San Mateo 16
16
Nk'aj fariseo rich'il nk'aj saduceo xikta jun nimlaj k'utb'al che Jesús
(Mr 8:11-13; Lc 12:54-56)
1O nk'aj fariseo rich'il nk'aj saduceo xiyo'pan ruk' Jesús, jare kkaj ke kiktaqch'ij che mak. Ena xikta che, che ku'on jun nimlaj k'utb'al chikuch, k'utb'alre we chla' chkaj ruk' Dios pitnaq wi; xa jare kkaj ke kikqasaj chpam umak.
2Ena xub'ij Jesús chke: «Echi' kqaj ij, ix kib'ij: “Chwe'q s'ij ku'ono mal keq unom upkaj”, kixche che. 3Ni kisqarik kib'ij chik: “Kmik ku'on mas jab' mal keq unom upkaj soq xa eqmuj”, kixche che. Iwit'am sutaq ku'on upkaj, per kich'ob' taj su kilwi, ri nmaq taq k'utb'al che kintjin che u'anik chu'ij saq. 4Nk'aj mnaq iy'o chu'ij saq, xa jare kkaj ke wet kin'an jun nimlaj milagro chikuch, k'utb'alre we o uchu'ab' Dios wuk'. Per otchich k'utb'al k'an chikuch, xaq xaw k'utb'alre peche xu'on Dios ruk' u Jonás, che ajb'il utzij Dios ujer».#Mt 12:39-40. Jala xub'ij Jesús chke, tik'ri xyuya kanoq, x'ek.
Nk'aj fariseo rich'il nk'aj saduceo jala kmow peche nk'aj ch'am rech kaxlenwa
(Mr 8:14-21)
5Echi' xi'ax nk'aj udiscípulo Jesús ch'qap che mar, xna'taj taj chke xikk'am b'i kaxlenwa. 6Ni Jesús xub'ij chke:
—¡Chitampe'! China kwent iwib' chikuch nk'aj fariseo rich'il nk'aj saduceo, rmal mel ke, xa jala kmow peche nk'aj ch'am kjom ruk' k'ej rech kaxlenwa che xa kispojik, —xche chke.
7Ni nk'aj udiscípulo xikmaj ub'ixik chikuch:
—Jala kub'ij chqe, xa rmal mel ot qakaxlenwa xqak'am loq, —xicha'.
8Ri Jesús rit'am chik su kikb'ij chikuch. Ena, xub'ij chke:
—¿Suche che kixch'aw chiwuch chrij kaxlenwa che iwuk'am taj? Ix xa ch'in ikojb'al olik. 9¿Le mja kich'ob'o su xin'ano? ¿Le mja kqaj ntzij pijlom? ¿Le kna'taj t chiwe su xin'ano? Echi' xinjach uwuch j'ob' (5) kaxlenwa chikuch j'ob' mil (5,000) mnaq, ¿jumpa chkach uqax xisik'o che xikk'is taj? 10Echi' xa jqub' (7) kaxlenwa xinjach uwuch chikuch kjeb' mil (4,000) mnaq, ¿jumpa chkach xisik'o che xikk'is taj? 11¿Suche che kich'ob' taj su kilwi ti ximb'ij chiwe, che ki'an kwent iwib' chikuch nk'aj fariseo rich'il nk'aj saduceo? Jala ximb'ij chiwe rmal mel xa jala kmow peche nk'aj ch'am kjom ruk' nk'aj k'ej rech kaxlenwa che xa kispojik. —Jala xub'ij Jesús chke nk'aj udiscípulo.
12Tik'ri k'ut xikch'ob' nk'aj udiscípulo che jare taj nk'aj ch'am rech kaxlenwa kub'ij Jesús chke, xa jare kub'ij chke che kik'an kwent kib' chjuch runjel jumpa sutaq'ik kikk'ut nk'aj fariseo rich'il nk'aj saduceo echi' kkitjoj mnaq che utzij Dios.
U Lu' xub'ij che ri Jesús, jare Re Cristo, xchay rmal Dios
(Mr 8:27-30; Lc 9:18-21)
13Echi' xo'pan Jesús chpam un lyar o pukwent tinmit Cesarea Filipo, xuta chke nk'aj udiscípulo, xub'ij:
—¿Nchin In nAchi nuK'jol Dios che kikb'ij mnaq? —xche chke.
14Ni ke xikb'ij che:
—O nk'aj kikb'ij che lal jare u Wan ajb'nal qasna', o nk'aj chik kikb'ij che lal jare qari'jal Elías, soq o nk'aj chik kikb'ij che lal jare u Jeremías, seno lal jare jun chik chke ajb'il utzij Dios ujer, —xiche che.
15Tik'ri xuta chik chke ke, xub'ij:
—Ni ix, ¿nchin in che kib'ij ix? —xche chke.
16Nu Simón Lu' xub'ij:
—Lal jare la ri Cristo,#16:16 Cristo kel kub'ij jun chaytajnaq rmal Dios. Un tzij Mesías xaq jnam kilwi. xchay rmal Dios. Jare la uK'jol ri k'aslik Dios, —xche che.
17Ena xub'ij Jesús che:
—Utz awe at Simón atuk'jol u Jonás, che jala xab'ij chwij, xa rmal jare t jun mnaq xub'ij chawe che jala kab'ij chwij, xani jare nQaw o chla' chkaj xub'ij chawe. 18In kimb'ij chawe, at atLu'.#16:18 Un b'i' Lu' kel kub'ij ab'aj. Chjuch nab'aji', kinyak utinmit Dios che kin'ano. Xa jala', kikun taj uchu'ab' kmik kusach kwuch utinmit Dios. 19In kinya na atb'altzij pa'ab', peche u'anik jun lawe rech utzlaj atb'altzij rech Dios. Runjel jumpa sutaq'ik kaximo chi' chuchlew soq ximtal chjuch Dios chla' chkaj. Soq runjel jumpa sutaq'ik katuru chi' chuchlew, soq turtajnaq chjuch Dios chla' chkaj. —Jala xub'ij Jesús che u Lu'.
20Tik'ri k'ut, ri Jesús xyupixb'ej nk'aj udiscípulo, xub'ij chke che xa mikb'ij che jun chik mnaq che jare Re Cristo.
Ri Jesús xub'ij che kkamsax na
(Mr 8:31–9:1; Lc 9:22-27)
21Mismo chanim xumaj ub'ixik Jesús chke nk'aj udiscípulo che nmister k'e Re chpam tinmit Jerusalén. K'an na k'ax che chla' kmal nk'aj mnaq che itk'al pkijlom nk'aj aj Israel, rich'il nk'aj ajk'mal b'e chke nk'aj rajchak Dios, soq rich'il nk'aj ajtojnel rech upxab' Dios. Soq nmister kikkamsaj na. Tik'ri, churox ij kk'astaj chuwuch chikxo'l nk'aj kamnaq.
22U Lu' xuresaj b'i Jesús chikxo'l, echi' xaq kitkel iy'olik, xumaj uyajik, xub'ij che:
—¡Jaretb'a ri Dios ku'atij wari' rech ot su kriq la! ¡Ri Qajaw Dios kraj taj che kkamsax la! —xche che.
23Ri Jesús xutza'mej uwuch chrij, xub'ij che u Lu':
—¡Katel chinwuch, itzel Satanás! Xaq kaya latz' chwe. At, Lu', jare taj kach'ob'o su kraj Dios, xa jare kach'ob'o su kkaj mnaq, —xche che.
24Ena xub'ij chik Jesús chke nk'aj udiscípulo:
—We o jun kraj kok wuk' chpam nchak, ot mow che xaw ku'ono su kraj re ku'ono. Jare nmister che kutij k'ax che u'anik su kwaj in, peche kutelej b'i ucruz, kitrij chwij, miskini' su kkam rmal. 25Chin jun che xa jare kub'soj uk'asnmal chi' chuchlew, echi' ksachtaj uwuch, ot su kuri'ej chik; per chin jun ksachtaj uwuch wmal wech in, jare re kuriq na jun uk'asnmal chla' chkaj ruk' Dios che ot uk'isik. 26¿Sut uptan che jun mnaq we kuch'ak runjel jumpa kriqtaj chi' chuchlew, we xa kusach uk'asnmal ruk' Dios? ¿Su kuya na jun mnaq rech kuk'ex uwuch ruk' junalik uk'asnmal? Otaj. 27In nAchi nuK'jol Dios, kimpi na ruk' nim reqle'n nQaw. Wuk'am loq uchu'ab' nQaw chla' chkaj che nim u'ij, jnam kujpi kuk' taq ángel. Tik'ri k'ut kinya na chke mnaq chikjunjnal, ri tojb'alke rech kchak che kinom. 28Ruk' saqlaj tzij kimb'ij chiwe, che jumpa mnaq iy'o chi' ile', iy'o keb' uxib' chke che kikam taj ast retal echi' kikkil na ti kimpi In nAchi nuK'jol Dios. Kimpi che u'anik utzlaj atb'altzij che xnutaq loq nQaw che u'anik. —Jala xub'ij Jesús chke nk'aj udiscípulo.
Jelenleg kiválasztva:
San Mateo 16: qucSAS
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
