Psalms 85
85
1အို ဘုရားရှင်၊ အရှင်သည် မိမိ၏ပြည်တော်ကိုနှစ်သက်တော်မူ၍ ဖမ်းဆီးခေါ်ဆောင်ခြင်းခံရသော ယာကုပ်အမျိုးကို ပြန်လာစေတော်မူပြီ။ 2အရှင်သည် မိမိလူမျိုးတော်တို့၏ ဒုစရိုက်ကိုခွင့်လွှတ်၍ သူတို့၏အပြစ်ရှိသမျှတို့ကို ဖုံးအုပ်တော်မူပြီ။ 3မိမိ၏ဒေါသကို အကုန်အစင်ရုပ်သိမ်း၍ မိမိ၏ပြင်းထန်သောအမျက်တော်ကို ပြေငြိမ်းစေတော်မူပြီ။ 4ကျွန်ုပ်တို့ကို ကယ်တင်တော်မူသော ဘုရားရှင်၊ ကျွန်ုပ်တို့ကို ပြန်လည်ထူထောင်တော်မူပါ။ ကျွန်ုပ်တို့အပေါ် ထွက်တော်မူသော အမျက်ဒေါသကို ဖယ်ရှားတော်မူပါ။ 5ကျွန်ုပ်တို့အပေါ် အစဉ်အမြဲ အမျက်ထွက်တော်မူမည်လော။ အရှင်၏အမျက်တော်ကို မျိုးဆက်အစဉ်အဆက် ကြာရှည်စေတော်မူမည်လော။ 6အရှင်၏လူမျိုးတော်တို့သည် အရှင်၌ဝမ်းမြောက်မည့်အကြောင်း ကျွန်ုပ်တို့ကို ပြန်လည်ရှင်သန်စေတော်မူမည်မဟုတ်လော။ 7အို ဘုရားရှင်၊ အရှင်၏မေတ္တာကရုဏာတော်ကို ကျွန်ုပ်တို့ အားပြ၍ အရှင်၏ကယ်တင်ခြင်းကို ကျွန်ုပ်တို့အား ပေးသနားတော်မူပါ။ 8ကျွန်ုပ်သည် အရှင်ဖြစ်သော ဘုရားရှင်မိန့်တော်မူသည့်အရာကို နားထောင်မည်။ အကြောင်းမူကား အရှင်သည် မိမိ၏လူမျိုးတော်တည်းဟူသော မိမိ၏သစ္စာရှိသော အစေခံတို့အား ငြိမ်းချမ်းရေးစကားကို မြွက်ဆိုတော်မူလိမ့်မည်။ သို့သော် သူတို့သည် မိုက်မဲခြင်းဘက်သို့ ပြန်မလှည့်ကြပါစေနှင့်။ 9ကျွန်ုပ်တို့ပြည်၌ ဘုန်းကျက်သရေတည်စေရန် အရှင်၏ကယ်တင်ခြင်းသည် အရှင်ကို ကြောက်ရွံ့သောသူတို့၏အနီး၌ အမှန်ပင်ရှိလေပြီ။ 10မေတ္တာကရုဏာနှင့် သမ္မာတရားသည် တွေ့ဆုံကြပြီ။ ဖြောင့်မတ်ခြင်းနှင့် ငြိမ်းချမ်းခြင်းသည် အချင်းချင်းနမ်းကြပြီ။ 11သမ္မာတရားသည် မြေကြီးထဲမှ ပေါက်လာလိမ့်မည်။ ဖြောင့်မတ်ခြင်းသည်လည်း ကောင်းကင်ပေါ်မှ ငုံ့ကြည့်လိမ့်မည်။ 12အမှန်စင်စစ် ဘုရားရှင်သည် ကောင်းမြတ်သော အရာကိုပေးသနားတော်မူ၍ ကျွန်ုပ်တို့၏ပြည်သည်လည်း ကောက်ပဲသီးနှံများစွာထွက်လိမ့်မည်။ 13ဖြောင့်မတ်ခြင်းသည် အရှင်၏ရှေ့မှသွား၍ အရှင်၏ခြေလှမ်းများအတွက် လမ်းကိုပြင်ဆင်ပေးလိမ့်မည်။
Jelenleg kiválasztva:
Psalms 85: TPV-RV
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.