Աստվածաշնչի հայտնի հատվածներ COLOSENSES 3-ից

Կիսվել

Niźaśa anćhukki porapatź awantasa, niźaśa tshïsuñaki yaqha jilźtan kijchiślax nïki śumansna. Xalla nuź ni Yöś Tataki ućhumnak pertunchićha, anćhukmi niźtaśaqaś pertuna.

Niźaśa anćhukki ni tsewkta ćhhultaqinakkiśqaś pinsalla, ana ti yoq ćhhultaqinakkiśiki.

Ćhhulu lanqźkanami thapa quśtan pä, Yöś Tatźta lanqźtaźuqaś ana źoñźta lanqźtaźuqaś.

Niźaśa Yöśki anćhukź pekćha niźaśa anćhuk ni źkayi quśśiś jilanakźtan źelaxu illśićha. Niźaśa anćhukki Yöś illśta źoñiźta śuma oqśñi quśśiś khella, amu quśśiś, llanu quśśiś, niźaśa paśinśichś quśśiś khisna.

Niźaśa ni Criśtuź śuma taqunakaki anćhukakiśpanx qamla nïź źelinśtanpacha. Niźaśa anćhukki anćhukporaź thapa śiśnakźtan chïźinasa, niźaśaź thaxsasa. Niźaśa Yöśkin thapa quśtan sparakiź khiś wakiśićha salmunakźtan iranakźtan its wirsunakźtanami. Niźaśa thappacha anćhukaź pätanakami chïtanakami Jesús Tatź thükiś pä, niźaśa Criśtuź qharkiśtan Yöś Ephźkin sparakiź khekićha.

Niźaśa anćhukki thapa tinakźkiśtan oqśñi quśśiś khisna, xalla nïćha cheqpacha śuma munaśiśki.

Niźaśa anćhukki Criśtuźtan chika jakatatsqattićhukćha, ni tsewkta ćhhultaqinakapanź qhuralla, ni Criśtu Yöś źewqhuttan julśi źelhćha xalla nikhu.

Niźaśa ni Criśtuź śuma qamañaki anćhuka quśkiśx qamla, xalla ti qamañxapa Yöśki tshi xañchichiś khisqatśxapa qhawśićha. Xalla niźtikiśtan anćhukki thapa quśtan sparakiź khiś wakiśićha.

Niźaśa anćhukki ni anćhuka quśkiś ti yoq ćhhultaqkiśtan pinsiśnaka thatźnalla: Anax jëkhmi yaqha mätaqźtan źelhla, niźaśa anax anaśum ćhhultaqinaka päla, niźaśa anax xañchiź pektakama päla, niźaśa anax xamri quśśiś khïkhila (xalla nïki ni źoñiź päta yöś amtitaźuqaśśa).

Niźaśa anćhukki tikhśinćhukćha, ans Yöś anćhukaltaxapa ni Criśtuźtan qamś qamaña ćhhetźinchiki.

Anś anćhukki ti qamañanakaź ekalla: Ni źaxwś, kuliraś, anaśumanaka päś, ar arś, chuchś, niźaśa ni ućhumnaka atkiśtan anaśumanaka chïś.

Niźaśa anaź porapat toskar tawqźtan thxotsasa, anćhukki ni tukita uj päś qamaña ekchinćhukćha, ans anćhukki ni ew qamañ śkiti kuthśinćhukćha: Niźaśa ni ew źoñźkiśtanami, niźaśa anćhukki Yöś irataź khissa, ni anćhuk päñi irata niźaśa ni śuma paxśxapa.

Niźaśa luktaqanaka perśun thunpanź peka, ninaka ana q'illmacha.

Niźaśa anćhuk okhalanaka anćhuka mä ephź kaśa, xalla tïki Yöś Tatźta añcha walićha.

Niźaśa śalśi mätaqanakaki perśun luktaqanakź xaru khiśtanćha, xalla tïki Yöś Tata kirïchiź qamañaćha.