Psalms 98
98
1ဘုရားရှင်ထံသို့ သီချင်းအသစ်ကို သီကျူးကြလော့။ အကြောင်းမူကား အရှင်သည် အံ့ဖွယ်သောအမှုတို့ကို ပြုတော်မူပြီ။ အရှင်၏လက်ယာလက်တော်နှင့် အရှင်၏မြင့်မြတ်သောလက်ရုံးတော်သည် အရှင့်အဖို့ ကယ်တင်ခြင်းအမှုကို ပြုတော်မူပြီ။ 2ဘုရားရှင်သည် မိမိ၏ကယ်တင်ခြင်းကို ထင်ရှားစေ၍ မိမိ၏ဖြောင့်မတ်ခြင်းကို လူမျိုးတကာတို့ရှေ့၌ဖော်ပြတော်မူပြီ။ 3အရှင်သည် အစ္စရေးအမျိုးအနွယ်အပေါ်ထားရှိသည့် မိမိ၏မေတ္တာကရုဏာတော်နှင့် သစ္စာတော်တို့ကို အောက်မေ့တော်မူပြီ။ ကမ္ဘာမြေအစွန်းရှိသမျှတို့သည် ငါတို့ဘုရားရှင်၏ ကယ်တင်ခြင်းကို မြင်ရကြပြီ။ 4ကမ္ဘာပေါ်ရှိလူသားအပေါင်းတို့၊ ဘုရားရှင်ထံသို့ ဝမ်းမြောက်စွာကြွေးကြော်ကြလော့။ ဟစ်ကြော်လျက်၊ ရွှင်လန်းစွာသီချင်းဆိုလျက်သီဆိုချီးမွမ်းကြလော့။ 5ဘုရားရှင်ကို စောင်းတီး၍ သီဆိုချီးမွမ်းကြလော့။ စောင်းတီး၍ တေးသီချင်းသံဖြင့် သီဆိုချီးမွမ်းကြလော့။ 6တံပိုးခရာနှင့် သိုးချိုမှုတ်သံများဖြင့် ရှင်ဘုရင်တည်းဟူသော ဘုရားရှင်၏ရှေ့တော်၌ ဝမ်းမြောက်စွာကြွေးကြော်ကြလော့။ 7ပင်လယ်နှင့် ပင်လယ်၌ရှိသောအရာတို့သည် မြည်ဟည်းကြပါစေ။ ကမ္ဘာလောကနှင့် ကမ္ဘာလောကတွင်နေထိုင်သောသူများသည်လည်း ထိုနည်းတူပြုကြပါစေ။ 8မြစ်တို့သည် လက်ခုပ်တီးကြပါစေ။ တောင်များသည် ဘုရားရှင်ရှေ့တော်၌ အတူတကွရွှင်လန်းစွာသီချင်းဆိုကြပါစေ။ 9အကြောင်းမူကား အရှင်သည် ကမ္ဘာမြေကြီးကို တရားစီရင်ရန် ကြွာလာတော်မူ၏။ အရှင်သည် ကမ္ဘာလောကကို ဖြောင့်မတ်ခြင်းဖြင့် လည်းကောင်း၊ လူတို့ကို သမာသမတ်ရှိခြင်းဖြင့်လည်းကောင်း တရားစီရင်တော်မူလိမ့်မည်။
Jelenleg kiválasztva:
Psalms 98: TPV-RV
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.