Psalms 24
24
1ဘုရားရှင်သည် ကမ္ဘာမြေကြီးနှင့် ကမ္ဘာမြေကြီးပေါ်တွင် ရှိသမျှအရာတို့ကိုလည်းကောင်း၊ ကမ္ဘာလောကနှင့် ကမ္ဘာလောကတွင် နေထိုင်ကြသောသူတို့ကိုလည်းကောင်း၊ ပိုင်တော်မူ၏။ 2အကြောင်းမူကား ကိုယ်တော်သည် ကမ္ဘာမြေကြီးအား မြေအောက်ရေနက်ရာအရပ်၌ အုတ်မြစ်ချတော်မူ၏။ နက်ရှိုင်းသော သမုဒ္ဒရာများထဲတွင် အခြေစိုက်၍ တည်တော်မူ၏။ 3ဘုရားရှင်၏ တောင်ပေါ်သို့တက်နိုင်မည့်သူကား မည်သူနည်း။ ကိုယ်တော်၏ သန့်ရှင်းမြင့်မြတ်သော ဗိမာန်တော်သို့ ဝင်နိုင်မည့်သူကား မည်သူနည်း။ 4ထိုသူသည်ကား အပြစ်ကင်းသောလက်နှင့် ဖြူစင်သောစိတ်နှလုံးရှိသူ၊ ဘုရားအတုအယောင်များအား ကိုးကွယ်ခြင်းမရှိသူ၊ လိမ်လည်လှည့်ဖြား၍ ကျိန်ဆိုခြင်းမပြုသူပင်ဖြစ်၏။ 5ထိုသူသည် ဘုရားရှင်ထံမှ ကောင်းချီးမင်္ဂလာကိုလည်းကောင်း၊ သူ့အား ကယ်တင်တော်မူသော ဘုရားရှင်ထံမှ ဖြောင့်မတ်ခြင်းကိုလည်းကောင်း ရရှိလိမ့်မည်။ 6ထိုသို့သောသူသည် ကိုယ်တော်ကိုရှာသောသူ၏ မျိုးဆက်ဖြစ်၏။ ယာကုပ်ကဲ့သို့ ကိုယ်တော်၏မျက်နှာတော်ကို ရှာသောသူဖြစ်။ 7မြို့တံခါးတို့ကို ကျယ်စွာဖွင့်လိုက်ကြလော့။ ရှေးဟောင်းတံခါးတို့ကို ဖွင့်လိုက်ကြလော့။ ဘုန်းတော်ကြီးမြတ်သော ရှင်ဘုရင် ဝင်တော်မူမည်ဖြစ်သည်။ 8ထိုဘုန်းတော်ကြီးမြတ်သောရှင်ဘုရင်သည်ကား မည်သူနည်း။ ထိုအရှင်ကား အင်အားကြီးမား၍ တန်ခိုးကြီးသောဘုရားရှင်၊ စစ်မက်အရာ၌ တန်ခိုးကြီးသော ဘုရားရှင်ဖြစ်တော်မူ၏။ 9မြို့တံခါးတို့ကို ကျယ်စွာဖွင့်လိုက်ကြလော့။ ရှေးဟောင်းတံခါးတို့ကို ဖွင့်လိုက်ကြလော့။ ဘုန်းတော်ကြီးမြတ်သော ရှင်ဘုရင် ဝင်တော်မူမည်ဖြစ်သည်။ 10ထိုဘုန်းတော်ကြီးမြတ်သောရှင်ဘုရင်သည်ကား မည်သူနည်း။ ဘုန်းတော်ကြီးမြတ်သော ရှင်ဘုရင်သည်ကား စစ်ပွဲတွင်အောင်မြင်တော်မူသော ဘုရားရှင်ပေတည်း။
Jelenleg kiválasztva:
Psalms 24: TPV-RV
Kiemelés
Megosztás
Összehasonlít
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.