San Mateo 15
15
¿Su rmal ku'on tz'il ranma' jun mnaq?
(Mr 7:1-23)
1Iy'o nk'aj fariseo rich'il nk'aj ajtojnel rech upxab' Dios che ipitnaq chpam tinmit Jerusalén; ke xikmol kib' ruk' Jesús. Ena xikta che Jesús:
2—¿Suche che kik'an taj nk'aj adiscípulo su costumbre kik'an qati' qamam ujer? Ke kik'tum kan chiquch che nmister nab'e kqach'aj qa'ab' keb' uxib' b'welt echi' kqatij qawa, per ni nk'aj adiscípulo at jala taj kik'ano, —xiche che.
3Ena xub'ij Jesús chke:
—Ni ix ¿suche che iy'om kan u'anik su ub'im kan Dios y xa jare itaqem u'anik kcostumbre iwti' imam ujer? 4Ri Dios xub'ij: “Chikjo ktzij aqaw achuch”,#Éx 20:12; Dt 5:16. xcha'. Soq xub'ij chik: “Chin xa k'ax kch'aw chkij uqaw uchuch, chkamsaxoq”.#Éx 21:17. Jala xub'ij Dios. 5Per ni ix kib'ij che ot ku'ono we jun mnaq kub'ij che uqaw uchuch: “Kinkun taj katinto'o, mal runjel jumpa o wuk', nitzjum chik che Dios”, kche che. 6We jala kub'ij un mnaqe', xa kiya t chik che kyuto' uqaw uchuch. Xaq ruk' jala ki'ano, kiya kanoq su kub'ij utzij upxab' Dios, xa rmal che itaqem u'anik su kb'im qati' qamam. 7¡Ix xa keb' iplaj! Qtzij su xub'ij najb'il utzij Dios Isaías chiwij ix. 8Re, utz'ib'am kanoq su ub'im Dios, xub'ij:
“Nk'aj mnaqi', xa ruk' kchi' kikkoj n'ij;
ni kanma' naj k'wi chwe.
9Soq ot uptan kojb'al n'ij kik'ano,
mal xaq jare ke kib'inre ruk' kchi';
ot uptan su kkitjoj mnaq che, mal jare t in kimb'ij;
xaw ktzij mnaq kikb'ij”, xche Dios chke. (Is 29:13)
—Jala utz'ib'am kan u Isaías.
10Xyusk'ij jun b'welt chik Jesús nk'aj mnaq, xub'ij chke:
—Chnitatb'ej; chich'b'o' su kimb'ij chiwe. 11Runjel jumpa sutaq'ik kutij jun mnaq ot tz'il ku'on che uk'asnmal. Jare ku'on tz'il che uk'asnmal jun mnaq jumpa tzij kel loq puchi' che xa ustaj, —xche chke.
12Ni nk'aj udiscípulo Jesús xiqib' koq ruk', xikb'ij che:
—¿Le awit'am che ustaj xikta nk'aj fariseo sutaq xab'ij? —xiche che.
13Ena xub'ij chik Jesús chke:
—Runjel jumpa tiko'n che jare taj nQaw o chla' chkaj xutiko, kb'oq na. Per su rich'il ra' kb'oq b'ik. 14Chiy'a kanoq, ke xa ijala peche nk'aj potz' iyajk'mal b'e chke nk'aj chik potz'. We o jun potz' kuk'am ub'e jun chik potz', jnam kitzaq b'i chpam jun jul, —xche chke.
15Nu Lu' xub'ij che Jesús:
—Chb'ij chqe su kilwi un k'amb'al n'oj che xab'ij, —xche che.
16Ena xub'ij chik Jesús che:
—¿Le soq mja kich'ob' ix sutaq kimb'ij? 17¿Le xa kich'ob' taj che runjel jumpa sutaq'ik kutij jun mnaq, xaq k'ax pupam tik'ri k'ax ptaq ub'qil? Kok taj pranma', xaq pupam kok wi, tik'ri kel kanoq echi' kuna uch'uklem. 18Per runjel jumpa sutaq'ik kel loq puchi' jun mnaq, puk'u'x kpi wi, y jarela ku'on tz'il che uk'asnmal. 19Chpam ranma' jun mnaq kpi wi runjel jumpa itzel taq chomnik kuchomaj, kuchomaj kukamsaj jun mnaq, kuchomaj ku'on umak ruk' jun chik mnaq che k'lunaq taj ruk', kuchomaj ku'on ela', kuchomaj kyusub' mnaq, y kuchomaj kuk'eq tzijtal chkij mnaq. 20Runjel wari', jarela ku'on tz'il che uk'asnmal jun mnaq; per we jun mnaq kuch'aj t u'ab' echi' kutij uwa, ku'on t tz'il che uk'asnmal. —Jala xub'ij Jesús.
Jun ixoq aj Israel taj xukoj utzij Jesús
(Mr 7:24-30)
21Ri Jesús xel b'i chla', x'e pukwent tinmit Tiro rich'il tinmit Sidón. 22O jun ixoq chla' aj Canaán. Ena xpitik xok ruk' Jesús, xusik'b'aj rib', xub'ij che:
—¡Qajaw, lal, ri'y umam u David, chil k'u'x la chwe! O jun wal ali urqom jun nimlaj k'ax rmal jun itzel espíritu, —xche che.
23Per ni Jesús ot su xub'ij che nixoq. Ena xiqib' koq nk'aj discípulo ruk' Jesús, xikb'och'ij ujlom, xikb'ij che:
—Chb'ij che nixoq che k'ek, mal mas upuchi'. Mas kusik'b'aj rib' trin loq chqij, —xiche che.
24Ena xub'ij Jesús:
—Ri Dios xaw nutqom loq in chikxo'l nk'aj aj Israel, che xa ijala peche nk'aj chij che isachnaq kanoq, —xche che.
25Ni nixoq xqib' koq ruk' Jesús, xub'och'ij ujlom, xixke' chjuch, tik'ri xub'ij che:
—Qajaw, chinat'o la, —xche che.
26Ni Jesús xub'ij che:
—Ustaj we kmaj kwa nk'aj ak'lab', tik'ri kya chke nk'aj tz'i',#15:26 Jesús kraj kub'ij che nab'e nmister kiyuto' mnaq che iyaj Israel. —xche che.
27Ni nixoq xub'ij chik:
—Qtzij kb'ij la, Qajaw, per ni nk'aj tz'i' kiksik' taq uxruk' kaxlenwa che ktzaq loq chuxe' un mixa rech kjaw, —xche che.
28Ena xub'ij chik Jesús che:
—Mas nim akojb'al olik ixoq. Kin'ano su kata chwe, —xche che.
Xaq ruk' jala xub'ij, xik'choj un ral.
Ik'i nk'aj yab' xyuknaj Jesús
29Ri Jesús xel b'i chla', x'e chuchi' mar Galilea. Tik'ri xel b'i puwi jun jyub', xikb'e' chla'. 30Ena jwert ik'i nk'aj mnaq xiyo'pan ruk', kuk'am b'i nk'aj yab' che jaljoj uwuch yab'il o chke. O nk'aj xa ipetz', kib'in taj, o nk'aj chik xa ipotz', kika'y taj, o nk'aj chik xa kum k'ab', soq o nk'aj chik xa imem, soq o nk'aj chik k'ilaj taq yab' kuk'am b'ik. Ena xikya chjuch Jesús, ni Jesús xyuknaj. 31Jwert xikmiyma nk'aj mnaq echi' xkilo che xiyikun nk'aj mem xich'awik, soq xu'on utz k'ab' nk'aj che xa kum unom, soq xib'in nk'aj che xa kib'in taj, soq xika'y nk'aj potz'. Ena xkinmirsaj u'ij Dios che jare kiDios aj Israel.
Ri Jesús xuya kwa kjeb' mil (4,000) mnaq
(Mr 8:1-10)
32Ri Jesús xyusk'ij nk'aj udiscípulo, xub'ij chke:
—In kel nk'u'x chke nk'aj mnaqi' mal och uxib' ij che, che iy'o chi' wuk', y otchich su kiktijo. Kwaj taj kiyintaq b'ik mal ot kwa kitjom. Otchich kchu'ab' kib'inik, pent ni kitzaq ptaq b'e, rmal uchu'ab' knumik, —xche chke.
33Ni nk'aj udiscípulo xikb'ij che:
—¿Jachi kqarqa wa chi' rech kqatzuq kunjel nk'aj mnaqe' che mas ik'i? Kriqtaj taj mal ot mnaq o kchoch chpam un lyari', —xiche che.
34Ri Jesús xuta chke:
—¿Jumpa kaxlenwa o iwuk' ix? —xche chke.
Ni ke xikb'ij:
—Xa jqub' (7) kaxlenwa rich'il keb' uxib' taq kar cha' olik, —xiche che.
35Tik'ri xub'ij Jesús chke nk'aj mnaq che kiyikb'e' chuchlew. 36Xuchap qaj jqub' (7) kaxlenwa rich'il keb' uxib' taq kar, xutyoxij che Dios. Tik'ri xupiro, xuya chke nk'aj udiscípulo, rech kikjach uwuch chikuch mnaq. 37Kunjel nk'aj mnaq xiwa'ik, xinojik. Echi' xtitaj kwa, xyak kqax che xikk'is taj. Xnoj jqub' (7) chkach che kqax che xso'wrnik. 38Ni nk'aj achjab' che xiktij kwa, puk kjeb' mil (4,000) o chke, xaq uwi' nk'aj ixqib' rich'il nk'aj ak'lab' che xiyejlax taj. 39Echi' titajnaq chik kwa nk'aj mnaq, ri Jesús xyujach b'i nk'aj mnaq. Tik'ri xok chpam un barco, x'e chpam un lyar Magadán.
Jelenleg kiválasztva:
San Mateo 15: qucSAS
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
