Romans 8
8
1သို့ဖြစ်၍ ခရစ်တော်ယေရှုနှင့် တစ်လုံးတစ်ဝတည်း ဖြစ်သောသူတို့သည် ဘုရားရှင်၏ အပြစ်ဒဏ်စီရင်ခြင်းနှင့် ယခုတွင်ကင်းလွတ်ကြ၏။ 2အဘယ်ကြောင့်ဆိုသော် ခရစ်တော်ယေရှုနှင့် တစ်လုံးတစ်ဝတည်း ဖြစ်စေသည့် ဝိညာဉ်တော်နှင့်ဆိုင်သော တရားသည် သေခြင်းတရားနှင့်အပြစ်တရား၏လက်မှ ကျွန်ုပ်တို့ကို လွတ်မြောက်စေသောကြောင့်ဖြစ်သည်။ 3လူ့ဇာတိသဘောအရ အားနည်းမှုကြောင့် ပညတ်တရားက မဆောင်ရွက်ပေးနိုင်သောအမှုအား ဘုရားရှင်သည် ဆောင်ရွက်ပေးတော်မူ၏။ ကိုယ်တော်သည် လူ့ဇာတိသဘောတွင် အသက်ရှင်လှုပ်ရှားသည်ဖြစ်ပြီး အပြစ်တရားအား ဖျက်ဆီးပစ်ရန် လူ့ဇာတိကိုခံယူတော်မူခဲ့သည်။ 4ဤသို့ ဘုရားရှင်က အရေးယူဆောင်ရွက်တော်မူရခြင်းမှာ ကျွန်ုပ်တို့သည် လူဇာတိသဘောနှင့် အညီမဟုတ်ဘဲ၊ ဝိညာဉ်တော်၏အလိုတော်နှင့်အညီ အသက်ရှင်ကြသော ကျွန်ုပ်တို့သည် ပညတ်တရားတော်တွင် ပြဌာန်းထားသည့် အကျင့်များအား လိုက်နာကျင့်သုံးကြစေရန်ဖြစ်သည်။ 5လူ့ဇာတိသဘော၏ စေခိုင်းမှုအရ အသက်ရှင်သူတို့သည် လူ့ဇာတိသဘောနှင့်ဆိုင်သော အရာများကိုသာ စိတ်စွဲလမ်းကြ၏။ သို့ရာတွင် ဝိညာဉ်တော်၏ ညွှန်ကြားချက်အရ အသက်ရှင်ကြသူတို့မူကား ဝိညာဉ်တော်အလိုရှိသည့် အရာများသာ စိတ်စွဲလမ်းကြ၏။ 6ဇာတိသဘောနှင့်ဆိုင်သော အရာများအား စိတ်စွဲလမ်းသူသည် အသက်သေဆုံးလိမ့်မည်ဖြစ်၏။ ဝိညာဉ်တော်နှင့် ဆိုင်သော အရာများကိုသာ စိတ်စွဲလမ်းသောသူတို့မမူကား အသက်ရှင်သန်၍ ငြိမ်သက်ခြင်းကိုရရှိလိမ့်မည်ဖြစ်၏။ 7ဇာတိသဘောဆိုင်ရာ အရာများကို စိတ်စွဲလမ်းသူသည် ဘုရားရှင်အား ရန်ဖက်ပြုသူဖြစ်၏။ ထိုသို့ စိတ်စွဲလမ်းသူသည် ဘုရားရှင်၏တရားတော်ကို မလိုက်လျှောက်တတ်ပေ။ အမှန်ပင် လိုက်လျောက်နိုင်ခြင်း မရှိကြပေ။ 8မိမိတို့၏ ဇာတိသဘောအလိုအတိုင်း ပြုကျင့်ကြသူတို့သည် ဘုရားရှင်၏ စိတ်တော်နှင့်မတွေ့နိုင်။ 9သို့ရာတွင် ဘုရားရှင်၏ဝိညာဉ်တော်သည် သင်တို့အထဲ၌ အမှန်ပင် ကျိန်းဝပ်တော်မူလျှင် သင်တို့သည် ဇာတိသဘော၏ လှုံ့ဆော်သည့်အတိုင်း မဟုတ်ဘဲ ဝိညာဉ်တော်သွန်သင်သည့်အတိုင်း ပြုမူကျင့်ကြံကြ၏။ ခရစ်တော်၏ဝိညာဉ်တော် ကိန်းဝပ်ခြင်းမရှိသောသူသည် ခရစ်တော်နှင့် မည်သို့မျှ သက်ဆိုင်ခြင်းမရှိပေ။ 10သို့သော် သင်တို့ထဲတွင် ခရစ်တော် ကျိန်းဝပ်တော်မူလျှင် အပြစ်တရားကြောင့် သင်တို့၏ ကိုယ်ခန္ဓာသည် သေရမည်ဖြစ်သော်လည်း သင်တို့၏ဝိညာဉ်မူကား ရှင်သန်လျက်ရှိ၏။ အဘယ်ကြောင့်ဆိုသော် သင်တို့သည် ဘုရားရှင်နှင့် မှန်ကန်စွာဆက်သွယ်ခွင့်ကို ရရှိပြီးကြသောကြောင့်ဖြစ်သည်။ 11ကိုယ်တော်ယေရှုအား သေခြင်းမှ အသက်ပြန်ရှင်စေတော်မူသော ဘုရားရှင်၏ဝိညာဉ်တော်သည် သင်တို့အထဲ၌ ကိန်းဝပ်တော်မူလျှင် ခရစ်တော်အား သေခြင်းမှ အသက်ပြန်ရှင်စေတော်မူသော အရှင်သည် သင်တို့အထဲ၌ ကိန်းဝပ်သော မိမိ၏ဝိညာဉ်တော်အားဖြင့် သေဆုံးတတ်သောသင်တို့၏ ကိုယ်ခန္ဓာကိုလည်း ရှင်သန်စေတော်မူလိမ့်မည်။ 12ထိုကြောင့် ညီအစ်ကိုတို့၊ ငါတို့၌ တာဝန်ရှိသော်လည်း ထိုတာဝန်မှာ လူ့ဇာတိအလိုသို့လိုက်၍ ပြုမူကျင့်ကြံရန် မဟုတ်ပေ။ 13အဘယ်ကြောင့်ဆိုသော် သင်တို့သည် မိမိတို့၏ လူ့ဇာတိအလိုသို့လိုက်၍ ပြုမူကျင့်ကြံပါက သေဆုံးရကြမည်ဖြစ်၏။ သို့သော် မိမိတို့၏အကျင့်ဆိုးများကို ဝိညာဉ်တော်အားဖြင့် အဆက်ဖြတ်ကြမည်ဆိုလျှင် အသက်ရှင်ကြလိမ့်မည်ဖြစ်၏။ 14ဘုရားရှင်၏ဝိညာဉ်တော် ရှေ့ဆောင်လမ်းပြမှုကို ခံယူကြသောသူတို့သည် ဘုရားရှင်၏သားသမီးများ ဖြစ်ကြ၏။ 15ဘုရားရှင်ထံတော်မှ သင်တို့ခံယူရရှိသည့် ဝိညာဉ်တော်သည် သင်တို့အား ကျွန်ဖြစ်စေသည်မဟုတ်။ ကြောက်စိတ်ကိုလည်း ရှိစေသည်မဟုတ်။ ဝိညာဉ်တော်သည် ကျွန်ုပ်တို့အားဘုရားရှင်၏ သားသမီးများ ဖြစ်စေတော်မူသဖြင့် ကျွန်ုပ်တို့သည် ဝိညာဉ်တော်၏တန်ခိုးဖြင့် ဘုရားရှင်အား "အဗ္ဗ၊ အဖ" ဟုခေါ်ကြ၏။ 16ကျွန်ုပ်တို့သည် ဘုရားရှင်၏ သားသမီးများ ဖြစ်ကြကြောင်းကို ဝိညာဉ်တော်ကိုယ်တိုင်ပင်လျှင် ကျွန်ုပ်တို့၏ ဝိညာဉ်နှင့်အတူ သက်သေခံတော်မူ၏။ 17ကျွန်ုပ်တို့သည် ဘုရားရှင်၏ သားသမီးများဖြစ်ကြသဖြင့် ကိုယ်တော်၏ လူမျိုးတော်အတွက် ကိုယ်တော်လျာထားတော်မူသော ကောင်းချီးမင်္ဂလာများကို ခံစားရကြမည်။ ခရစ်တော်အတွက် ဘုရားရှင် လျာထားတော်မူသည့် ဂုဏ်အသရေကိုလည်း ခံစားရကြမည်ဖြစ်၏။ အဘယ်ကြောင့်ဆိုသော် ကျွန်ုပ်တို့သည် ခရစ်တော်နှင့်အတူ ဝေဒနာခံစားကြလျှင် ကိုယ်တော်နှင့်အတူ ဘုန်းအသရေတော်ကို ခံစားရကြမည် ဖြစ်သောကြောင့်ပင်ဖြစ်၏။ 18ယခုမျက်မှောက်ကာလ၌ ကျွန်ုပ်တို့ခံနေကြရသည့် ဒုက္ခဆင်းရဲတို့အား နောင်အခါ၌ ကျွန်ုပ်တို့အား ပေါ်လွင်ထင်ရှားမည့် ဘုန်းအသရေတော်နှင့် ကျွန်ုပ်တို့ထံတွင် ပေါ်လွင်ထင်ရှားမည့် ဘုန်းအသရေတော်နှင့် နှိုင်းယှဉ်၍မရဟု ကျွန်ုပ်ယုံကြည်ပါ၏။ 19ဘုရားရှင်သည် မိမိ၏သားသမီးများကို ပေါ်လွင်ထင်ရှားစေမည့် အခြင်းအရာကို အဖန်ဆင်းခံ ကမ္ဘာလောကတစ်ခုလုံးက အလွန်လိုလားစွာဖြင့် စောင့်မျှော်လျက်ရှိ၏။ 20ဘုရားရှင်သည် ထိုအဖန်ဆင်းခံဖြစ်သော ကမ္ဘာလောကအား အနတ္တဖြစ်စေရန် အပြစ်ဒဏ်စီရင်တော်မူ၏။ ထိုသို့ဖြစ်စေခြင်းမှာ ကမ္ဘာလောက၏ အလိုဆန္ဒကြောင့် မဟုတ်ပေ။ ဘုရားရှင်၏ စီရင်ဆုံးဖြတ်ချက်ကြောင့် ဖြစ်သည်။ သို့ရာတွင် မျှော်လင့်ချက်ရှိ၏။ 21ထိုမျှော်လင့်ချက်မှာ တစ်နေ့သောအခါ၌ အဖန်ဆင်းခံ ကမ္ဘာလောကသည် ဖောက်ပြန်ပျက်စီးခြင်း၏ အနှောင်အဖွဲ့မှ လွတ်မြောက်၍ ဘုရားရှင်၏ သားသမီးများနှင့်အတူ လွတ်လပ်မှု၏ဘုန်းအသရေကို ခံစားခွင့်အား ရရှိလိမ့်မည်ဖြစ်၏။ 22အဖန်ဆင်းခံဖြစ်သည့် ကမ္ဘာလောကတစ်ခုလုံးသည် သားဖွားခြင်းဝေဒနာကဲ့သို့ ပြင်းထန်သောဝေဒေနာဖြင့် ယခုအချိန်တိုင်အောင် ညည်းတွားလျက်ရှိကြောင်း ကျွန်ုပ်တို့သိကြ၏။ 23အဖန်ဆင်းခံဖြစ်သည့် ကမ္ဘာလောကသာမက ဘုရားရှင်၏ အဦးဆုံး ဆုကျေးဇူးဖြစ်သည့် ဝိညာဉ်တော်ကို ခံယူရရှိကြသူ ကျွန်ုပ်တို့သည်လည်း ဘုရားရှင်၏ သားသမီးများဖြစ်ရသည့် အခွင့်ကိုလည်းကောင်း၊ ကျွန်ုပ်တို့၏ ကိုယ်ခန္ဓာတစ်ခုလုံး ကယ်တင်ခြင်းခံရသည့် အခွင့်ကိုလည်းကောင်း စောင့်မျှော်ကာ ညည်းတွားလျက် ရှိကြပေသည်။ 24အဘယ်ကြောင့်ဆိုသော် ကျွန်ုပ်တို့သည် မျှော်လင့်ခြင်းအားဖြင့် ကယ်တင်ခြင်းကို ခံရကြသောကြောင့်ဖြစ်၏။ ကျွန်ုပ်တို့သည် မိမိတို့မျှော်လင့်သည့်အရာကို မမြင်နိုင်ကြပေ။ မြင်နိုင်ကြပါမူ ကျွန်ုပ်တို့၏ မျှော်လင့်ခြင်းသည် အမှန်တကယ် မျှော်လင့်ခြင်းမဟုတ်ပေ။ မြင်ရသောအရာကို မည်သူသည် မျှော်လင့်ပါမည်နည်း။ 25သို့ရာတွင် ကျွန်ုပ်တို့သည် မိမိတို့မမြင်ရသည့်အရာအား မျှော်လင့်ကြလျှင် ထိုအရာကို စိတ်ရှည်စွာ စောင့်မျှော်တတ်ကြ၏။ 26ထိုနည်းတူပင် ဝိညာဉ်တော်သည်လည်း အားနည်းသော ကျွန်ုပ်တို့အား ကူညီမစရန် ကြွလာတော်မူ၏။ ကျွန်ုပ်တို့သည် မည်သို့ဆုတောင်းရမည်ကို မသိကြပေ။ နှုတ်အားဖြင့် မြွတ်ဆိုဖော်ပြရန် မဖြစ်နိုင်သော ညည်းတွားသံဖြင့် ဝိညာဉ်တော်ကိုယ်တိုင်ပင်လျှင် ကျွန်ုပ်တို့အတွက် ဘုရားရှင်ထံတွင် အသနားခံတော်မူ၏။ 27လူတို့၏ စိတ်နှလုံးကို သိမြင်တော်မူသော ဘုရားရှင်သည် ဝိညာဉ်တော်၏ စိတ်သဘောကိုလည်း သိမြင်တော်မူ၏။ အဘယ်ကြောင့်ဆိုသော် ဝိညာဉ်တော်သည် ဘုရားရှင်၏အလိုတော်နှင့်အညီ ကိုယ်တော်၏ လူမျိုးစုများအတွက် အသနားခံတော်မူသောကြောင့်ဖြစ်သည်။ 28ဘုရားရှင်အား ချစ်မြတ်နိုး၍ ကိုယ်တော်၏အကြံတော်နှင့်အညီ ခေါ်ယူရွေးကောက်ခြင်းကို ခံရသောလူတို့ တွေ့ကြုံခံစားရသည့် အမှုတော်ခပ်သိမ်းတို့မှ အကျိုးပေါ်ထွက်လာစေရန် ကိုယ်တော်သည် သူတို့နှင့်အတူ လုပ်ဆောင်တော်မူကြောင်းကို ကျွန်ုပ်တို့သိကြ၏။ 29ဘုရားရှင်သည် မိမိရွေးချယ်ထားသူတို့အား မိမိ၏သားတော်ကဲ့သို့ဖြစ်လာကြစေရန် သီးသန့်ထားတော်မူ၏။ ဤသို့ပြုတော်မူခြင်းမှာ သားတော်အား ညီတော်အမြောက်အများထဲတွင် အစ်ကိုတော်ကြီးဖြစ်စေရန်ပင် ဖြစ်သည်။ 30သို့ဖြစ်၍ ကိုယ်တော်သည် မိမိသီးသန့်ထားသူတို့ကို ခေါ်တော်မူ၏။ ထိုသို့ ခေါ်ယူတော်မူသောသူတို့အား မိမိနှင့်မှန်ကန်စွာ ဆက်ဆံစေတော်မူပြီးလျှင် မိမိ၏ ဘုန်းအသရေတော်ကို ခံစားခွင့်ပေးတော်မူ၏။ 31အထက်ပါအချက်များကို ထောက်ရှု၍ မည်သို့ဆိုရမည်နည်း။ ဘုရားရှင်သည် ကျွန်ုပ်တို့ဘက်၌ ရှိတော်မူလျှင် မည်သူကမျှ ကျွန်ုပ်တို့အား ဆန့်ကျင်နိုင်မည် မဟုတ်ပေ။ 32မိမိ၏ သားတော်အရင်းကိုပင် နှမြောခြင်းမရှိဘဲ ကျွန်ုပ်တို့ရှိသမျှအတွက် ပူဇော်သက္ကာအဖြစ် ပူဇော်တော်မူသောဘုရားရှင်သည် ကျွန်ုပ်တို့အား ဆန့်ကျင်မည် မဟုတ်ပေ။ ကျွန်ုပ်တို့အတွက် တပါးတည်းသော သားတော်အား ပူဇော်သော ဘုရားရှင်သည် အရာခပ်သိမ်းတို့အား ကျွန်ုပ်တို့အား မပေးအပ်ဘဲ မည်သို့ နေတော်မူမည်နည်း။ 33ဘုရားရှင်ရွေးချယ်ထားတော်မူသော လူတို့အား မည်သူသည် ပြစ်တင်စွပ်စွဲပါမည်နည်း။ သူတို့၌ အပြစ်မရှိကြောင်း ဘုရားရှင်ကိုယ်တော်တိုင် ထုတ်ဖော်ကြေညာတော်မူပြီဖြစ်၏။ 34သို့ဖြစ်၍ သူတို့အား မည်သူက ပြစ်ဒဏ်စီရင်မည်နည်း။ ခရစ်တော်သည် စီရင်မည်မဟုတ်ပေ။ အသေခံတော်မူသည်သာမက သေခြင်းမှ ပြန်ရှင်တော်မူခဲ့သော ခရစ်တော်ယေရှုသည် ဘုရားရှင်၏ လက်ယာတော်ဘက်တွင် ထိုင်တော်မူကာ ကျွန်ုပ်တို့အတွက် ဘုရားရှင်ထံတွင် အသနားခံလျက်နေတော်မူ၏။ 35သို့ဖြစ်၍ မည်သူသည် ကျွန်ုပ်တို့အား ခရစ်တော်၏ မေတ္တာတော်နှင့် ကွဲကွာစေနိုင်မည်နည်း။ ဒုက္ခရောက်ခြင်း၊ ကျဉ်းကျပ်ခြင်း၊ အညှဉ်းပန်းခံရခြင်း၊ ငတ်မွတ်ခြင်း၊ ဆင်းရဲနွမ်းပါးခြင်း၊ ဘေးအန္တရာယ်နှင့်ကြုံတွေ့ခြင်း၊ ကွပ်မျက်ခံရခြင်းတို့သည် ကိုယ်တော်၏မေတ္တာတော်နှင့် ကျွန်ုပ်တို့အား ကွဲကွာစေနိုင်မည်လော။ 36"ကိုယ်တော့်၏အတွက် ကျွန်ုပ်တို့သည် တစ်နေ့လုံးပင် သေဘေးနှင့်ရင်ဆိုင်လျက် နေကြပါ၏။ သတ်ဖြတ်ရန် လျာထားသော သိုးများကဲ့သို့ အကျွန်ုပ်တို့ကို သူတစ်ပါးတို့က သတ်မှတ်ကြပါ၏" ဟူသော ကျမ်းစာတွင် ရေးသားထားသည့်အတိုင်း ဖြစ်ပေသည်။ 37ကျွန်ုပ်တို့သည် သိုးများကဲ့သို့ ကွဲကွာခြင်းမရှိကြသည်သာမက ထိုအတွေ့အကြုံတို့နှင့် ရင်ဆိုင်ကြရာတွင်လည်း ကျွန်ုပ်တို့အား ချစ်တော်မူသော အရှင်အားဖြင့် အထူးပင်အောင်မြင်လျက်ရှိကြ၏။ 38အဘယ်ကြောင့်ဆိုသော် မည်သည့်အရာကမျှ ကျွန်ုပ်တို့အား ကိုယ်တော်၏မေတ္တာတော်နှင့် မကွဲကွာစေနိုင်ပေ။ သေဆုံးခြင်းဖြစ်စေ၊ အသက်ရှင်ခြင်းဖြစ်စေ၊ နတ်ဒေဝါများဖြစ်စေ၊ ကောင်းကင်အာဏာပိုင်ဖြစ်စေ၊ ပစ္စပ္ပန်အရာဖြစ်စေ၊ အနာဂတ်အရာဖြစ်စေ၊ 39ကောင်းကင်အထက်တွင်ရှိသည့် အရာဖြစ်စေ၊ မြေအောက်အရာဖြစ်စေ၊ ဖန်ဆင်းထားသော မည်သည့်အရာပင်ဖြစ်စေ၊ ကျွန်ုပ်တို့၏အရှင် ခရစ်တော်ယေရှုအားဖြင့် ဘုရားရှင်ဖော်ပြတော်မူသော မေတ္တာတော်နှင့် ကျွန်ုပ်တို့အား ကွဲကွာခြင်းမရှိစေနိုင်ဟု ကျွန်ုပ်သည် အမှန်ပင်သိသောကြောင့်ဖြစ်သည်။
Jelenleg kiválasztva:
Romans 8: TPV-RV
Kiemelés
Megosztás
Összehasonlít
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.