1 Pedro 2:2

Բարությունն Աստծու էությունն է։ Նա բարիք է կամենում անգամ ամենաչար մարդկանց։ Բարությունը կապ ունի դիմացինի կարիքի կամ իրավիճակի հանդեպ ունեցած արձագանքի հետ։ Աստված ուզում է հոգատարությամբ և բժշկության ու ազատագրության Իր միջամտությամբ արձագանքել քո կարիքին: Սակայն Տերը Ինքն է պայման դնում Իր բարությունն ընդունելու համար։ Նրա բարությունը կարող են ընդունել միայն Նրա կամքին հնազանդության որոշում կայացրած և Նրա նախանշած ճանապարհներով ընթացող մարդիկ։ Աստված բարի է անգամ այն ժամանակ, երբ պատժում է մարդուն։ Տեր Աստծու խրատներն ու պատիժները նպատակ ունեն սթափեցնելու մարդուն և հետ պահելու նրան հավիտենական կործանումից։

Ինչպես ֆիզիկական աշխարհում ամեն մարդ, ամեն ընտանիք ու ամեն ժողովուրդ իր յուրահատուկ հոտն ունի, այնպես էլ հոգևոր աշխարհում մարդիկ որոշակի հոտ ունեն։ Աստվածաշունչը սովորեցնում է իրական քրիստոնյաներից բխող անուշահոտության մասին։ Մարդու վրայից եկող հոգևոր հոտը ձևավորվում է նրա շփման միջավայրի, նրա ստացած հոգևոր սնունդի, նրա զոհաբեր սիրտ ունենալու և ճզմվելու արդյունքում: Խոստովանությամբ և ապաշխարությամբ հեռացրո՛ւ քո կյանքից բոլոր գարշահոտությունները։ Դարձի՛ր Քրիստոսի անուշ բույրը քո շրջապատի մարդկանց մեջ և վայելի՛ր Քրիստոսի աշակերտի կյանքով ապրելու պատիվն:

Արդյո՞ք դու գիտես, որքան կարևոր է ունենալ հոգևոր առաջնորդ: Հոգևոր առաջնորդությունը մերժելը նշանակում է մերժել Տեր Հիսուսի դրած կարգը։ Առանց առաջնորդության մարդը կարող է հեշտությամբ խաբվել ու շեղվել ճշմարտության ճանապարհից։ Հոգևոր առաջնորդը անձնուրաց կերպով կպաշտպանի քեզ քո կյանքում առկա հոգևոր վտանգներից։ Երբ հոգևոր առաջնորդը հնազանդ է Աստծուն և գործում է Տիրոջ կամքի մեջ, նրան չհնազանդվելը ապստամբություն է Աստծու դեմ։ Գիտե՞ս արդյոք, թե որքա՜ն կարևոր է ճիշտ ու հմուտ հոգևոր առաջնորդ ունենալը։ Հոգևոր առաջնորդի ծառայությունից է կախված քո հոգևոր ընթացքը և հոգևոր աճի ու հասունության մակարդակը։ Յուրաքանչյուր հոգևոր առաջնորդ հաշիվ է տալու Աստծուն իր կողմից առաջնորդված հավատացյալների հոգևոր ընթացքի համար։

Աստված մարմնով հայտնվեց, որպեսզի վերականգնի մարդու հետ վերջինիս անհնազանդության ու մեղքի ապստամբության արդյունքում խաթարված հարաբերությունը։ Հիսուսն է կամուրջը։ Տեր Աստծու հետ հաշտություն գտած մարդիկ դառնում են երանելի խաղաղարարներ մյուս մարդկանց հետ իրենց հարաբերություններում։ Քրիստոս աստվածային Լույսն է, որ վառվեց այս խավար աշխարհի մեջ։ Քրիստոսի շնորհի տակ ապրող մարդկանց վրա մեղքն այլևս ոչ մի իշխանություն չունի: Տեր Հիսուսի խաչի մահը մեր մեղքերի ներման հիմքն է։ Նրա հարությունը՝ մեր արդարացման հիմքը։