ROOMA KAM 12:12

Միայն պատկերացրու, թե ինչե՜ր կարող էիր անել, եթե Տերը Իր պարգևներով զիներ քեզ։ Խորհի՛ր քո ծառայության կամ կյանքի մասին, եթե քո միջոցով գործեին Աստծո Սուրբ Հոգու գերբնական պարգևները։ Աստված Իր Խոսքում մեզ հորդորում է խնդրել Իրեն հոգևոր պարգևների համար և փնտրել Իր երեսը։

Աղոթքը հոգևոր աշխարհում գերբնական ուղիներ է հարթում, որպեսզի Տեր Աստծու գերբնական զորությունը գործի աղոթքի միջոցով և շտկի տարբեր խնդիրներ ու լուծում տա տարբեր դժվարին իրավիճակների։ Միաբան աղոթքը զորավոր է և համոզված եմ, որ եթե մենք միաբանվենք և աղոթենք մեր ընտանիքների համար, մեր երկրի համար, եկեղեցիների համար, մեր իշխանությունների համար, մեր Աստված լսելու է մեր աղոթքները և Իր ողորմությամբ օրհնելու է մեզ, մեր երկիրն ու մեր ժողովրդին։

Դարձ՛իր «Հույսի Տուն» ծառայության մի մասնիկը։ Այսօր բազմաթիվ են մարդիկ, որոնք իրական օգնության կարիք ունեն։ Տեր Հիսուսը մարդկանց բաժանելու է երկու մասի։ Մի մասն անտարբեր է լինելու կարիքի մեջ գտնվող մարդկանց հանդեպ, իսկ մյուս մասը սեր և հոգատարություն է ցուցաբերելու նրանց հանդեպ։ Քրիստոսի հանդեպ հավատքը երևում է կարիքի մեջ գտնվող մարդկանց հանդեպ մեր վերաբերմունքի մեջ։ Եթե քո շրջապատում կան կարիքի մեջ գտնվող մարդիկ, ապա աղոթի՛ր նրանց համար ու տեղեկացրո՛ւ «Հույսի Տուն» ծառայությանը: «Հույսի Տուն» ծառայությունը ո՛չ միայն օգնություն է տրամադրում ֆիզիկապես սոված ու ծարավ մարդկանց, այլև պատրաստ է այցելելու հոգևոր սով ու ծարավ զգացողներին։

Ի՞նչ է Աստծու Արքայությունը։ Այն տեսնելու համար հավատքի աչքեր են պետք՝ հավատք, որը հիմնված է Աստվածաշնչի փոխանցած ճշմարտությունների վրա։ Որքա՜ն կարևոր է մեր հոգսերի ու կարիքների համար մտահոգվելու փոխարեն Աստծու Արքայությունը խնդրելու ու փնտրելու վրա կենտրոնանալը։ Մարդը պետք է ուրանա իր անձը՝ մի կողմ դնի իր անձնական երազանքները, շահն ու հարմարավետությունը, պատրաստ լինի կյանքը զոհելու հանուն այդ Արքայության և հետևելու Տեր Հիսուսի օրինակին, հանձնարարություններին ու արժեհամակարգի սկզբունքներին։ Աստծու Արքայությունը մարդու կյանքում գալիս է, երբ նրա կյանքում հաստատվում է Տեր Աստծու կամքի լիակատար իշխանությունը: