո՛ւ Տեր Աստծու Խոսքի մեջ Նրա կամքը ճանաչելու ընթացքի վրա։ Տիրոջն ապավինող մարդկանց համար սպասելը ու Նրան վստահելը լցնում է ուժով, զորացնում և արծվի թևերով բոլոր խնդիրներից ու դժվարություններից վեր սավառնել է սովորեցնում։